បុរសម្នាក់អំពាវនាវឱ្យអ្នកស្រីរ៉ូណាស្មីតជួយរកយុត្តិធម៌ដល់កូនដែលស្លាប់នៅពន្ធនាគារខេត្តកំពង់ចាមដោយលោកលើកឡើងថា ករណីកូនរបស់ខ្លួនស្លាប់ដោយអាថ៌កំបាំងនិងស្លាប់ដោយមានស្លាកស្នាមនៃការវាយដំជាច្រើនផងដែរ។
ក្នុងវីដេអូដែលផ្សព្វផ្សាយនៅលើទំព័រហ្វេសប៊ុករបស់អតីតមេបក្សប្រឆាំងកាលពីថ្ងៃម្សិលមិញ ឪពុកលោកទិត្យរ៉នគឺលោកអ៊ាមទិត្យ អាយុ៦២ឆ្នាំបានអំពាវនាវឲ្យអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាអ្នកស្រីរ៉ូណាស្មីតដែលកំពុងធ្វើទស្សនកិច្ចនៅកម្ពុជាជួយរកយុត្តិធម៌ឲ្យគ្រួសារគាត់ និងកូនរបស់គាត់។
ការអំពាវនាវនេះធ្វើឡើងស្របពេលអ្នកស្រីរ៉ូណាស្មីតបានមកបំពេញទស្សនកិច្ចនៅកម្ពុជាចំនួន១១ថ្ងៃដើម្បីពិនិត្យមើល និងប្រមូលរបាយការណ៍នានាស្តីពីស្ថានភាពសិទ្ធិមនុស្សផងដែរ។
លោកអ៊ាមទិត្យអះអាងថា កូនរបស់ខ្លួនត្រូវបានសមត្ថកិច្ចប៉ុស្តិ៍ទួលព្រះឃ្លាំងស្រុកស្ទឹងត្រង់ ខេត្តកំពង់ចាម ចាប់ខ្លួនកាលពីថ្ងៃទី១៥ខែមេសាហើយស្រាប់តែនៅថ្ងៃទី១៨ខែមេសាខាងពន្ធនាគារបានហៅមកប្រាប់សាច់ញាតិលោកថា កូនប្រុសរបស់លោកបានស្លាប់នៅពន្ធនាគារខេត្តកំពង់ចាមទៅហើយ ស្របពេលកូនរបស់លោកគ្មានជំងឺសោះឡើយពីមុនមក។ លោកថាគ្រួសារក៏បានទៅទទួលសពពីពន្ធនាគារនៅថ្ងៃទី១៩ខែមេសា។
រូបភាពសពលោកទិត្យរ៉នបង្ហាញអំពីស្នាមជាំភ្នែក និងបែកលើភ្នែកខាងស្តាំព្រមទាំងស្នាមជាំកនិងនៅខ្នងជាដើម។ឪពុកជនរងគ្រោះក៏បានបញ្ជាក់ថាសពកូនរបស់ខ្លួនក៏បានបាក់កថែមទៀតផង។
ទោះជាយ៉ាងណានៅថ្ងៃនេះព្រះរាជអាជ្ញាអមសាលាដំបូងខេត្តកំពង់ចាមលោកហួតវុទ្ធីបានបំភ្លឺថាជនដែលស្លាប់ក្នុងពន្ធនាគារលោកទិត្យរ៉ននោះជាមនុស្សញៀនស្រាសផឹកមួយថ្ងៃមិនតិចជាងកន្លះលីត្រ អស់រយៈពេល២ឆ្នាំមកហើយចាប់តាំងពីគេបានរត់គេចខ្លួន ដែលបានប្រព្រឹត្តបទល្មើសពីមុនមក។
ព្រះរាជអាជ្ញាបញ្ជាក់ថាលោកបានចេញដីកាបង្គាប់ឲ្យបើកការស៊ើបអង្កេតជាបន្ទាន់បន្ទាប់ពីទទួលបានសេចក្តីរាយការណ៍ថា មានទណ្ឌិតស្លាប់ក្នុងមន្ទីរឃុំឃាំងដោយបានបញ្ជាឲ្យជំនាញចុះទៅស្រាវជ្រាវនិងបញ្ជាក់ពីមូលហេតុស្លាប់របស់បុគ្គលឈ្មោះទិត្យរ៉ននេះ។
ក្រោយការស្រាវជ្រាវ ព្រះរាជអាជ្ញាដដែលសន្និដ្ឋានថា បុគ្គលឈ្មោះទិត្យរ៉ននេះមិនបានស្លាប់ដោយសារឃាតកម្ម ឬអំពើទារុណកម្មណាមួយក្នុងបន្ទប់ឃុំបណ្ដោះអាសន្នឡើយ។ ផ្ទុយទៅវិញលោកថា គឺជាការដួលបោកក្បាលទៅនឹងជ្រុងអាងទឹកក្នុងបន្ទប់ឃុំខ្លួនបណ្តោះអាសន្ន ហើយបណ្តាលឱ្យមានរបួសធ្ងន់ និងរហូតបណ្តាលឱ្យបុរសរូបនេះស្លាប់តែម្តង។
ទោះជាយ៉ាងនេះក្តី អតីតប្រធានគណបក្សសង្គ្រោះជាតិនៅក្រៅប្រទេសលោកសមរង្ស៊ីកាលពីថ្ងៃម្សិលមិញ បានហៅករណីបុរសម្នាក់ស្លាប់ក្នុងពន្ធនាគារនៅខេត្តកំពង់ចាមលោកទិត្យរ៉ននេះថា ជារឿងឃាតកម្មនយោបាយថ្មីមួយទៀតនៅកម្ពុជា។លោកអះអាងថា ជនរងគ្រោះឈ្មោះទិត្យរ៉នអាយុ៣៧ឆ្នាំត្រូវបាននគរបាលធ្វើឃាតថ្ងៃ១៨មេសាឆ្នាំ២០១៩នៅពន្ធនាគារខេត្តកំពង់ចាមឬពន្ធនាគារមាត់ឃ្មង់ ប៉ុន្តែលោកសមរង្ស៊ីមិនបានបង្ហាញភស្តុតាងលម្អិតនៃការស្លាប់នេះដែលពាក់ព័ន្ធឬបង្កពីសមត្ថកិច្ចទេ ហើយលោកក៏មិនបានបង្ហាញថា ករណីនេះពាក់ព័ន្ធឃាតកម្មនយោបាយបែបណាដែរ៕