តម្លៃកៅស៊ូកម្ពុជានាំចេញនៅតែបន្តធ្លាក់ចុះ ខណៈទីផ្សារកៅស៊ូអន្តរជាតិនៅតែធ្លាក់ចុះដដែល។
របាយការណ៍របស់ អគ្គនាយកដ្ឋានកៅស៊ូនៃក្រសួងកសិកម្មបង្ហាញថា តម្លៃនៅតែបន្តធ្លាក់ចុះ ប៉ុន្តែការនាំកៅស៊ូចេញកម្ពុជាបានកើនឡើង២៣% នៅត្រីមាសទី១ ឆ្នាំនេះ ធៀបនឹងរយៈពេលដូចគ្នាកាលពីឆ្នាំ២០១៨។
ទិន្នន័យរបស់ក្រសួងកសិកម្មបង្ហាញទៀតថា កម្ពុជាបាននាំកៅស៊ូចេញជិត៥ម៉ឺនតោនដែលតម្លៃជាមធ្យម១២៧៩ដុល្លារក្នុង១តោន។
អ្នកជំនាញព្រួយបារម្ភថា ការបន្តធ្លាក់ថ្លៃនៃតម្លៃជ័រកៅស៊ូនេះធ្វើឲ្យប៉ះពាល់កាន់តែធ្ងន់ធ្ងរដល់ក្រុមហ៊ុន និងកសិករដាំកៅស៊ូ។
អស់រយៈប្រមាណ១០ឆ្នាំមកហើយដែលទីផ្សារកៅស៊ូធ្លាក់ថ្លៃ។ បញ្ហានេះធ្វើកសិករឬម្ចាស់ចម្ការកៅស៊ូមួយចំនួនបង្ខំចិត្តកាប់ដើមកៅស៊ូចោល និងដាំដំណាំផ្សេងជំនួសវិញ។
កាលពីសប្ដាហ៍មុន ក្រុមប្រឹក្សាអភិវឌ្ឍន៍កម្ពុជា(CDC)ឲ្យដឹងថា ខ្លួនបានអនុម័តគម្រោងបង្កើតរោងចក្រកែច្នៃជ័រកៅស៊ូមានតម្លៃ២,៧លានដុល្លារនៅខេត្តត្បូងឃ្មុំ៕