ភរិយារបស់លោករ៉ាត់ រត្នមុនី ដែលជាអ្នកបកប្រែឲ្យខ្សែភាពយន្តឯកសារ«ម្តាយខ្ញុំលក់ខ្ញុំ»គឺអ្នកស្រីឡុង គឹមហ៊ាងអះអាងថា ក្រុមរបស់អ្នកស្រីនឹងមិនធ្វើបាតុកម្មខាងមុខស្ថានទូតរុស្ស៊ីនៅថ្ងៃពុធស្អែកនេះទេដោយសារអ្នកស្រីជាប់រវល់មកភូមិកំណើតក្នុងថ្ងៃបុណ្យចូលឆ្នាំខ្មែរ។
អ្នកស្រីឡុង គឹមហ៊ាងបានប្រាប់សារព័ត៌មាន The Cambodia Dailyនៅមុនការផ្សាយនេះបន្តិចថា ក្រោយបុណ្យចូលឆ្នាំខ្មែររួចអ្នកស្រី នឹងបន្តធ្វើបាតុកម្មដូចធម្មតា រហូតដល់ស្ថានទូតមួយនេះអន្តរាគមន៍ដោះលែងប្តីរបស់អ្នកស្រីឲ្យមានសេរីភាពឡើងវិញ។
មេដឹកនាំសហព័ន្ធសហជីពសំណង់កម្ពុជាលោករ៉ាត់ រត្នមុនីត្រូវបានសមត្ថកិច្ចថៃចាប់ខ្លួន និងបញ្ជូនខ្លួនមកឲ្យអាជ្ញាធរកម្ពុជា កាលពីថ្ងៃទី១៣ខែធ្នូឆ្នាំ២០១៨កន្លងទៅ ពាក់ព័ន្ធនឹងការចូលរួមផលិតខ្សែភាពយន្តឯកសារ«ម្ដាយខ្ញុំលក់ខ្ញុំ»របស់បណ្តាញព័ត៌មានRussia Today ដែលនិយាយអំពីខ្សែជីវិតពិតរបស់ស្ត្រីនិងម្តាយនៅកម្ពុជាមួយចំនួនបានលក់កូនស្រីរបស់ខ្លួនឲ្យបម្រើផ្លូវភេទដើម្បីជីវភាពរស់នៅរបស់ពួកគេ។ លោករ៉ាត់ រត្នមុនីត្រូវបានតុលាការរាជធានីភ្នំពេញចោទប្រកាន់ពីបទញុះញង់ធ្វើឲ្យមានការរើសអើងហើយត្រូវ បានបញ្ជូនទៅឃុំខ្លួននៅពន្ធនាគារព្រៃស៕