រដ្ឋមន្រ្តីក្រសួងយុត្តិធម៌លោកអង្គ វង្សវឌ្ឍនាកំពុងដឹកនាំកិច្ចប្រជុំ ដើម្បីត្រួតពិនិត្យលើសំណើសុំបន្ធូរបន្ថយ និងលើកលែងទោសដល់ទណ្ឌិត សម្រាប់បុណ្យវិសាខបូជានៅថ្ងៃទី៦ខែឧសភាឆ្នាំ២០១៩នេះ ។
កិច្ចប្រជុំនេះធ្វើឡើងក្រោយពីក្រសួងទទួលបាន សំណើពីពន្ធនាគាររាជធានី-ខេត្តចំនួន២២និងមណ្ឌលអប់រំកែប្រែចំនួន៣ ក្នុងការសុំបន្ធូរបន្ថយនិងលើកលែងទោសដល់ទណ្ឌិត ក្នុងបុណ្យវិសាខបូជាខាងមុខ។
របាយការណ៍របស់ក្រសួងយុត្តិធម៌បង្ហាញថា ក្នុងឱកាសបុណ្យវិសាខបូជាខាងមុខនេះ គណៈកម្មការរាជធានី-ខេត្ត ពន្ធនាគាររាជធានី-ខេត្ត និងមណ្ឌលអប់រំកែប្រែ បានធ្វើលិខិតស្នើអនុគ្រោះទោសដល់ទណ្ឌិត សរុប២៥២រូបក្នុងនោះស្រី១៦រូប។
ជាគោលការណ៍ច្បាប់ទណ្ឌិតអាចស្នើសុំឱ្យមានការបន្ធូរបន្ថយ និងលើកលែងទោសបាន ក្នុងលក្ខខណ្ឌដែលទណ្ឌិតនោះបានអនុវត្តទោស២ភាគ៣ ហើយទណ្ឌិតអាចស្នើសុំបានក្នុងពិធីបុណ្យប្រពៃណីជាតិដូចជាពិធីបុណ្យចូលឆ្នាំប្រពៃណីខ្មែរ ពិធីបុណ្យវិសាខបូជា និងពិធីបុណ្យអុំទូកបណ្ដែតប្រទីប សំពះព្រះខែ និងអកអំបុក។ បុណ្យវិសាខបូជានឹងត្រូវ ប្រារព្ធថ្ងៃទី១៨ខែឧសភាខាងមុខ។
ថ្ងៃ១៥កើត ខែពិសាខ គឺជាថ្ងៃមួយដែលពុទ្ធសាសនិកជននៅទូទាំងសកលលោកបាននាំគ្នាប្រារព្ធពិធីបុណ្យដ៏សំខាន់មួយ គឺវិសាខបូជា។ សង្គមស៊ីវិលដែលធ្វើការងារផ្នែកសិទ្ធិមនុស្សស្នើទៅក្រសួងយុត្តិធម៌គួរផ្តល់អាទិភាពដល់ទណ្ឌិតដែលជាប់ឃុំព្រោះបញ្ហាដីធ្លី បញ្ហានយោបាយ និងទណ្ឌិតជាស្រ្តី។
ទាក់ទងទៅនឹងនីតិវិធីនៃការបន្ធូរបន្ថយ និងលើកលែងទោសដល់ទណ្ឌិតនេះ សមត្ថកិច្ចបានពិនិត្យលក្ខណៈសម្បត្តិទណ្ឌិតទាំងនោះរួចហើយនឹងធ្វើសេចក្តីសម្រេចចុងក្រោយដាក់ជូនទៅលោកហ៊ុន សែនសម្រេចជាមុន ហើយបន្ទាប់មកនឹងថ្វាយដល់ព្រះមហាក្សត្រ ដើម្បីសុំលើកលែងទោស និងបន្ធូរបន្ថយទោស៕