31 C
Phnom Penh

លោក​ហ៊ុន សែន​ប្រកាស​លុប​ចោល​គម្រោង​ទិញ​នាវា​ផលិត​អគ្គិសនី​ពី​ប្រទេស​តួកគី​

ដោយ ឌឹ ខេមបូឌា ដេលី

បទវិភាគ

លោក​ហ៊ុន សែន​ប្រកាស​លុបចោល​គម្រោង​ទិញ​នាវា​ផលិត​អគ្គិសនី​ដែល​មាន​កម្លាំង​២០០​មេហ្កាវ៉ាត់​ពី​ប្រទេស​តួកគី​​​បន្ទាប់​ពី​លោក​យល់​ឃើញ​ថា​ ដំណើរ​ការ​នាំ​នាវាពី​ប្រទេស​តួកគី​គឺ​ត្រូវ​ចំណាយ​ពេល​យូរ​ម្យ៉ាង​ទៀត​ដោយសារ​ភាគី​ទាំងពីរ​ មិនត្រូវ​គ្នា​លើ​លក្ខខណ្ឌ​មួយ​ចំនួន​ផង​ដែរ។​

ការ​សម្រេច​របស់​រដ្ឋាភិបាល​លោក​ហ៊ុន សែន​នេះគឺ​ ធ្វើ​ឡើង​ក្នុង​កិច្ច​ប្រជុំ​របស់​គណៈ​រដ្ឋមន្រ្តី ​នៅ​វិមាន​សន្តិភាព​កាលពី​ព្រឹកមិញ។​

កាល​ពី​ថ្ងៃ​ទី​២០​មីនា ​លោក​ហ៊ុន សែន​អះអាង​ថា ​រដ្ឋាភិបាល​របស់​លោក​​នឹង​បញ្ជូន​មន្ត្រី​អគ្គិសនី​របស់​ខ្លួន​ទៅ​ចរចា​នាំ​យក​នាវា​ផ្ទុក​ថាមពល​អគ្គិសនី​ពី​ប្រទេស​តួកគី​ដើម្បី​នាំយក​មក​ដោះស្រាយ​បញ្ហា​កង្វះ​ភ្លើង​ប្រើប្រាស់​នៅ​កម្ពុជា​បច្ចុប្បន្ន។​

នៅខែ​មីនា ​ដដែល​អគ្គិសនី​កម្ពុជា​បាន​ចេញ​សេចក្តី​ប្រកាស​ព័ត៌មាន​មួយ​ថា ​កត្តា​ធ្វើ​ឱ្យ​ខ្វះ​ភ្លើង​អគ្គិសនី​ប្រើ​ប្រាស់ ​រួមមាន​ កំណើន​វិនិយោគ​ទុន​ក្នុង​និង​ក្រៅស្រុក ​ការ​បញ្ចុះ​តម្លៃ​អគ្គិសនី​កាលពី​ខែ​មករា​ អាកាស​ធាតុ​ក្តៅ​ខ្លាំង ​និង​កង្វះ​ទឹក​ខុស​ប្រក្រតី ​ដែល​ធ្វើឱ្យ​តំបន់​វារី​អគ្គិសនី​មួយ​ចំនួន​ផ្គត់ផ្គង់​ថាមពល​អគ្គិសនី​មិន​បាន​ពេញ​លេញ។​

ស្ថាបនិក​អង្គការ​មាតា​ធម្មជាតិ​លោក​Alejandro Gonzalez Davidson​ធ្លាប់​បាន​ផ្តល់​អនុសាសន៍​ថា ​រដ្ឋាភិបាល​គប្បី​វិនិយោគ​អគ្គិសនី​ដែល​ផលិត​ចេញ​ពី​ពន្លឺ​ព្រះ​អាទិត្យ​ គឺ​ប្រព័ន្ធ​សូឡា​វិញ​ ទើប​ជា​ដំណោះ​ស្រាយ​យូរ​អង្វែង​និង​មិនមែន​ជា​ដំណោះ​ស្រាយ​បែប​ប្រជាភិថុត​ដូច​ដែល​រដ្ឋាភិបាល​កំពុង​ដោះស្រាយ​បច្ចុប្បន្ន។​

របាយ​ការណ៍​អង្គការ​ទិន្នន័យ​អភិវឌ្ឍន៍​កម្ពុជា​ឆ្នាំ​២០១៦​ឱ្យ​ដឹង​ថា​ នៅ​កម្ពុជា​មាន​តំបន់​វារី​អគ្គិសនី​កំពុង​ដំណើរ​ការ​ផលិត​អគ្គិសនី​ចំនួន​៨​កន្លែង។ ​ដោយ​ឡែក​មួយ​កន្លែង​កំពុង​សាងសង់​ និង​មាន​៣១​កន្លែង​ទៀត​កំពុង​ស្ថិត​នៅ​ក្នុង​គម្រោង​សិក្សា​នៅ​ឡើយ៕​

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស