ប្រធានរាជបណ្ឌិត្យសភាលោកសុខ ទូចអះអាងថា លោកសម រង្ស៊ីនឹងមិនហ៊ានវិលចូលស្រុកខ្មែរវិញដូចការសន្យានោះទេ។
លោកសុខ ទូចបានសរសេរអំពីការវិភាគមួយនៅលើទំព័រហ្វេសប៊ុករបស់លោកដោយលើកឡើងអំពីអំណះអំណាងប្រាំណុចសំខាន់ៗថា ទី១ លោកសម រង្ស៊ីធ្លាប់សន្យាថា នឹងវិលមកកម្ពុជាវិញជាច្រើនលើកមកហើយ តែធាតុពិតគាត់បានត្រឹមសន្យាខ្យល់ដើម្បីប្រជាភិថុតមហាជនប៉ុណ្ណោះ។ លោកបន្តថា លោកសមរង្ស៊ីបានសន្យាជាច្រើនលើករួចមកហើយថា នឹងមកកម្ពុជា ជាក់ស្តែងដូចកាលពីនៅថ្ងៃ១៦វិច្ឆិកា២០១៥ថ្ងៃទី១៩តុលា២០១៦ ថ្ងៃទី១២ ខែវិច្ឆិកាឆ្នាំ ២០១៧និងថ្ងៃទី២៦ខែមករាឆ្នាំ២០១៩។
ប្រធានរាជបណ្ឌិត្យសភាកម្ពុជារូបនេះអះអាងថា កាលពីរចនាសម្ព័ន្ធ CNRP នៅមានលោកសមរង្ស៊ីបានលាលែង ហើយដេករង់ចាំមើលសកម្មភាព រាជរដ្ឋាភិបាលកម្ពុជា។ ជាងនេះទៅទៀត ភរិយារបស់លោកសម រង្ស៊ីអាចនឹងមិនផ្តល់ឱកាសឱ្យលោកវិលមកកម្ពុជានោះទេព្រោះអ្នកលេងនយោបាយនៅពីខាងក្រោយឆាកគឺភរិយា មិនមែនលោកសម រង្ស៊ីឡើយ។ លោកសុខ ទូចបន្តថាលោកសម រង្ស៊ីអាចធ្វើព្យុះធ្វើភ្លៀងបានពេលខ្លួននៅក្រៅស្រុកតែពេលខ្លួនចូលស្រុកខ្លួនបានលើកជើងពានជូនអំណាចដល់លោកហ៊ុន សែនទៅវិញ ដូចជា ករណីវិសោធនកម្មរដ្ឋធម្មនុញ្ញពី២/៣មក៥០+ ១ វិសោធនកម្មច្បាប់ក្រោយពេលបោះឆ្នោតលទ្ធផលនៃការបោះឆ្នោតឆ្នាំ២០១៨និងយុទ្ធសាស្រ្តដេកផ្ទះឈ្នះឯងដែលធ្វើឲ្យគណបក្សប្រជាជនកម្ពុជាបានទទួលសំឡេងឆ្នោតគាំទ្ររហូតទៅដល់ជាង៨២%។
ចំណុចក្រោយលោកសុខ ទូចចោទសួរថា តើលោកសម រង្ស៊ីថា មកកម្ពុជាដើម្បីផ្តួលរំលំរាជរដ្ឋាភិបាលនិងមកចាប់លោកហ៊ុន សែនដោយរបៀបណា? បើពេលខ្លួននៅមានសមត្ថភាពនិងលទ្ធភាពលោកធ្វើអ្វីមិនកើតផង ចុះទម្រាំពេលនេះ ខ្លួនជាទណ្ឌិត ហើយជាប់បណ្តឹងជាច្រើនករណីផ្សេងទៀតនោះ? លោកសុខ ទូចយល់ថា អ្វីដែលលោកសម រង្ស៊ីបំផុសចលនាវិលចូលស្រុកនេះ គ្រាន់តែជាសារមួយប្រាប់ទៅមហាជនថា សម រង្ស៊ីមិនដេកលក់ទេ ហើយខ្លួនអាចធ្វើអាជីវកម្មក្នុងការប្រមូលថវិកាពីការវិលចូលស្រុកនេះទៀតផង។
ប្រតិកម្មរបស់លោកសុខ ទូចនៅពេលនេះ ធ្វើឡើងស្របពេលដែលលោកសម រង្ស៊ីបន្តប្រកាសថា លោកនឹងវិលចូលកម្ពុជាវិញក្នុងឆ្នាំ២០១៩ ប៉ុន្តែលោកមិនទាន់បញ្ជាក់ថ្ងៃខែពិតប្រាកដនោះឡើយ។ លោកសម រង្ស៊ីតែងអំពាវនាវដល់កងកម្លាំងប្រអាវុធកុំស្តាប់តាមបញ្ជាលោកហ៊ុន សែននិងឈរនៅខាងប្រជាពលរដ្ឋដើម្បីផ្តួលរំលំរបបនេះ។
អតីតមេបក្សឆាំងរូបនេះ បានបន្តអំពាវនាវឲ្យពលរដ្ឋនៅក្រៅចូលរួមទៅផ្តួលរំលំរបបលោកហ៊ុន សែនជាមួយលោកដោយទទូចហៅពលរដ្ឋនៅក្រៅប្រទេសថា«យើងទៅស្រុកយើងវិញ ទៅផ្ទះយើងវិញ ទៅដណ្តើមយកប្រទេសយើងមកវិញ ពីជនក្បត់ជាតិហ៊ុន សែន»៕