ប្រធានស្តីទីគណបក្សសង្រ្គោះជាតិដែលកំពុងនិរទេសខ្លួននៅក្រៅប្រទេសគឺលោកសម រង្ស៊ីបានលើកឡើងថា លោកហ៊ុន សែនកំពុងបង្វែការចាប់អារម្មណ៍របស់មហាជនពីបញ្ហាប្រទេសជាតិទៅមើលបញ្ហាផ្ទាល់ខ្លួនរបស់លោកហ៊ុន សែនវិញ។
ថ្លែងនៅលើទំព័រហ្វេសប៊ុករបស់លោកកាលពីថ្ងៃម្សិលមិញ លោកសម រង្ស៊ីអះអាងថា លោកមិនដែលចាប់អារម្មណ៍ពីរឿងឯកជនរបស់អ្នកដទៃណាម្នាក់ឬគ្រួសារអ្នកដទៃណាមួយឡើយ។
លោកថា ប្រធានគណបក្សប្រជាជនកម្ពុជាលោកហ៊ុន សែនជាមេដឹកនាំមិនចេះទទួលខុសត្រូវ ដែលប៉ុនប៉ងបង្វែអារម្មណ៍របស់មហាជនពីបញ្ហាប្រទេសជាតិដោយមិនចេះដោះស្រាយឲ្យទៅចាប់អារម្មណ៍ពីរឿងឯកជនរបស់គាត់ និងក្រុមគ្រួសារគាត់វិញ។
ក្រៅពីនេះ លោកហ៊ុន សែនដើរចោទប្រកាន់គេឯងយ៉ាងងងើល ទាក់ទងទៅនឹងរឿងផ្ទាល់ខ្លួនរបស់គាត់ និងគ្រួសារគាត់ ពីព្រោះលោកហ៊ុន សែនត្រូវការលេសដើម្បីបង្ក្រាបគូប្រកួតនយោបាយរបស់ខ្លួន។
ការថ្លែងដូចនេះធ្វើឡើងមួយថ្ងៃក្រោយពេលលោកហ៊ុន សែនបានប្រកាសដាក់ផែនការកម្ទេចលោកសម រង្ស៊ីដូចកម្ទេចក្រុមប៉ុល ពត។
ថ្លែងនៅមុខនិស្សិតរាប់ពាន់នាក់កាលពីថ្ងៃម្សិលមិញ លោកហ៊ុន សែន បានប្រកាសថា លោកនឹងមិនអត់ឱនឱ្យ ប្រធានស្តីទីគណបក្សសង្រ្គោះជាតិ លោកសម រង្ស៊ីជាដាច់ខាត ហើយលោកនឹងតាមកម្ទេចលោកសម រង្ស៊ីមួយជីវិត ដោយថា មេបក្សប្រឆាំងរូបនេះបានប្រមាថក្រុមគ្រួសាររបស់លោកជាពិសេសការប្រមាថភរិយារបស់លោកនិងកូនប្រុសច្បងរបស់លោកថា ជាប្រពន្ធនិងកូនរបស់អតីតមេដឹកនាំវៀតណាមឈ្មោះឡេ ដឹកថូ។ លោកហ៊ុន សែនអះអាងថា ការប្រមាថនេះជាការប្រមាថធ្ងន់ធ្ងរមកលើក្រុមគ្រួសារលោកដោយថា មួយជីវិតលោកនឹងមិនអាចបំភ្លេចនិងមិនអាចអត់ឱនបានឡើយ ហើយការប្រមាថនេះជាការដឹកនាំព្រមទាំងណែនាំឱ្យធ្វើដោយលោកសម រង្ស៊ី។
កាលពីឆ្នាំ២០១៦ ប្រធានគណបក្សសង្រ្គោះជាតិពេលនោះគឺលោកសម រង្ស៊ីបានថ្កោលទោសអ្នកបង្កើតការប្រមាថនេះនិងបានបញ្ជាក់ពីជំហររបស់គណបក្សសង្គ្រោះជាតិតាមរយៈលិខិតមួយច្បាប់ផ្ញើទៅកាន់នាយករដ្ឋមន្ត្រីកាលពីថ្ងៃទី១៤ខែមិថុនាឆ្នាំ២០១៦ថា លោកមានការសោកស្តាយយ៉ាងខ្លាំងចំពោះទង្វើរបស់ជនទាំងឡាយណាដែលបានប្រើពាក្យពេចន៍មិនសមរម្យ មិនថ្លៃថ្នូរ ប្រមាថនិងចោទប្រកាន់លើកូនប្រុសនិងភរិយានាយករដ្ឋមន្រ្តីធ្វើឲ្យរងការឈឺចាប់។
លិខិតនោះបញ្ជាក់ទៀតថា គោលនយោបាយរបស់គណបក្សសង្គ្រោះជាតិប្រឆាំងដាច់ខាតនូវការប្រើប្រាស់អំពើហិង្សាការលាបពណ៌ ការប្រមាថនិងអំពើទាំងឡាយណាដែលនាំឲ្យមានការឈឺចាប់ដល់អ្នកដទៃនិងបានប្រកាសថ្កោលទោសទៅទង្វើនេះទៀតផង៕