ស្របពេលដែលតុលាការខេត្តបាត់ដំបងចេញដីការកោះហៅចៅសង្កាត់អូរចារ កញ្ញាស៊ិន ចាន់ពៅរ៉ូហ្សេតនិងមន្រ្តីគណបក្សសង្គ្រោះជាតិនៅខេត្តនេះជាបន្តបន្ទាប់ឲ្យចូលខ្លួនបំភ្លឺនៅតុលាការជុំវិញសកម្មភាពនយោបាយរបស់ពួកគេ។
តំណាងរាស្រ្តគណបក្សសង្គ្រោះជាតិលោកសួន សូរីដា បានសរសេរលើហ្វេសប៊ុករបស់លោកថ្ងៃទី៧ខែឧសភានេះ ដោយបបួលលោកហ៊ុន សែនភ្នាល់ជាមួយលោក។ លោកបន្តថា តុលាការលោកហ៊ុន សែនមិនហ៊ានចាប់កញ្ញាស៊ិន ចាន់ពៅរ៉ូហ្សិតទេ នៅដែលពេលតុលាការដំបូងខេត្តបាត់ដំបងកោះហៅ ពីថ្ងៃ៩ដល់ថ្ងៃ១៦ឧសភា២០១៩ខាងមុខនេះ។
លោកអះអាងថា ប្រសិនបើលោកហ៊ុន សែនចាញ់ នោះលោកហ៊ុន សែនមិនចាំបាច់កាត់ករបស់លោកនោះទេគឺគ្រាន់តែចុះចេញពីតំណែងជានាយករដ្ឋមន្ត្រីទុកឱ្យលោកសម រង្ស៊ីដឹកនាំម្តងទៅបានហើយ។
ប៉ុន្តែប្រសិនបើលោកសួន សូរីដាចាញ់លោកហ៊ុន សែនវិញ នោះលោកសម រង្ស៊ី នឹងព្រមចូលខ្លួនទៅស្រុកខ្មែរឱ្យលោកហ៊ុន សែនចាប់ដាក់គុក។
តុលាការបានចេញដីកាកោះហៅមន្ត្រីក្រុមប្រឹក្សាឃុំ-សង្កាត់ដែលជាប់ឆ្នោត របស់គណបក្សសង្គ្រោះជាតិ និងមន្ត្រីក្រុមប្រឹក្សាស្រុក និងខេត្តរបស់បក្សនេះចំនួន២៦រូបឲ្យចូលទៅបំភ្លឺជាបន្តបន្ទាប់ចាប់ពីថ្ងៃទី៨ខែឧសភាតទៅ ពីបទពាក់ព័ន្ធទៅនឹងការប្រឆាំងសាលដីការបស់តុលាការកំពូលដែលបានរំលាយគណបក្សសង្គ្រោះជាតិ។
ចំណាត់របស់តុលាការនៅពេលនេះធ្វើឡើងក្រោយពីអតីតប្រធានគណបក្សសង្គ្រោះជាតិបានប្រកាសអំពីគំរោងវិលត្រឡប់ចូលទៅកាន់ប្រទេសកម្ពុជាវិញ ដែលនឹងមានមន្រ្តីថ្នាក់មូលដ្ឋានជាច្រើនកំពុងរៀបចំយុទ្ធសាស្រ្តទទួល និងក្រោយពីលោកសោ ចាន់ដេត សមាជិកព្រឹទ្ធសភាពីខាងគណបក្សសម រង្ស៊ីអះអាងថា មន្រ្តីថ្នាក់មូលដ្ឋានរបស់លោកបានត្រៀមខ្លួនរៀបចំកម្លាំងដើម្បីរង់ចាំទទួលលោកសមរង្ស៊ី។
អ្នកគាំទ្រគណបក្សប្រឆាំងប្រកាសថា ពួកគេត្រៀមខ្លួនទៅឃ្លាំមើលនៅមុខសាលាដំបូងខេត្ត ដើម្បីផ្ដល់កម្លាំងចិត្តដល់មន្ត្រីគណបក្សសង្គ្រោះជាតិទាំងនោះ។ ក្រុមមន្រ្តីជាន់ខ្ពស់របស់គណបក្សសង្គ្រោះជាតិអះអាងថា ពួកគេកំពុងត្រៀមមេធាវីដើម្បីការពារក្តីជូនមន្ត្រីបក្សថ្នាក់មូលដ្ឋានទាំងនោះ៕