កម្លាំងស្នងការដ្ឋាននគរបាលរាជធានីភ្នំពេញបានចូលទៅបង្ក្រាប ទីតាំងក្លិបកម្សាន្តមួយកន្លែងឈ្មោះ MAIAMI ដោយរកឃើញថា ជាទីតាំង ផលិត និងចែកចាយថ្នាំញៀនដ៏ធំមួយទៀត បន្ទាប់ពីមណ្ឌលកម្សាន្តRock។
គេហទំព័រអគ្គស្នងការនគរបាលជាតិនៅថ្ងៃនេះបានបញ្ជាក់ថាក្នុងការបង្ក្រាប ក្លិបកម្សាន្តMAIAMIស្ថិតក្នុង សង្កាត់បឹង កេងកងទី១ ខណ្ឌចំការមន រាជធានីភ្នំពេញសមត្ថកិច្ចបានឃាត់ខ្លួន មនុស្សចំនួន៥០នាក់ក្នុងនោះស្រី១២នាក់ រួមទាំងម៉ាស៊ីនផលិត គ្រឿងញៀននិងគ្រឿងញៀនមួយចំនួនធំ កាលពីពេលទាបភ្លឺ ឈានចូលថ្ងៃទី១១ខែមេសា។ការបង្ក្រាប នេះដឹកនាំកម្លាំងដោយស្នងការនគរបាលក្រុងភ្នំពេញលោកស ថេតផ្ទាល់។
លោកស ថេតថា ប្រតិបត្តិការនេះបានធ្វើឡើងដោយមានការអនុញ្ញាតពីលោក លី សុផាន់ណា ព្រះរាជអាជ្ញារងនៃសាលាដំបូងរាជធានីភ្នំពេញផងដែរ។ កាលពីខែកុម្ភៈ សមត្ថកិច្ចបានបង្ក្រាបទីតាំងមណ្ឌលកម្សាន្ត Rockរបស់លោកឧកញ៉ាគិត ធាងបងប្រុសបង្កើតរបស់លោកឧកញ៉ាគិត ម៉េងដោយរឹបអូសបានគ្រឿងញៀនប្រមាណ៥០គីឡូក្រាម និងឃាត់ខ្លួនមនុស្សប្រុសស្រីជាង៣រយនាក់ ប៉ុន្តែក្រោយមកក៏ដោះលែងទៅវិញ ដោយទុកតែអ្នកពាក់ព័ន្ធជាង១០នាក់។
ក្រោយមក សមត្ថកិច្ចក៏បានឃាត់ខ្លួន លោកឧកញ៉ាគិត ធាងតាមបញ្ជារបស់លោកហ៊ុន សែនផងដែរ។ លោកឧកញ៉ាគិត ធាង ត្រូវបានតុលាការសម្រេចឃុំខ្លួននៅគុកPJ ដោយចោទប្រកាន់ពីបទ«ចាត់ចែង សម្រួលឲ្យមានការប្រើប្រាស់ដោយខុសច្បាប់នូវសារជាតិញៀន និងបទសមគំនិត» ដែលប្រព្រឹត្តនៅមណ្ឌលកម្សាន្តRockកាលពីថ្ងៃទី២៣ខែកុម្ភៈឆ្នាំ២០១៩។ប៉ុន្តែថ្មីៗនេះ សារព័ត៌មានក្នុងស្រុកមួយចំនួនបានរាយការណ៍ថា លោកគិត ធាងបានមកសម្រាកនៅមន្ទីរពេទរុស្ស៊ី ក្រោមហេតុផលថា មានជំងឺ។
បញ្ហានេះត្រូវបានសាធារណជនរិះគន់ថា ឱ្យតែក្រុមអ្នកមានប្រាក់មានអំណាច ដេកគុកមិនសូវបានយូរទេ ដោយយកលេសមកព្យាបាលជំងឺ ខុសគ្នាស្រឡះពីវាសនាក្រុមជនក្រីក្រ និងក្រុមសកម្មជនសិទ្ធិមនុស្ស សកម្មជនដីធ្លី និងអ្នកនយោបាយបក្សប្រឆាំងជាដើម ដោយត្រូវដេកគុក បើទោះបីជាពេលខ្លះពួកគេមានជំងឺធ្ងន់ក៏ដោយ៕