ប្រធានសភាពាណិជ្ជកម្មកម្ពុជាលោកឧកញ៉ាគិត ម៉េងបានសម្តែងការគាំទ្រចំពោះការធ្វើកំណែទម្រង់របស់រដ្ឋាភិបាល ប៉ុន្តែលោកស្នើឲ្យរដ្ឋាភិបាលពិចារណាពង្រីកទីផ្សារបន្ថែមទៀតទៅកាន់ប្រទេសលោកខាងលិច ឬ បណ្តាប្រទេសប្លុកលោកសេរី។
ថ្លែងក្នុងពិធីវេទិការាជរដ្ឋាភិបាលនិងផ្នែកឯកជនលើកទី១៨នៅវិមានសន្តិភាពនាថ្ងៃនេះ ប្រធានសភាពាណិជ្ជកម្មកម្ពុជាលោកគិត ម៉េងបានស្នើសុំឱ្យរដ្ឋាភិបាលបើកទីផ្សារសេដ្ឋកិច្ចទៅកាន់សហភាពអឺរ៉ុប អាស៊ី មជ្ឈឹមបូព៌ា អាហ្វ្រិក ជប៉ុននិងកូរ៉េជាដើម។
ជាមួយគ្នានេះ លោកគិត ម៉េងក៏ស្នើសុំឱ្យមានវេទិការវាងវិស័យឯកជន និងរដ្ឋាភិបាលជារៀលរាល់ឆ្នាំផងដែរ។
រដ្ឋាភិបាលលើកឡើងថា ខ្លួនបានធ្វើកំណែទម្រង់ជាកញ្ចប់ ដូចជាការលុបភ្នាក់ងារនាវាចរ ឬកាំសាប ការដកកាំកុងត្រូលចេញពីព្រំដែន និងបញ្ចុះតម្លៃតាមកំពង់ផែ ដែលអាចជាការកាត់បន្ថយការចំណាយថ្លៃដើមនៅក្នុងស្រុក។ បន្ថែមពីនេះ រដ្ឋាភិបាលក៏បានចាត់វិធានការវះកាត់សាច់ស្អុយរបស់ខ្លួន ដោយថា ជាការទប់ស្កាត់អំពើពុករលួយផងដែរ។
ការស្នើរបស់លោកឧកញ៉ាគិតម៉េងនៅពេលនេះកើតមានឡើងក្រោយពេលរដ្ឋាភិបាលសម្រេចធ្វើកំណែទម្រង់ផ្ទៃក្នុងដើម្បីពង្រឹងសេដ្ឋកិច្ច ដោយត្រៀមទប់ទល់ទៅនឹងការដាក់ទណ្ឌកម្មសេដ្ឋកិច្ចពីប្រទេសលោកសេរី។
រហូតមកទល់ពេលនេះ សហភាពអឺរ៉ុបនិងសហរដ្ឋអាមេរិកដែលនាំមុខគេខាងប្លុកលោកសេរីកំពុងបោះពួយព្យួរប្រព័ន្ធអនុគ្រោះពន្ធEBAនិងGSPពីកម្ពុជាទាំងស្រុង ប្រសិនបើរដ្ឋាភិបាលលោកហ៊ុន សែនមិនព្រមស្តារស្ថានការណ៍នយោបាយ និងបញ្ហាសិទ្ធិមនុស្សឡើងវិញទេ។
អ្នកឃ្លាំមើលបារម្ភថា ការដកប្រព័ន្ធអនុគ្រោះពន្ធទាំងពីរនេះនឹងនាំឱ្យប៉ះពាល់ដល់ទីផ្សារនាំចេញរបស់កម្ពុជាដែលធ្វើពលរដ្ឋខ្មែររាប់សែននាក់ប្រឈមការបាត់បង់ការងារធ្វើនិងអាចបង្កជាវិបត្តិសង្គមធ្ងន់ធ្ងរ៕