29 C
Phnom Penh

តុលាការ​សម្រេច​ឃុំខ្លួន​មន្ត្រី​នគរបាល​២​នាក់ ​និង​បក្ខ​ពួក​៣​នាក់​ទៀត ​ករណី​បាញ់​ទៅ​លើ​ម្ចាស់​រថយន្ត​ម្នាក់​នៅ​ខេត្ត​ព្រះវែង​

ដោយ ឌឹ ខេមបូឌា ដេលី

បទវិភាគ

ចៅក្រម​ស៊ើប​សួរ​សាលាដំបូង​ខេត្ត​ព្រៃវែង​ បាន​ចេញ​ដីកា​សម្រេច​ឃុំ​ខ្លួន​បណ្ដោះ​អាសន្ន​មន្ត្រី​នគរបាល​២​នាក់​និង​មនុស្ស​៣​នាក់​ទៀត​នៅ​ថ្ងៃ​នេះ ​ពាក់​ព័ន្ធ​ករណី​បាញ់​សម្លាប់​ពលរដ្ឋ​ម្នាក់​នៅ​ស្រុក​បាភ្នំ ​កាល​ពី​សប្ដាហ៍​មុន។​

ដីកា​បង្គាប់​ឲ្យ​ឃុំ​ខ្លួន​នាយ​ផ្នែក​អន្តោ​ប្រវេសន៍​ស្រុក​ព្រះស្តេច ​ លោក​ ជឹម រតនៈ ​និង​ឈ្មោះ​ជឹម វិន​ជា​មន្ត្រី​ប៉ុស្តិ៍​កំពង់​សឹង្ហ​បណ្តោះ​អាសន្ន​ ពី​បទ​ឃាតកម្ម​និង​ប្រើ​ប្រាស់​អាវុធ​ដោយ​គ្មាន​ការ​អនុញ្ញាត ​តាម​មាត្រា​១៩៩​ នៃ​ក្រម​ព្រហ្ម​ទណ្ឌ ​និង​មាត្រា ​២០​នៃ​ច្បាប់​គ្រប់​គ្រង​អាវុធ​គ្រឿង​ផ្ទុះ​និង​គ្រាប់​រំសេវ។​

ចំណែក​បក្ខ​ពួក​៣​នាក់​ទៀត​ក៏​ត្រូវ​បាន​តុលាការ​ចោទ​ប្រកាន់​ពី​បទ​បរិហារ​កេរ្តិ៍​បង្កាច់​កេរ្តិ៍​និង​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជា​អាទិ៍​តាម​មាត្រា​៣១១​មាត្រា​៣១២​និង​មាត្រា​៤៩៥​នៃ​ក្រម​ព្រហ្មទណ្ឌ។​

កាល​ពី​ថ្ងៃ​ទី​២៦​មីនា​លោក​ស ខេង​បាន​បញ្ជាក់​នៅ​លើ​ទំព័រ​ហ្វេសប៊ុក​ថា ​ករណី​បាញ់​ប្រហារ​ទៅ​លើ​ម្ចាស់​រថយន្ត​ម្នាក់​ឈ្មោះ​យ៉ន រ៉ាវុទ្ធ​បណ្តាល​ឱ្យ​ស្លាប់​ពី​សំណាក់​សមត្ថ​កិច្ច​នៅ​ខេត្ត​ព្រៃវែង​ត្រូវ​កម្លាំង​នគរបាល​សម្រេច​បញ្ជូន​ជន​ល្មើស​និង​អ្នក​ពាក់​ព័ន្ធ​ទៅ​តុលាការ។​

ជាង​នេះ​ទៅទៀត​ក្រសួង​មហា​ផ្ទៃ​ក៏​បាន​ ដាក់​ពិន័យ​កង​កម្លាំង​នគរបាល​ដោយ​ដក​តំណែង​មេ​ប៉ុស្តិ៍​ឈ្មោះ​ជា ឡាឌីន​ដោយសារ​បាន​ដឹក​នាំ​កម្លាំង​ដោយ​អត្ត​នោម័ត។ ​ចំណែក​មនុស្ស​៤​នាក់​ដែល​ជា​អ្នក​រួម​ដំណើរ​ជាមួយ​ជន​រងគ្រោះ​ត្រូវ​បាន​សមត្ថកិច្ច​ដោះលែង​ដោយ​ធ្វើ​កិច្ច​សន្យា​អោយ​ត្រឡប់​មក​ធ្វើ​ជា​សាក្សី​វិញ​ពេល​ណា​ដែល​សមត្ថ​កិច្ច​ត្រូវ​ការ។​ លោក ​ស ខេង​សង្ឃឹម​ថា​តុលាការ​នឹង​ផ្តល់​យុត្តិធម៌​ជូន​គ្រួសារ​សព​ក៏​ដូច​ជា​ក្រុម​គ្រួសារ​ដែល​មាន​ការ​ពាក់ព័ន្ធ។​

យ៉ាងហោច​ណាស់​មាន​បុរស​ម្នាក់​ជា​ម្ចាស់​រថយន្ត​ឈ្មោះ​យ៉ន រ៉ាវុធ ​បាន​ស្លាប់​ ហើយ​បុរស​ម្នាក់​ទៀត​បាន​រង​របួស​ធ្ងន់​ដោយ​សារ​ទទួល​រង​នូវ​ការ​បាញ់​ប្រហារ​ជាច្រើន​គ្រាប់​ពី​សំណាក់​ក្រុម​សមត្ថកិច្ច​កាល​ពី​យប់​ថ្ងៃ​ទី​២៣ខែ​មីនា​​ នៅ​ឯ​ភូមិ​​គោក​សណ្ដែក​ស្ថិត ​ឃុំ​រក្សជ័យ​ ស្រុកបាភ្នំ ខេត្ត​ព្រៃវែង៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស