អភិបាលខេត្តបន្ទាយមានជ័យលោកសួន បវរត្រូវបានរដ្ឋាភិបាលសម្រេចស្នើទៅព្រះមហាក្សត្រដកចេញពីតំណែងដោយបញ្ជូនទៅកាន់តំណែងផ្សេងនៅក្រសួងមហាផ្ទៃជំនួសវិញ។
លិខិតរបស់លោកនាយករដ្ឋមន្ត្រីហ៊ុន សែនកាលពីថ្ងៃម្សិលមិញដែល The Cambodia Dailyទើបទទួលបាន ឱ្យដឹងថា លោកហ៊ុន សែន បានសម្រេចស្នើទៅព្រះមហាក្សត្រផ្ទេរតួនាទីរបស់អភិបាលខេត្តបន្ទាយមានជ័យលោកសួន បវរឱ្យទៅទទួលការងារផ្សេងនៅក្រសួងមហាផ្ទៃ ហើយតែងតាំងអភិបាលរងខេត្តនេះ១រូបគឺលោកអ៊ុំ រាត្រីធ្វើជាអភិបាលខេត្តជំនួសវិញ។ លិខិតរបស់លោកហ៊ុន សែនមិនបានបញ្ជាក់ថា លោកសួន បវរមានកំហុសអ្វីនោះឡើយ គ្រាន់តែបញ្ជាក់ថា ការផ្លាស់ប្តូរនេះដើម្បីឱ្យការងារកាន់តែមានភាពប្រសើរឡើង។
យ៉ាងនេះក្តី លោកសួន បវរត្រូវបានរដ្ឋាភិបាលស្នើដកចេញពីតំណែង គឺប៉ុន្មានថ្ងៃក្រោយពេលមានការបែកធ្លាយបញ្ហាស្រីកំណាញ់របស់លោកត្រូវបានផ្សព្វផ្សាយជាសាធារណៈនៅលើបណ្តាញសង្គមហ្វេសប៊ុក ហើយស្ត្រីដែលអះអាងថា ជាប្រពន្ធចុងរបស់លោកសួន បវរថែមទាំងបាននាំទាំងគ្រួសារទៅតវ៉ានៅបរិវេណសាលាខេត្ត ដោយថា អភិបាលខេត្តរូបនេះមិនមានការទទួលខុសត្រូវ និងបានបំផ្លាញអនាគតរបស់នាងផងដែរ៕