ពលរដ្ឋមានជម្លោះដីធ្លីជាមួយក្រុមហ៊ុនឧកញ៉ាលី យ៉ុងផាត់មកពីស្រុកចំនួន២ក្នុងខេត្តកំពង់ស្ពឺបាននាំគ្នាឡើងមកសុំកិច្ចអន្តរាគមន៍ពីរដ្ឋាភិបាលពិសេសពីក្រសួងរៀបចំដែនដី នគរូបនីយកម្មនិងសំណង់ដោយស្នើឱ្យក្រសួងនេះផ្ដល់សំណងឱ្យបានសមរម្យដល់ពួកគាត់ពីព្រោះពួកគាត់មិនអាចទទួលយកបានឡើយចំពោះការដោះស្រាយកន្លងមក។
ពលរដ្ឋដែលមានជម្លោះដីធ្លីមកពីស្រុកថ្ពងនិងស្រុកឱរ៉ាល់មានចំនួនជិត៧រយនាក់(៦៩៤)បាននាំគ្នាយកញ្ញត្តិដាក់ទៅក្រសួងរៀបចំដែនដីជាថ្មីទៀត ដោយស្នើឱ្យស្ថាប័ននេះផ្ដល់ដំណោះស្រាយថ្មីក្នុងជម្លោះដីធ្លីជាមួយក្រុមហ៊ុនចំនួន២គឺក្រុមហ៊ុនស្ករអំពៅភ្នំពេញស៊ូហ្គឺ និងក្រុមហ៊ុនកំពង់ស្ពឺស៊ូហ្គឺរបស់លោកឧកញ៉ាលី យ៉ុងផាត់ដែលជាសមាជិកព្រឹទ្ធសភារបស់បក្សកាន់អំណាចនិងជាមនុស្សស្និទ្ធនឹងលោកហ៊ុន សែន។
ជម្លោះដីធ្លីនេះបានកើតឡើងតាំងពីឆ្នាំ២០១០ ប៉ុន្តែដំណោះស្រាយរបស់អាជ្ញាធរនិងក្រុមហ៊ុនធ្លាប់ផ្តល់សំណងជូនពលរដ្ឋក្នុងមួយគ្រួសារពី៣រយទៅ៥រយដុល្លារសហរដ្ឋអាមេរិក។
ប៉ុន្តែពលរដ្ឋអះអាងថា ពួកគេមិនអាចទទួលយកបានទេចំពោះសំណងដ៏តិចតួចដូច្នេះពីព្រោះ ពលរដ្ឋខ្លះមានដីចន្លោះពី២ទៅជិត១០ហិកតាស្របពេលតម្លៃដីនៅតំបន់នោះឡើងថ្លៃក្នុងមួយហិកតាតម្លៃរហូតដល់ទៅ៥ពាន់ដុល្លារសហរដ្ឋអាមេរិកទៅហើយនោះ។ មន្ត្រីក្រសួងរៀបចំដែនដីនៅព្រឹកនេះបានចេញមកប្រាប់ឱ្យពលរដ្ឋបញ្ជូនតំណាងរបស់ខ្លួនចំនួន៧នាក់ចូលប្រជុំពិភាក្សាជាមួយតំណាងរបស់ក្រសួង។
ក្រោយកិច្ចប្រជុំនៅថ្ងៃនេះ តំណាងពលរដ្ឋបានឱ្យដឹងថា ប្រធានគណៈកម្មការទទួលបន្ទុកដោះស្រាយវិវាទដីធ្លីនៃក្រសួងរៀបចំដែនដីបានសន្យាថា រដ្ឋាភិបាលនឹងចុះដោះស្រាយបញ្ហានេះក្រោយបុណ្យចូលឆ្នាំខ្មែររួច ដោយមានការចូលរួមពីអង្គការសង្គមស៊ីវិលផងដែរ។
ក្រុមហ៊ុនស្ករអំពៅរបស់លោកឧកញ៉ាលី យ៉ុងផាត់ត្រូវបានគេប្រសិទ្ធនាមជាក្រុមហ៊ុនស្ករឈាម ដោយសារតែមានការរំលោភដីធ្លីរបស់ពលរដ្ឋរហូតដល់មានការបាញ់បង្ក្រាបបណ្តាលឱ្យពលរដ្ឋជាច្រើនរងបួសនោះ៕