34 C
Phnom Penh

សមត្ថ​កិច្ច​សម្រេច​បញ្ជូន​អតីត​សមាជិក​ក្រុម​ប្រឹក្សា​ខេត្ត​ត្បូង​ឃ្មុំ​គណបក្ស​សង្រ្គោះ​ជាតិ​ម្នាក់​ទៅ​តុលាការ​

ដោយ ឌឹ ខេមបូឌា ដេលី

បទវិភាគ

សមត្ថ​កិច្ច​ខេត្ត​ត្បូងឃ្មុំ​សម្រេច​បញ្ជូន​ខ្លួន​អតីត​សមាជិក​ក្រុម​ប្រឹក្សា​ខេត្ត​និង​ជា​អតីត​អនុ​ប្រធាន​ប្រតិបត្តិ​គណបក្ស​សង្រ្គោះ​ជាតិ​ខេត្ត​ត្បូង​ឃ្មុំ ​ទៅ​តុលាការ​នៅ​ព្រឹកមិញ​នេះ​បន្ទាប់​ពីពួក​គេ​បាន​សាកសួរ​និង​បញ្ចប់​ការ​កសាង​សំណុំ​រឿង​ជុំវិញ​បទ​ញុះញង់​ឱ្យ​ប្រព្រឹត្ត​បទ​ល្មើស​ តាម​បណ្តឹង​របស់​អ្នក​គាំទ្រ ​លោក​ហ៊ុន សែន។​

សារ​ព័ត៌មាន​សំឡេង​ប្រជា​ធិបតេយ្យ ​VOD​បាន​ដក​ស្រង់​សម្តី​របស់​ ស្នងការ​រង​ទទួល​បន្ទុក​ព្រហ្ម​ទណ្ឌ​កម្រិតធ្ងន់​ខេត្ត​ត្បូង​ឃ្មុំ​លោក​ចក់ សុខកៅ​ចុះផ្សាយ​ថា ​សមត្ថ​កិច្ច​បាន​បញ្ជូន​លោក​ស៊ូ យាន​ ដែល​ជា​អតីត​មន្ត្រី​បក្ស​ប្រឆាំង​ទៅ​តុលាការ​កាលពី​ព្រឹកមិញ​នេះ​ប៉ុន្តែ​លោក​មិន​ទាន់​ដឹង​ថា​ តុលាការ​សម្រេច​ចោទ​ប្រកាន់​ និង​ឃុំ​ខ្លួន​លោក​ស៊ូ យាន​ នៅ​ឡើយ​ទេ។​ លោក​ស៊ូ យាន​គឺជា​អតីត​អនុ​ប្រធាន​ទី១​ គណៈ​កម្មការ​ប្រតិបត្តិ​គណបក្ស​សង្រ្គោះ​ជាតិ​និង​ជា​អតីត​សមាជិក​ក្រុម​ប្រឹក្សា​ខេត្ត​ត្បូង​ឃ្មុំ​បក្ស​ប្រឆាំង​មួយ​នេះ។​

លោក​ត្រូវ​បាន​សមត្ថ​កិច្ច​ខេត្ត​នេះ ​ចាប់​ខ្លួន​កាលពី​រសៀល​ថ្ងៃ​ម្សិលមិញ​ តាម​ដីកា​បញ្ជា​ឱ្យ​ចូល​ខ្លួន​របស់​ព្រះ​រាជ​អាជ្ញា​អមសាលា​ដំបូង​ខេត្ត​ត្បូង​ឃ្មុំ​លោក​ឡុង ហុកម៉េង​ដើម្បី​សាកសួរ​តាម​បណ្តឹង​ព្រហ្មទណ្ឌ ​ពីបទ​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជាអាទិ៍​ដោយមាន​ដើម​បណ្តឹង​ចំនួន​២៥​នាក់​មកពី​ខេត្ត​ចំនួន​៤ ​ដែល​យក​ភស្តុតាង​ពី​ប្រអប់​សារ​ឬ ​Messenger​ឯកជន​របស់​គណនី​ហ្វេសប៊ុក​ឈ្មោះ​SU Yean កាល​ពី​ថ្ងៃ​ទី​២០​ មេសា។​

សារ​ជេរ​ប្រមាថ​នៅ​ក្នុង​ប្រអប់​សារ​ឯកជន​គណនី​ហ្វេសប៊ុក​ឈ្មោះ ​ស៊ូ យាន​នោះ​មាន​អត្ថន័យ​ថា៖​«ហ៊ុន សែន​ខ្វាក់​ភ្នែក​តែ​ម្ខាង​ទេ​ ចំណែក​អ្នក​គាំទ្រ​ហ៊ុន សែន​ខ្វាក់​ទាំង​សងខាង​ហើយ​ថែម​ថ្លង់​ទៀត​ផង»។​

ដោយឡែក​ នៅលើ​គណនី​ហ្វេសប៊ុក​របស់​លោក​ស៊ូ យាន​កាលពី​ថ្ងៃ​ទី​២០​មេសា​វិញ​ គឺគេ​មិន​ឃើញ​មាន​ការ​បង្ហោះ​សារ​អ្វី​ដែល​ជា​ការ​ប្រមាថ​នោះ​ទេ ​ប៉ុន្តែ​ឃើញ​តែ​ការ​ចែក​រំលែក​ព្រឹត្តិ​ការណ៍​ព័ត៌មាន​ និង​បទ​អត្ថា​ធិប្បាយ​មួយ​ចំនួន​ ដូច​ជា​ព្រឹត្តិ​ការណ៍​បាតុកម្ម​ភ្លើង​ទៀន​របស់​ក្រុម​អ្នក​ប្រជា​ធិបតេយ្យ​នៅ​ប្រទេស​កូរ៉េ​ខាង​ត្បូង​ជាដើម។​

អ្នក​វិភាគ​នយោបាយ​លោក​គឹម សុខ​ប្រាប់ ​The Cambodia Daily​ថា​ របៀប​ធ្វើ​ទុក្ខ​បុក​ម្នេញ​មន្ត្រី​គណបក្ស​ប្រឆាំង​ជា​បន្ត​បន្ទាប់​ក្នុង​លក្ខខណ្ឌ​ដែល​ពួកគេ​ប្រើ​សេរីភាព​បញ្ចេញ​មតិ​កម្រិត​ហ្នឹង​មិនមែន​ជា​វិធាន​ការ​ផ្លូវ​ច្បាប់​ប្រកប​ដោយ​ភាព​យុត្តិធម៌​ឡើយ។​ លោក​ថា​ ប្រសិន​បើ​ផ្អែក​ទៅ​លើ​ច្បាប់​ដែល​មាន​យុត្តិធម៌​ពិត​ប្រាកដ​ ពិសេស​ស្រប​តាម​ខ្លឹមសារ​នៃ​រដ្ឋ​ធម្មនុញ្ញ ​ដោយ​ចែង​ពី​ភាព​ស្មើគ្នា​ចំពោះ​មុខ​ច្បាប់​ និង​មិន​គិត​អំពី​ឋានៈ​នោះ ​ លោក​ហ៊ុន សែន​ទៅ​វិញ​ទេ ​ដែល​ត្រូវ​ជាប់​ក្តីក្តាំ​រាប់​មិន​អស់​ ជុំវិញ​ការ​បញ្ចេញ​មតិ​នេះ។ ​លោក​គឹម សុខ​បន្ថែម​ថា ​កន្លង​មក​បុរស​ខ្លាំង​នៅ​កម្ពុជា​រូប​នេះ​បាន​និយាយ​ហួស​ពីព្រំដែន​ច្បាប់​ ពិសេស​ការ​បង្ហើប​ពីភាព​សោកស្តាយ​របស់​ខ្លួន​ដែល​មិន​បាន​សម្លាប់​ក្រុម​បក្ស​សង្គ្រោះ​ជាតិ​ទៀត​ផង។​

នៅដើម​ឆ្នាំ​២០១៩​នេះ ​សកម្ម​ភាព​ធ្វើ​ទុក្ខ​បុកម្នេញ​មន្ត្រី​បក្ស​ប្រឆាំង​កើត​ឡើង​ជា​បន្ត​បន្ទាប់។​ សកម្ម​ភាព​តាម​កម្ទេច​ក្រុម​បក្ស​ប្រឆាំង​នៅ​ក្នុង​ប្រទេស​ទាំង​នោះ​កើត​ឡើង​បន្ទាប់​ពី​លោក​ហ៊ុន សែន​បាន​ណែនាំ​ឱ្យ​មន្ត្រី​ក្រោម​បង្គាប់​របស់​ខ្លួន​ទាំង​អស់​តាម​កម្ទេច​ក្រុម​នេះ​មិនឱ្យ​រស់​ឡើង​វិញ​ឡើយ​ ដោយ​យក​លេស​នៃ​ការ​ដាក់​ទណ្ឌកម្ម​សេដ្ឋ​កិច្ច​របស់​អន្តរ​ជាតិ​ ទៅ​បំផ្លាញ​ជីវិត​នយោបាយ​របស់​បក្ស​សង្គ្រោះ​ជាតិ​នៅ​ក្នុង​ស្រុក​ឱ្យ​រលាយ​សាប​សូន្យ​ទាំង​ស្រុង​តែ​ម្តង៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស