លោកហ៊ុន សែនបានស្នើឱ្យតំណាងអគ្គលេខាធិការអង្គការសហប្រតិបត្តិការឥស្លាមOICជួយទិញអង្ករកម្ពុជាឱ្យបានច្រើន ព្រមទាំងទិញទំនិញផ្សេងៗពីកម្ពុជា ដោយថា កម្ពុជាមិនចង់ឱ្យមានទីផ្សារចង្អៀតនោះឡើយ។
ថ្លែងក្នុងពិធីពិសារអាហារស្រាយបួសខែរ៉ាម៉ាឌន ជាមួយបងប្អូនខ្មែរ-ឥស្លាម ជាង៤ពាន់នាក់នៅរសៀលថ្ងៃនេះ លោកហ៊ុន សែនបានអំពាវនាវឱ្យតំណាងអគ្គលេខាធិការអង្គការសហប្រតិបត្តិការឥស្លាមOICចំនួន៣នាក់ ដែលមានវត្តមានក្នុងពិធីនេះនិងថ្នាក់ដឹកនាំឥស្លាមទាំងអស់ ដោយឱ្យពួកគេជួយជំរុញការទិញទំនិញគ្រប់បែបយ៉ាង ពិសេសអង្ករពីកម្ពុជាឱ្យបានច្រើនផងដែរ។
ការអំពាវនាវរបស់លោកហ៊ុន សែននេះ ធ្វើឡើងក្រោយពេលសហគមន៍អន្តរជាតិដោយមានសហភាពអឺរ៉ុបនិងសហរដ្ឋអាមេរិក កំពុងព្រមានដាក់ទណ្ឌកម្មសេដ្ឋកិច្ចតាមរយៈការដកប្រព័ន្ធអនុគ្រោះពន្ធEBAនិងGSPពីកម្ពុជាប្រសិនបើរដ្ឋាភិបាលលោកហ៊ុន សែនមិនព្រមងាកទៅរកគន្លងប្រជាធិបតេយ្យនិងការគោរពសិទ្ធិមនុស្សតាមការទាមទាររបស់ពួកគេនោះទេ។
កាលពីខែមករាសហភាពអឺរ៉ុបសម្រេចយកពន្ធអង្ករនាំចូលពីកម្ពុជាឡើងវិញ ដោយគេមើលឃើញថា នេះជាជំហ៊ានដំបូងសម្រាប់ទណ្ឌកម្មអឺរ៉ុបមកលើរដ្ឋាភិបាល។
យ៉ាងនេះក្តីជាការទប់ទល់បញ្ហាអង្ករនេះ រដ្ឋាភិបាលក្រុងប៉េកាំងបានប្រកាសទទួលទិញអង្ករពីកម្ពុជា៤០ម៉ឺនតោនក្នុងឆ្នាំ២០១៩នេះ ហើយរដ្ឋាភិបាលកុំម្មុយនីស្តវៀតណាមក៏បានប្រកាសទិញអង្ករពីកម្ពុជារាប់ម៉ឺនតោនផងដែរ។
រីឯលោកហ៊ុន សែនកន្លងមក ក៏បានប្រកាសពីកំណែទម្រង់ផ្ទៃក្នុង ដោយថា ដើម្បីពង្រឹងឯករាជ្យភាពសេដ្ឋកិច្ចរបស់ខ្លួនសម្រាប់ទប់ទល់នឹងសហគមន៍អន្តរជាតិ ប្រសិនបើពួកគេដកហូតប្រព័ន្ធអនុគ្រោះពន្ធពីកម្ពុជាមែននោះ។
ទោះបីជាយ៉ាងក៏ដោយ អ្នកឃ្លាំមើលបញ្ហាសង្គមបានព្រមានថា ប្រសិនបើរដ្ឋាភិបាលបណ្តោយឱ្យបាត់បង់ប្រព័ន្ធអនុគ្រោះពន្ធ EBA របស់អឺរ៉ុប និង GSPរបស់អាមេរិកនឹងធ្វើឱ្យកម្ពុជាខាតបង់ប្រាក់ប្រមាណ១ពាន់លានដុល្លារក្នុង១ឆ្នាំៗ ហើយបញ្ហានេះនឹងអាចឈានទៅជាបញ្ហាវិបត្តិសង្គមធ្ងន់ធ្ងរទៀតផង៕