លោកហ៊ុន សែននៅថ្ងៃអង្គារនេះអះអាងថា សន្តិភាពបានធ្វើឱ្យកម្ពុជាកាន់តែរីកចម្រើនលូតលាស់ទៅមុខជានិច្ច ហើយអាចឲ្យជនរួមជាតិប្រារព្ធពិធីបុណ្យតូចធំនៅក្នុងប្រទេសដោយគ្មានការភ័យខ្លាច។
លោកហ៊ុន សែនបានសរសេរនៅលើទំព័រFacebook របស់លោកដោយអំពាវនាវឲ្យអាជ្ញាធរ និងសមត្ថកិច្ចយកចិត្តទុកដាក់ជួយសម្រួល និងពង្រឹងសន្តិសុខសណ្តាប់ធ្នាប់ឱ្យបានល្អដើម្បីធានាសុវត្ថិភាពជូន ពលរដ្ឋ និងភ្ញៀវទេសចរបរទេសដែលបានមកកម្សាន្តសប្បាយនៅគ្រប់ទីកន្លែង នាឱកាសបុណ្យចូលឆ្នាំថ្មីនេះ។
ប៉ុន្តែអ្នកវិភាគឯករាជ្យលោកគឹម សុខដែលកំពុងរស់នៅនីរទេសក្នុងប្រទេសហ្វាំងឡង់អះអាងថា ហេតុអ្វីដែលលោកហ៊ុន សែនដឹងថា ពលរដ្ឋមិនភ័យខ្លាច។ លោកបានចោទជាសំណួរថា តើលោកហ៊ុន សែនបានធ្វើប្រជាមតិដែរទេដែលថា ពលរដ្ឋគ្មានការភ័យខ្លាចនោះ?លោកបន្តថា ពលរដ្ឋនៅតែមានការភ័យខ្លាចដោយសារលោកហ៊ុន សែនកំពុងដឹកនាំប្រទេសតាមបែបកុម្មុយនីស្តផ្តាច់ការកាន់តែខ្លាំង។
លោកគឹម សុខអះអាងថា ពលរដ្ឋនៅតែមានការភ័យខ្លាចដោយសារ លោកហ៊ុន សែនមិនគោរពគោលការណ៍ជាអន្តរជាតិដែលអាចនាំឲ្យលោកហ៊ុន សែនដឹកនាំឆ្ពោះទៅរករបបដឹកនាំបែបយោធានិយម ហើយប្រឈមនឹងការដាក់ទណ្ឌកម្មអន្តរជាតិដែលនាំឲ្យពួកគាត់បាត់បង់ចំណូល ជំពាក់ធនាគារកាន់តែខ្លាំង និងការភ័យខ្លាចក្នុងការធ្វើ ចំណាកស្រុកទៅធ្វើការនៅក្រៅប្រទេស។
លោកបន្តថា ពលរដ្ឋកាន់តែមានការភ័យខ្លាចខ្លាំងជាងមុនទៅទៀតនៅពេលដែលប្រទេសវៀតណាម និងប្រទេសចិនកំពុងប្រើនយោបាយហែកយកប្រយោជន៍ពីប្រទេសកម្ពុជាតាមរយៈឥទ្ធិពលដែលអាចប្រមូលយកបាន៕