29 C
Phnom Penh

សមត្ថ​កិច្ច​ថៃ​បាញ់​ពលរដ្ឋ​ខ្មែរ​ឱ្យ​ស្លាប់​ម្នាក់​និង​របួស​ធ្ងន់ម្នាក់​ ក្រោយ​ពេល​ចូល​ទៅ​កាប់​ឈើ​គ្រញូង​នៅ​ទឹក​ដី​ថៃ​

ដោយ ឌឹ ខេមបូឌា ដេលី

បទវិភាគ

ពលរដ្ឋ​នៅ​ខេត្ត​ពោធិ៍សាត់​ចំនួន​ពីរ​នាក់​ត្រូវ​បាន​សមត្ថ​កិច្ច​ថៃ​បាញ់​បណ្តាល​ឱ្យ​ស្លាប់​ម្នាក់​ និង​របួស​ធ្ងន់​ម្នាក់​ ខណៈ​ពួក​គេ​បាន​លួច​ឆ្លង​ដែន​ចូល​ទឹក​ដី​ថៃ​ដើម្បី​កាប់​ឈើ​គ្រញូង​លក់​ឱ្យ​ឈ្មួញ។​

គេហ​ទំព័រ​របស់​អគ្គស្នងការ​នគរបាល​ជាតិ​នៅ​ថ្ងៃ​នេះ​បញ្ជាក់​ថា​ ហេតុ​ការណ៍​បាញ់​ពលរដ្ឋ​បណ្តាល​ឱ្យ​ស្លាប់​និង​រង​របួស​នេះ​កើត​ឡើង​កាល​ពី​ថ្ងៃ​ទី​២៤​ខែ​មេសា ​ នៅ​ចំណុច​ទល់​មុខ​ច្រក​​៥៦​ ស្ថិត​ក្នុង​ភូមិ​សង្គម​ថ្មី ​ឃុំ​ថ្ម​ដារ​ស្រុក​វាលវែង​ ខេត្ត​ពោធិ៍សាត់។​

ប្រភព​ដដែល​បន្ត​ថា ​​ហេតុ​ការ​ផ្ទុះ​អាវុធ​នោះ​ បណ្ដាល​ឲ្យ​ប្រជា​ពលរដ្ឋ​ខ្មែរ​ម្នាក់​ឈ្មោះ​ម៉ៅ មុំ ​ភេទ​ប្រុស​អាយុ​២៦ឆ្នាំ​បាន​ស្លាប់​ និង​បុរស​ម្នាក់​ទៀត​ឈ្មោះ​អាត វិត​ ភេទ​ប្រុស​អាយុ​២៤​ឆ្នាំ​រង​របួស​ធ្ងន់​  ខណៈ​ពួក​គេ​ទាំង​២​នាក់​នេះ​លួច​ឆ្លង​ដែន​ចូល​ទឹក​ដី​ថៃ​ដើម្បី​រក​កាប់​ឈើ​គ្រញូង។​ ពលរដ្ឋ​ខ្មែរ​ទាំង​ពីរ​នាក់​នេះ​ មាន​ស្រុក​កំណើត​នៅ​ភូមិ​ឃុំ​និង​ស្រុក​ជា​មួយ​គ្នា ​ក្នុង​ខេត្ត​ពោធិ៍សាត់។​

ប្រភព​ដដែល​ឱ្យ​ដឹង​ថា ​ពលរដ្ឋ​ដែល​រង​របួស​ត្រូវ​បាន​កម្លាំង​សមត្ថ​កិច្ច​ថៃ​បញ្ជូន​ទៅ​សង្រ្គោះ​បន្ទាន់។ ​ចំណែក​សាកសព​ពល​រដ្ឋ​ស្លាប់​កំពុង​ស្ថិត​នៅ​ប្រទេស​ថៃ​នៅ​ឡើយ​ ដោយ​សមត្ថ​កិច្ច​កម្ពុជា​និង​ថៃ​កំពុង​សហការ​គ្នា​ធ្វើ​ការងារ​នេះ។​

អគ្គស្នង​ការ​នគរបាល​ជាតិ​បាន​ដក​ស្រង់​ប្រភព​ពី​ពលរដ្ឋ​ថា​  ករណី​សមត្ថ​កិច្ច​ថៃ​បាញ់​សម្លាប់​ពលរដ្ឋ​ខ្មែរ ​ពុំ​មែន​ទើប​តែ​កើត​មាន​​ទេ​ សម្រាប់​ឃុំ​ថ្ម​ដារ​ស្រុក​វាលវែង​ ខេត្ត​ពោធិ៍សាត់​ ប៉ុន្តែ​ករណី​នេះ​ តែង​តែ​កើត​មាន​ជា​ហូរហែ ​កាល​ពី​ពេល​កន្លង​មក​ ដោយ​សារ​តែ​មាន​ចលនា​មេ​ឈ្មួញ​រក​ស៊ី​ឈើ​គ្រញូង​បំផុស​បំផុល​ដល់​ពលរដ្ឋ​ខ្មែរ​ឱ្យ​ឆ្លង​ដែន​ចូល​ទៅ​ទឹក​ដី​ថៃ​ដើម្បីកាប់​ឈើ ​និង​មាន​ការ​ឃុបឃិត​គ្នា​ពី​សំណាក់​សមត្ថ​កិច្ច​ខ្មែរ​នៅ​តាម​ព្រំដែន​តែ​ម្ដង។​

អគ្គស្នង​ការ​នគរបាល​ជាតិ​បាន​ទទួល​សំណូម​ពរ​ពី​ពលរដ្ឋ​ឱ្យ​ស៊ើប​អង្កេត​ករណី​នេះ​និង​ស្រាវ​ជ្រាវ​ឱ្យ​ស៊ី​ជម្រៅ​ទៅ​លើ​មន្ត្រី​កង​កម្លាំង​ការពារ​ព្រំដែន​ឲ្យ​បាន​ល្អិតល្អន់ ​ទើប​អាច​កាត់​បន្ថយ​ភាព​រង​គ្រោះ​ដោយ​សារ​ក្រុម​ឈ្មួញ​ឈើ​ទាំង​នោះ៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស