លោកហ៊ុន សែននៅថ្ងៃព្រហស្បតិ៍នេះ បានជំរុញបន្ថែមទៀតឱ្យមានចលនាកៀរគរប្រមូលប្រភពធនធាន ឈានទៅអនុវត្តការងារប្រយុទ្ធប្រឆាំងនឹងជំងឺគ្រុនចាញ់ឱ្យកាន់តែមានសកម្មភាពខ្លាំងក្លា ដើម្បីឆ្ពោះទៅលុបបំបាត់ជំងឺនេះឲ្យបានតាមផែនការកំណត់។
ក្នុងលិខិតមួយរបស់លោកហ៊ុន សែន ដែលជាការថ្លែងសារសម្រាប់ទិវាជាតិប្រយុទ្ធនឹងជំងឺគ្រុនចាញ់ និងទិវាគ្រុនចាញ់ពិភពលោកដែលនឹងប្រព្រឹត្តទៅនៅថ្ងៃទី២៥ខែមេសាឆ្នាំ២០១៩ ក្រោមប្រធានបទ «គ្មានជំងឺគ្រុនបាញ់ផ្ដើមចេញពីខ្ញុំ»បានលើកឡើងថា ការងារប្រយុទ្ធប្រឆាំងនឹងជំងឺគ្រុនចាញ់របស់កម្ពុជាកាន់តែមានប្រសិទ្ធភាពខ្ពស់ ពីព្រោះអត្រាអ្នកកើតជំងឺគ្រុនចាញ់នៅក្នុងប្រទេសកម្ពុជាបានថយចុះជាបន្តបន្ទាប់ពីមួយឆ្នាំទៅមួយឆ្នាំ។
យ៉ាងនេះក្តី ប្រមុខដឹកនាំរដ្ឋាភិបាលលោកហ៊ុន សែនបានលើកឡើងថា ទោះបីជាអត្រាជំងឺគ្រុនចាញ់កាន់តែថយចុះជាបន្តបន្ទាប់ក្តី ប៉ុន្តែគេមិនត្រូវភ្លេចខ្លួនស្កប់ស្កល់នឹងលទ្ធផលដែលទទួលបាននោះទេ ពីព្រោះជំងឺនេះនៅតែជាបន្ទុកដ៏ធ្ងន់មួយរបស់កម្ពុជា។
លោកថា បើមិនទាន់លុបបំបាត់មេរោគគ្រុនចាញ់ឱ្យអស់ពីក្នុងខ្លួនមនុស្សគ្រប់ៗរូបទេ នោះសត្វមូសដែកគោលញីនៅតែបន្តមាននៅក្នុងព្រៃ និងតំបន់ជុំវិញដើម្បីបឺតឈាមចម្លងមេរោគគ្រុនចាញ់ ពីមនុស្សម្នាក់ទៅមនុស្សម្នាក់ និងពីសហគមន៍មួយទៅសហគមន៍មួយ។
លោកហ៊ុន សែនបានជំរុញឲ្យស្ថាប័នពាក់ព័ន្ធរួមនឹងពលរដ្ឋផង ត្រូវយកចិត្តទុកដាក់ខ្ពស់ទាំងអស់គ្នាដើម្បីលើកកម្ពស់សុខភាព គុណភាពនៃការរស់នៅនិងសេចក្តីថ្លៃថ្នូររបស់ពលរដ្ឋ។
លិខិតរបស់លោកហ៊ុន សែនបានលើកឡើងអំពីរបាយការណ៍ប្រចាំឆ្នាំ នៃសេវាសុខាភិបាលសាធារណៈរបស់កម្មវិធីជាតិប្រយុទ្ធនឹងជំងឺគ្រុនចាញ់របស់ក្រសួងសុខាភិបាលដែលបង្ហាញថា អត្រាជំងឺគ្រុនចាញ់នៅកម្ពុជាមកទល់ឆ្នាំ២០១៨បានថយចុះ៨៥%។ ក្នុងនោះករណីស្លាប់បានកាត់បន្ថយ៩៩%បន្ទាប់ពីបានអនុវត្តផែនការយុទ្ធសាស្ត្រជាតិ លុបបំបាត់ជំងឺគ្រុនចាញ់២០១១-២០២៥៕