កូនប្រុសច្បងលោកនាយករដ្ឋមន្ត្រីហ៊ុន សែននិងជាអគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក លោកហ៊ុន ម៉ាណែតបានដឹកនាំគណៈប្រតិភូកងទ័ពកម្ពុជាទៅបំពេញទស្សនកិច្ចផ្លូវការនៅសហរដ្ឋអាមេរិក។
ការដឹកនាំប្រតិភូកងទ័ពជាលើកដំបូង ទៅកាន់សហរដ្ឋអាមេរិកក្នុងឆ្នាំ២០១៩ ដែលទស្សនកិច្ចនេះធ្វើឡើងចាប់ពីថ្ងៃទី៨ដល់ថ្ងៃ១២ខែមេសាតបតាមការអញ្ជើញរបស់មេបញ្ជាការ នៃបញ្ជាការដ្ឋានប្រតិបត្តិការពិសេសតំបន់ប៉ាស៊ីហ្វិកនៃកងទ័ពសហរដ្ឋអាមេរិកដើម្បីចូលរួមសិក្ខាសាលាអន្តរជាតិស្តីពីប្រតិបត្តិការពិសេស តំបន់ប៉ាស៊ីហ្វិកឈ្មោះ«PASOC 19»។
ក្រៅពីការចូលរួមសិក្ខាសាលានេះ ដំណើរទស្សនកិច្ចនេះ កូនប្រុសលោកហ៊ុន សែនក៏គ្រោងដឹកនាំប្រតិភូរបស់ខ្លួនជួបពិភាក្សាការងារជាមួយមេបញ្ជាការ បញ្ជាការដ្ឋានប្រតិបត្តិការពិសេសតំបន់ប៉ាស៊ីហ្វិកនៃកងទ័ពសហរដ្ឋអាមេរិក ក្នុងគោលបំណងរឹតបណ្តឹងចំណងមិត្តភាពនិងសហប្រតិបត្តិការនៃកងទ័ពប្រទេសទាំងពីរផងដែរ។
ក្នុងដើមឆ្នាំ២០១៩នេះ លោកហ៊ុន ម៉ាណែតបានដឹកនាំមន្ត្រីរបស់ខ្លួនធ្វើទស្សនកិច្ចបែបយោធាទៅកាន់ប្រទេសមហាអំណាចធំៗ ដោយរួមមានមហាអំណាចកុម្មុយនីស្តចិន កាលពីចុងខែកុម្ភៈនិងមហាអំណាចរុស្ស៊ីកាលពីចុងខែមីនានិងទៅកាន់មហាអំណាចលោកសេរីសហរដ្ឋអាមេរិកនៅខែមេសា។
ដំណើរទស្សនកិច្ចរបស់កូនប្រុសច្បងលោកហ៊ុន សែនទៅប្រទេសមហាអំណាចធំៗពេលនេះ ត្រូវបានគេមើលឃើញថា កំពុងដើរតួនាទីស្វែងរកកិច្ចគាំទ្រផ្នែកការទូតលើវិស័យយោធានិងស្ទង់ស្ទាបជំហររបស់ប្រទេសមហាអំណាចដើម្បីឈានទៅកាន់អំណាចត្រកូលហ៊ុន តាមការគូសវាសរបស់លោកហ៊ុន សែន។
កន្លងមក លោកហ៊ុន សែនក៏ធ្លាប់បានបង្ហើបឱ្យដឹងថា កូនប្រុសច្បងរបស់គាត់គឺលោកហ៊ុន ម៉ាណែតនឹងអាចមានវាសនាក្លាយជានាយករដ្ឋមន្ត្រីបន្តពីលោកទៀតផង។
ក្រុមអ្នករិះគន់និយាយថា ប្រសិនបើលោកហ៊ុន សែនលើកបន្តុបឲ្យលោកហ៊ុន ម៉ាណែតឡើងស្នងតំណែងមែននោះ កម្ពុជាក៏មិនខុសគ្នាពីការដឹកនាំរបស់ប្រទេសកូរ៉េខាងជើងនោះដែរ៕