រដ្ឋាភិបាលអះអាងអំពីករណីផ្ទុះឡើងនៃជំងឺប៉េស្តជ្រូកអាហ្វ្រិកដែលបានកើតឡើងនៅភូមិសោមកានិញ ឃុំសោមធំ ស្រុកអូរយ៉ាដារ ខេត្តរតនគិរី ជាប់ព្រំដែនវៀតណាមព្រមទាំងបានបញ្ជាក់ពីវិធានការទប់ស្កាត់ការ រីករាលដាលនៃជំងឺនេះជាបន្ទាន់ផងដែរ។
ជំងឺនេះបានផ្ទុះឡើងនៅភូមិសោមកានិញ ទៅលើប្រភេទជ្រូកកណ្តុររបស់ពលរដ្ឋ កាលពីថ្ងៃទី២២មីនា ដោយមកទល់ពេលនេះបណ្តាលឱ្យជ្រូកប្រមាណ៥០០ក្បាលបានងាប់និងបំផ្លាញចោល។
សេចក្តីប្រកាសរបស់ក្រសួងកសិកម្មរុក្ខាប្រមាញ់និងនេសាទកាលពីថ្ងៃទី២មេសាស្តីពីការកំណត់តំបន់ផ្ទុះជំងឺប៉េស្តជ្រូកអាហ្វ្រិកនៅភូមិសោមកានិញ បានណែនាំឱ្យអគ្គនាយកដ្ឋានសុខភាពសត្វ និងផលិតកម្មសត្វ ត្រូវចាត់វិធានការបសុព្យាបាលជាបន្ទាន់នៅតំបន់ផ្ទុះជំងឺប៉េស្តជ្រូកអាហ្វ្រិក។ ក្រសួងបានណែនាំឱ្យស្ថាប័នជំនាញត្រូវបំផ្លាញចោលចំពោះសត្វជ្រូកគ្រប់ប្រភេទក្នុងតំបន់ដែលមានការរីករាលដាលជំងឺនេះថែមទៀត។
ជាងនេះទៅទៀតរដ្ឋាភិបាលក៏បានផ្អាកការទិញ លក់និងដឹកជញ្ជូនសត្វជ្រូកសាច់ជ្រូក និងផលិតផលដែលធ្វើពីសាច់ជ្រូកគ្រប់ប្រភេទចេញ ចូល ឬឆ្លងកាត់តំបន់ផ្ទុះជំងឺក្នុងរង្វង់៣គីឡូម៉េត្រ។
ក្រៅពីនេះក្រសួងបានផ្អាកជាបណ្តោះអាសន្នចំពោះការចិញ្ចឹម ទិញ លក់ និងដឹកជញ្ជូនសត្វជ្រូក សាច់ជ្រូក និង ផលិតផលអំពីសត្វជ្រូកគ្រប់ប្រភេទនៅតំបន់ផ្ទុះជំងឺប៉េស្តជ្រូកអាហ្វ្រិក រហូតដល់មានការប្រកាសជាថ្មី។
សេចក្តីប្រកាសនេះបញ្ជាក់ថា ជំងឺ ប៉េស្តជ្រូកអាហ្វ្រិកមិនឆ្លង និងមិនបង្កផលប៉ះពាល់ដល់មនុស្សទេ ប៉ុន្តែជំងឺនេះបណ្តាលឱ្យជ្រូកឈឺនិងងាប់ក្នុងអត្រាខ្ពស់រហូត១០០ភាគរយដែលបង្កឲ្យមានការខាតបង់ធ្ងន់ធ្ងរដល់អ្នកចិញ្ចឹមជ្រូកតែម្តង។
កាលពីថ្ងៃទី២មេសាដដែលក្រសួងកសិកម្មក៏បានចេញលិខិតមួយជូនអភិបាលខេត្តរតនគិរី ដោយស្នើឱ្យជួយចាត់វិធានការជាបន្ទាន់ទប់ស្កាត់ការរីករាលដាលនៃជំងឺប៉េស្តជ្រូកអាហ្វ្រិកនេះផងដែរ។
លិខិតនេះបញ្ជាក់ថា ជំងឺនេះជាប្រភេទជំងឺកាចសាហាវនិងរីករាលដាលខ្លាំងពីតំបន់មួយទៅតំបន់មួយដែលបណ្តាលឱ្យជ្រូកឈឺ និង ងាប់ក្នុងអត្រាមួយខ្ពស់។
ករណីផ្ទុះជំងឺប៉េស្តជ្រូកអាហ្វ្រិកនៅភូមិសោកានិញជាប់ព្រំដែនវៀតណាមពេលនេះត្រូវបានមន្ត្រីជំនាញសន្និដ្ឋានថា អាចឆ្លងតាមរយៈការនាំសាច់ជ្រូកឆ្លងកាត់ចូលពីប្រទេសវៀតណាម។ ប៉ុន្តែក្រសួងកសិកម្មបញ្ជាក់ថា ក្រៅពីភូមិសោមកានិញ ជំងឺប៉េស្តជ្រូកអាហ្វ្រិកមិនទាន់កើតមាននៅតាមតំបន់ផ្សេងទៀតឡើយ។
កាលពីខែសីហា ឆ្នាំ២០១៨កន្លងទៅជំងឺប៉េស្តជ្រូកអាហ្វ្រិកបានរីករាលដាលក្នុងខេត្ត និងតំបន់ចំនួន២៥នៅប្រទេសចិន ដែលពេលនោះ អាជ្ញាធរចិនបានសម្លាប់ជ្រូកចោលរាប់ម៉ឺនក្បាល។
ក្រោយផ្ទុះជំងឺនេះ អង្គការស្បៀងអាហារ និងកសិកម្មហៅកាត់ថាFAO បានព្រមានថា ជំងឺប៉េស្តជ្រូកអាហ្វ្រិកដែលកើតឡើងនៅប្រទេសចិន អាចរីករាលដាលដល់ប្រទេសផ្សេងទៀតនៅតំបន់អាស៊ី។ ការព្រមាននេះមិនបានយូរប៉ុន្មានផង កាលពីខែកុម្ភៈជំងឺប៉េស្តជ្រូកអាហ្វ្រិក ក៏បានផ្ទុះឡើងនៅប្រទេសវៀតណាមតែម្តង។ អង្គការ FAOឲ្យដឹងថា មេរោគជំងឺនេះធន់ខ្លាំង ហើយអាចរស់នៅបានយូរ ពោលគឺវាអាចស៊ាំនឹងអាកាសធាតុក្តៅខ្លាំង ត្រជាក់ខ្លាំង ហើយមិនតែប៉ុណ្ណោះ វាថែមទាំងអាចរស់នៅបានក្នុងផលិតផលសាច់ជ្រូកក្រៀមផងដែរ៕