អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សប្រចាំកម្ពុជាអ្នកស្រីRhona Smith នឹងទៅបំពេញទស្សនកិច្ចនៅកម្ពុជានៅសប្តាហ៍ក្រោយ។ ដំណើរទស្សនកិច្ចនេះមានរយៈពេល១១ថ្ងៃ ដោយចាប់ផ្តើមពីថ្ងៃទី២៩ ខែមេសា ដល់ថ្ងៃទី៩ ខែឧសភា។
សេចក្តីជូនដំណឹងរបស់អង្គការសហប្រជាជាតិទទួលបន្ទុកសិទ្ធិមនុស្ស កាលពីថ្ងៃម្សិលមិញឱ្យដឹងថា ក្នុងដំណើរទស្សនកិច្ចនេះ អ្នកស្រី រ៉ូណា ស្មីតនឹងផ្តោតបេសកកម្មស្តីពីស្ថានភាពសិទ្ធិមនុស្សនាពេលបច្ចុប្បន្ន និងតាមដានអំពីការវិវត្ត នានាចាប់តាំងពីបេសកកម្មរបស់អ្នកស្រីកាលពីខែវិច្ឆិកាកន្លងមក។
ប្រភពដដែលឲ្យដឹងទៀតថា អ្នកស្រីរ៉ូណា ស្មីតមានបំណងបន្តការពិនិត្យទៅលើវិស័យសិទ្ធិមនុស្ស ទាក់ទងនឹងគោលដៅអភិវឌ្ឍន៍ប្រកបដោយចិរភាព ដោយពិនិត្យជាពិសេសទៅលើការមិនរើសអើង និងសមភាព ព្រមទាំងការចូលរួមប្រកបដោយគណនេយ្យភាពផងដែរ។
ក្នុងដំណើរទស្សនកិច្ចរយៈពេល១១ថ្ងៃនេះ អ្នកស្រីរ៉ូណា ស្មីតគ្រោងនឹងជួបជាមួយមន្ត្រីជាន់ខ្ពស់រាជរដ្ឋាភិបាល តំណាងអង្គការសង្គមស៊ីវិល និងសមាជិកសហគមន៍ការទូតនានា ព្រមទាំងការចុះប្រមូលព័ត៌មានដោយផ្ទាល់នៅតាមតំបន់ផ្សេងៗ ប៉ុន្តែក្នុងលិខិតនេះមិនបានលើកឡើងពីគម្រោងជួបជាមួយប្រធានគណបក្សសង្រ្គោះជាតិលោកកឹម សុខាដែលកំពុងជាប់ឃុំក្នុងផ្ទះនោះទេ។
ដំណើរទស្សនកិច្ចនេះធ្វើឡើងនៅចំពេលដែលស្ថានភាពនយោបាយនៅកម្ពុជាកាន់តែអាក្រក់ទៅៗ ក្រោយពេលការធ្វើទុក្ខបុកម្នេញមន្ត្រីបក្សប្រឆាំងនៅក្នុងប្រទេសឥតឈប់ឈរ ជាពិសេសករណីចាប់ខ្លួនមន្ត្រីគណបក្សសង្រ្គោះជាតិថ្នាក់មូលដ្ឋានជាបន្តបន្ទាប់ ក្រោយពេលពួកគេធ្វើការរិះគន់រដ្ឋាភិបាល។
ក្រោយពេលបញ្ចប់ដំណើរទស្សនកិច្ចរយៈពេលជាង១១ថ្ងៃអ្នករាយការណ៍ពិសេសផ្នែកសិទ្ធិមនុស្សប្រចាំកម្ពុជារូបនេះនឹងធ្វើសន្និសីទសារព័ត៌មានស្តីពីលទ្ធផលស្រាវជ្រាវបឋមនៅថ្ងៃទី៩ខែឧសភា៕