ពលរដ្ឋខ្មែរក្រោមនៅតែចងចាំអំពីភាពសាហាវឃោរឃៅរបស់ក្រុមកងទ័ពវៀតណាមដែលដឹកនាំដោយមេបញ្ជាការឡេ ឌឹកអាញ់ដែលបានបាញ់សម្លាប់អ្នកស្នេហាជាតិខ្មែរក្រោមជាច្រើននាក់។
លោកទ្រឹង មាណារិនដែលជានាយកផែនការរបស់សហព័ន្ធខ្មែរក្រោមក្នុងរដ្ឋ New Jerseyសហរដ្ឋអាមេរិកបានប្រាប់សារព័ត៌មានThe Cambodia Daily ថា ពលរដ្ឋខ្មែរនៅកាន់ទុក្ខចំពោះការពលីជីវិតរបស់ពលរដ្ឋខ្មែរក្រោមដែលក្រុមយោធារបស់ឡេ ឌឹកអាញ់បាញ់សម្លាប់កាលពីជាង៤០ឆ្នាំមុន។
ឧត្តមសេនីយ៍ឡេ ឌឹកអាញ់ជាមេបញ្ជាការកងទ័ពប្រជាជនវៀតណាម ដែលទទួលខុសត្រូវក្នុងផែនការវាយលុកលុយទន្រ្ទានឈ្លានពាន រំលំរបបខ្មែរក្រហម ហើយយកស្រុកខ្មែរត្រួតត្រាកាន់កាប់ក្នុងឆ្នាំ១៩៧៩បានទទួលមរណភាពដោយជរាភាព កាលពីថ្ងៃទី២២ខែមេសាកន្លងទៅក្នុងអាយុ៩៨ឆ្នាំ។
តាមការចុះផ្សាយក្នុងកាសែតអង់គ្លេស The Guardianនៅថ្ងៃទី៣០មេសា ក្នុងវ័យកុមារ ឡេ ឌឹកអាញ់កើតរោគអុតដែល បណ្តាលឲ្យពិការភ្នែកម្ខាង។ ក្នុងយុវ វ័យ នាសម័យអាណានិគមន៍បារាំងសែសលោករៀនខាងវិស្វកម្ម។
សម័យតស៊ូទាមទារឯករាជ្យពីបារាំងឡេ ឌឹកអាញ់មានឋានៈជាមេបញ្ជាការកងវរសេនាតូច ហើយនៅឆ្នាំ១៩៦២បានឡើងទៅធ្វើការនៅអគ្គសេនាធិការដ្ឋាន ជានាយប្រតិបត្តិការសឹក។ លោកបានបម្រើការក្នុងកងអង្គភាពរបស់ឧត្តមសេ នីយ៍ វ៉ាន់ ទៀង យុងដើម្បីរៀបផែនការវាយលុកផ្តាច់ព្រ័ត្រកាន់កាប់ក្រុងព្រៃនគរ ឆ្នាំ១៩៧៥។
ឧត្តមសេនីយ៍ឡេ ឌឹកអាញ់បញ្ជាកម្លាំងវាយលុកស្រុកខ្មែរនៅថ្ងៃទី២៨ខែធ្នូ១៩៧៨ក្នុងឋានៈជាមេបញ្ជាការយោធភូមិភាគទី៤។
លោកបញ្ជាកងទ័ពត្រួតស្រុកខ្មែរជិត២សែននាក់ ហើយរស់នៅស្រុក ខ្មែររយៈពេល៧ឆ្នាំ។ លោកកម្មាភិបាលជាន់ខ្ពស់ទទួលបន្ទុកកិច្ចការត្រួតត្រា ស្រុកខ្មែរឲ្យការិយាល័យនយោបាយគណៈកម្មាធិការមជ្ឈិមបក្សកុម្មុយនិស្តវៀតណាម គឺលោកឡេ ឌឹកថ។
ក្រោយពីចេញពីស្រុកខ្មែរបន្តិច លោកបានសរសេរកត់ត្រាទុកថា៖ យុទ្ធសម្ព័ន្ធភាពក្នុងចំណោមប្រទេសឥណ្ឌូចិនទាំង៣(វៀតកណាម កម្ពុជាលាវ) ក្លាយជា ច្បាប់នៃការរស់រានជីវិតទៅមុខនិង ការអភិវឌ្ឍសម្រាប់ប្រទេសនីមួយៗដោយឡែកៗពីគ្នា និងប្រទេសទាំង៣រួមគ្នាផងដែរ។ នៅឆ្នាំ១៩៩២ លោកឡើងកាន់តំណែងជាប្រធានាធិបតីហើយនៅឆ្នាំ១៩៩៦លោកមានជម្ងឺស្លាប់មួយចំហៀងខ្លួន៕