សមត្ថកិច្ចក្រុងភ្នំពេញបានឃាត់ខ្លួនជនជាតិចិនម្នាក់ក្រោយពេលពួកគេបានរកឃើញគ្រាប់បែកកែច្នៃជាច្រើនគ្រាប់នៅក្នុងកាបូបរបស់បុរសរូបនោះដែលស្ពាយដើរនៅទីសាធារណៈនៅខណ្ឌពោធិ៍សែនជ័យរាជធានីភ្នំពេញដោយសមត្ថកិច្ចសង្ស័យថា ជាការប៉ុនប៉ងបំផ្ទុះនៅផ្ទះមិត្តភក្តិរបស់ខ្លួន។
យ៉ាងនេះក្តីករណីនេះស្នងការនគរបាលរាជធានីភ្នំពេញលោកសថេតបញ្ជាក់លើទំព័រហ្វេសប៊ុករបស់លោកនៅថ្ងៃនេះថាគ្រាប់បែកកែច្នៃទាំងនោះមិនមែនជាគ្រាប់បែកពិតប្រាកដនោះទេ។
លោកបានប្រាប់សាធារណជនថាខាងមន្ត្រីជំនាញបានស្រាវជ្រាវករណីនេះដោយរកឃើញថា គ្រាប់បែកកែច្នៃដែលជនជាតិចិនបម្រុងយកទៅដាក់ផ្ទះមិត្តភក្តិនោះមិនមែនជាគ្រាប់បែកឡើយដោយសារពិនិត្យមើលនៅក្នុងបំពង់ទាំងអស់នោះឃើញសុទ្ធតែខ្សាច់និងមិនមានរំសេវទេ។
បញ្ហាជនជាតិចិននៅកម្ពុជា សង្គមស៊ីវិលនៅតែបង្ហាញក្តីបារម្ភថា មានមួយចំនួនចូលមករស់នៅកម្ពុជាបែបអនាធិបតេយ្យនិងបង្កផលប៉ះពាល់ដល់ម្ចាស់ស្រុកដូចជាបញ្ហាចាប់ជំរិតតាមអ៊ិនធឺណេត ប្លន់ជួញដូរថ្នាំញៀនពេស្យាចារប្រព្រឹត្តល្បែងស៊ីសង់និងបើកបរបង្កគ្រោះថ្នាក់ដល់ពលរដ្ឋខ្មែរជាដើម។
សង្គមស៊ីវិលក៏ស្នើឱ្យមានវិធានការច្បាប់ម៉ឹងម៉ាត់ទៅលើជនអន្តោប្រវេសន៍នៅកម្ពុជាពិសេសជនជាតិចិនដើម្បីធានាសន្តិសុខសុវត្ថិភាពជូនពលរដ្ឋទូទៅ។
របាយការណ៍របស់អគ្គនាយកដ្ឋានអន្តោប្រវេសន៍ក៏បង្ហាញផងដែរថាគិតត្រឹមខែតុលាឆ្នាំ២០១៨ជនជាតិចិនដែលប្រព្រឹត្តខុសច្បាប់នៅកម្ពុជាមានចំនួន៣៧៣នាក់ក្នុងនោះស្រីមាន៦៦នាក់ភាគច្រើនប្រព្រឹត្តបទល្មើស២ប្រភេទគឺបទល្មើសគំរាមជំរិតនិងឆបោកតាមប្រព័ន្ធទូរគមនាគមន៍(VOIP)៕