កម្មការិនីចំនួន១២នាក់បានរងរបួសធ្ងន់និងស្រាលក្នុងករណីគ្រោះថ្នាក់ចរាចរណ៍រវាងរថយន្តដឹកកម្មករ និងរថយន្តធុនធំមួយគ្រឿងកាលពីព្រឹកមិញ។ ក្នុងចំណោមកម្មការិនីរងគ្រោះទាំងនោះមានកម្មការិនីចំនួន៥រងគ្រោះថ្នាក់ដាច់ដៃម្ខាងក្នុងឧបទ្ទវហេតុនេះផងដែរ។
គេហទំព័ររបស់អគ្គស្នងការនគរបាលជាតិនៅថ្ងៃនេះបានឱ្យដឹងថា គ្រោះថ្នាក់ចរាចរណ៍នេះកើតឡើងនៅចំណុចលើផ្លូវជាតិលេខ៤៤ ស្ថិតក្នុងភូមិខ្នុរអំពិលឃុំវាលពង់ ស្រុកឧដុង្គ ខេត្តកំពង់ស្ពឺ។
ប្រភពដដែលបានលើកឡើងថា ហេតុការណ៍គ្រោះថ្នាក់នេះកើតឡើងក្រោយពេលរថយន្ត១គ្រឿងម៉ាកHyundai ពណ៌ខៀវ បើកបរដឹកកម្មករចំនួន៤៩និងមានស្រី៤៤នាក់ ដែលជាកម្មករធ្វើការនៅរោងចក្រ ចំនួន៣ដែលមានទីតាំងនៅស្រុកកំពង់ត្រឡាច ខេត្តកំពង់ឆ្នាំង។ រថយន្តនេះបើកក្នុងទិសដៅពីលិចទៅកើតហើយបានទៅប៉ះគ្នាជាមួយរថយន្ត១គ្រឿងម៉ាកHinoពណ៌បៃតងចាស់ដែលធ្វើដំណើក្នុងទិសដៅបញ្រ្ចាសទិសគ្នា។
ក្នុងឧបទ្ទវហេតុនោះបណ្តាលឲ្យកម្មការិនីចំនួន១២នាក់រងរបួស ហើយរងរបួសធ្ងន់ចំនួន៨នាក់ស្រី និងដាច់ដៃម្ខាងៗចំនួន៥នាក់ចំណែករបួសស្រាលមានចំនួន៤នាក់។
ប្រភពដដែល បានឲ្យដឹងទៀតថា កម្មការិនីរងគ្រោះទាំងនោះ ត្រូវបានបញ្ជូនទៅសង្គ្រោះនៅតាមមន្ទីរពេទ្យស្ថិតក្នុងស្រុកឧត្ដុង ហើយសមត្ថកិច្ចបានឃាត់ខ្លួនអ្នកបើកបររថយន្តដឹកកម្មកររួចហើយដែរ៕