លោកអ្នកនាងជាទីមេត្រី! ថ្ងៃចូលឆ្នាំខ្មែរ ឆ្នាំថ្មី ឆ្លងពីឆ្នាំចរ ចូលឆ្នាំកុរ ឬ កោរក្នុងឆ្នាំនេះត្រូវចំថ្ងៃអាទិត្យទី១៤មេសាហើយទេវតានឹងយាងចុះមកនៅវេលាម៉ោង៣:១២នាទីរសៀល។ ទេវតាឆ្នាំនេះជាទេវរាជបុត្រីច្បងរបស់កបិលមហាព្រហ្មមានព្រះនាមថា ទុង្សាទេវី។
ទ្រង់គ្រងស្នៀតផ្កាទទឹមមានគ្រឿងប្រដាប់សោយហៅថា បទុមរាគភក្សាហារឬប្រែថា ម្ហូបអាហារជាផ្លែឧទុម្ពរ ឬផ្លែល្វាពណ៌ទទឹម អាវុធខាងព្រះហស្តស្តាំជាកងចក្រ ខាងព្រះហស្តឆ្វេងជាស័ង្ខ ឬខ្សងសមុទ្រពណ៌ស ហើយទ្រង់គង់លើសត្វគ្រុឌជារាជរថ។
កម្ពុជាមានថ្ងៃបុណ្យឈប់សម្រាកក្នុងមួយឆ្នាំចំនួន២២ដងរួមទាំងថ្ងៃបុណ្យចូលឆ្នាំខ្មែរ។ គេសង្ឃឹមថា ពលរដ្ឋខ្មែរជាមនុស្សចិត្តបុណ្យចិត្តទាន ពោរពេញដោយសប្បុរសធម៌ និងមនុស្សធម៌។ ផ្ទុយទៅវិញ មានភាគតិចបំផុត នេះបើតាមការស្រាវជ្រាវមួយ។
អង្គការអង់គ្លេសមួយឈ្មោះ Charity Aid Foundationឬ មូលនិធិជំនួយស្បុរសធម៌បានផ្សាយម្តងម្កាលនូវការស្រាវជ្រាវអំពីទឹកចិត្តសប្បុរស និង មនុស្សធម៌នៃប្រជាជាតិនិមួយៗក្នុងប្រទេសចំនួន១៤៦ក្នុងពិភពលោកដោយសាកសួរមនុស្សរាប់ពាន់នាក់ក្នុងប្រទេសនិមួយៗ ដើម្បីចង់ដឹងថា តើពលរដ្ឋប្រទេសណាមានចិត្តសប្បុរស បរិច្ចាគទាន ញឹកញាប់ច្រើនជាងគេ។
អង្គការនេះសាកសួរជាតិសាសន៍ក្នុងប្រទេសសេរី ប្រជាធិបតេយ្យក៏ដូចជាប្រទេសកុម្មុយនិស្ត និងផ្តាច់ការ៣សំណួរទាក់ទងនឹងសន្តានចិត្តសប្បុរស៖ ទី១ ជួយមនុស្សមិនដែលស្គាល់គ្នា ពេលគេត្រូវការអ្វីមួយ។ ទី២បរិច្ចាគទានដល់អង្គការមនុស្សធម៌។ទី៣ ស្ម័គ្រចិត្តចំណាយពេលវេលាជួយអង្គការណាមួយ។
តាមសេចក្តីរាយការណ៍សម្រាប់ឆ្នាំ២០១៨ ផ្សាយកាលពីខែតុលា ឆ្នាំ២០១៨ កន្លងទៅ កម្ពុជាជាប់លំដាប់ថ្នាក់លេខ១៤០ តាមពិន្ទុសរុបលើចំណុចទាំង៣។ លើចំណុចទាំង៣ដូចគ្នា គឺជួយមនុស្សមិនដែលស្គាល់គ្នា ពេលគេត្រូវការពឹងពាក់ បរិច្ចាគទានដល់អង្គការមនុស្សធម៌ ស្ម័គ្រចិត្តចំណាយពេលជួយអង្គការណាមួយ ប្រទេសឥណ្ឌូនេស៊ី ជាប់លំដាប់ថ្នាក់លេខ១ក្នុងពិភពលោក។
លំដាប់ថ្នាក់ខាងជួយមនុស្សមិនដែលស្គាល់គ្នា ពេលមានទុក្ខត្រូវការពឹងពាក់ ប្រទេសកម្ពុជាជាប់លេខ១៤៤។ ខាង បរិច្ចាគទានដល់អង្គការមនុស្សធម៌ កម្ពុជាជាប់លេខ៥៥ហើយខាង ស្ម័គ្រចិត្តចំណាយពេលជួយអង្គការណាមួយ កម្ពុជាជាប់លេខ១៤២ក្នុងចំណោមប្រទេសចំនួន១៤៦។ ក្នុងសហគមន៍អាស៊ាន ដែលមានប្រទេស១០៖ លេខ១ ឥណ្ឌូនេស៊ី លេខ២សិង្ហបុរី លេខ៣ភូមា លេខ៤ថៃ លេខ៥ ហ្វីលីពីន លេខ៦លាវ លេខ៧កម្ពុជា។ ប្រទេសម៉ាឡេស៊ីគ្មានស្ថិតិក្នុងឆ្នាំ២០១៨។ ប្រទេសវៀតណាមនិងប្រ៊ុយណេ គ្មានលំដាប់ថា្នក់លេខប៉ុន្មានឡើយ។
ខ្លឹមសារនៃការស្រាវជ្រាវនេះសំដៅសម្គាល់កត់ត្រាទុកអំពីប្រជាជាតិ ចិត្តសប្បុរសបំផុត ប្រជាជាតិចិត្តមិនសូវសប្បុរស និង ប្រជាជាតិចិត្តអសប្បុរស ឬកំណាញ់គឺពីលេខ១ដល់លេខ១៤៦។ វាបញ្ជាក់ថា តើ មនុស្សចេះយល់ ចេះស្គាល់ទុក្ខធុរៈ ឬ មិនចេះយល់ មិនស្គាល់ទុក្ខ ធុរៈអ្នកដទៃ គិតឬមិនគិតតែប្រយោជន៍ផ្ទាល់ខ្លួន គ្រួ សារ បក្ស និង ពួក
ខ្លួន។ គេអាចវិនិច្ឆ័យឲ្យតម្លៃប្រជាជាតិមួយតាមរយៈសេចក្តីរាយការណ៍នោះ។ ចំពោះពលរដ្ឋខ្មែរជាពុទ្ធសាសនិកជន សេចក្តីរាយការណ៍នោះអាចធ្វើឲ្យជាតិយើងអាប់ឱន អាម៉ាស់ក្នុងសកលលោក៕