ពេលនេះចេកកម្ពុជាមានទីផ្សារធំមួយគឺប្រទេសចិន។ព័ត៌មានអំពីការនាំចេកចេញនេះកើតឡើងក្រោយពីកម្ពុជាបានចរចារនីតិវិធីបែបបទ ឯកសារចាំបាច់ សំខាន់ៗទាំងច្បាប់ និងបច្ចេកទេសជាពិសេសឯកសារអនាម័យជាមួយភាគីចិនមុនឈានទៅចុះហត្ថលេខាលើអនុស្សរណ:នៃការយោគយល់គ្នាកាលពីថ្ងៃទី២ខែសីហាឆ្នាំ២០១៨។
ហ្វេសប៊ុកក្រសួងកសិកម្មដែលចុះផ្សាយនៅថ្ងៃទី១០ខែឧសភាបានដកស្រង់សម្តីអគ្គនាយកក្រុមហ៊ុនលោកឧកញ៉ាផែ ហុកឈួនក្នុងពិធីសម្ពោធរោងចក្រវេចខ្ចប់និងនាំចេញផ្លែចេកអំបូងលឿងស្រស់របស់ក្រុមហ៊ុនឡងមេតអេហ្រ្គីដែលនាំចេកទៅកាន់ទីផ្សារប្រទេសចិន។ ហ្វេសប៊ុកចុះផ្សាយថា ការដាំចេកសម្រាប់នាំចេញគឺធ្វើឡើងលើផ្ទៃដីសរុប១ពាន់ហិចតា ដែលត្រូវប្រើប្រាស់ទុនវិនិយោគជាង៣២លានដុល្លារ។
ក្រសួងកសិកម្មឲ្យដឹងទៀតថា សព្វថ្ងៃក្រុមហ៊ុនមានផ្ទៃដីជាង៤០០ហិចតា ក្នុងខេត្តកំពត ហើយកំពុងប្រមូលផលវេចខ្ចប់ និងដំណើរការនាំចេញដោយសង្ឃឹមថា ក្នុងឆ្នាំ២០១៩ ចេកស្រស់ប្រមាណជាង២ម៉ឺន ២សែនតោននឹងត្រូវធ្វើការនាំចេញនៅឆ្នាំនេះ ហើយនៅឆ្នាំ២០២០ កម្ពុជារំពឹងថា តួលេខនាំចេកចេញនឹងកើនឡើងដល់ទៅជាង៣ម៉ឺនតោន។
ទន្ទឹមនឹងនេះ ក្រុមហ៊ុនបានស្រូបយកកម្លាំងពលកម្មក្នុងស្រុកជាង៨០០នាក់ហើយឆ្នាំ២០២០ត្រូវការពលកម្មបន្ថែមជាង១០០០នាក់ទៀត៕