តំណាងមន្ត្រីរដ្ឋាភិបាលឬតំណាងការិយាល័យនាំពាក្យរដ្ឋាភិបាលនៅមិនទាន់បញ្ចេញប្រតិកម្មនានាដើម្បីឆ្លើយចំពោះការលើកឡើងរបស់ស្ថានទូតអាមេរិកប្រចាំកម្ពុជាជុំវិញបញ្ហាស្លាប់កូនប្រុសអតីតមន្ត្រីគណបក្សសង្រ្គោះជាតិនៅមូលដ្ឋានក្នុងខេត្តកំពង់ចាម ដែលស្លាប់នៅក្នុងពន្ធនាគារយ៉ាងអាថ៌កំបាំង។
បន្ថែមពីនេះអាមេរិកបង្ហាញការព្រួយបារម្ភចំពោះការចេញដីកាកោះហៅអតីតមន្ត្រីនិងសកម្មជនគណបក្សសង្រ្គោះជាតិជាតិជិត១រយនាក់ព្រមទាំងបញ្ហាបន្តឃុំខ្លួនប្រធានគណបក្សសង្រ្គោះជាតិលោកកឹម សុខាទាំងអយុត្តិធម៌ផងដែរ។
មន្ត្រីរដ្ឋាភិបាលនៅមិនទាន់មានការឆ្លើយតបណាមួយជុំវិញបញ្ហាទាំងនេះឡើយ តែជាទម្លាប់របស់រដ្ឋាភិបាលកន្លងមកតែងមានប្រតិកម្មភា្លមៗ ជាលិខិតឬ ការឆ្លើយតបរបស់ខ្លួនជុំវិញបញ្ហាទាំងនេះ ពិសេសប្រតិកម្មឆ្លើយតបនឹងទូតប្រទេសមហាអំណាចលោកសេរីនេះតែម្តង។
កាលពីថ្ងៃទី១៨ខែឧសភា ស្ថានទូតសហរដ្ឋអាមេរិកប្រចាំកម្ពុជាបានលើកឡើងនៅលើទំព័រហ្វេសប៊ុករបស់ខ្លួនថា សហរដ្ឋអាមេរិក សម្តែងនូវកង្វល់យ៉ាងខ្លាំងចំពោះការស្លាប់របស់ទិត្យ រ៉ន ដែលជាសមាជិកគណបក្សសង្គ្រោះជាតិ និងជាកូនមន្ត្រីគណបក្សប្រឆាំងមួយនេះនៅឃុំទួលព្រះឃ្លាំង ស្រុកស្ទឹងត្រង់ ខេត្តកំពង់ចាម ខណៈលោកស្ថិតក្រោមការឃុំឃាំងរបស់នគរបាល។ ជាមួយគ្នានេះ អាមេរិកក៏បានអំពាវនាវឲ្យមានការស៊ើបអង្កេតដោយឯករាជ្យជាបន្ទាន់មួយចំពោះហេតុការណ៍ដែលឈានទៅដល់ការចាប់ខ្លួន និងការស្លាប់របស់លោកទិត្យ រ៉ន។
លើសពីនេះ សហរដ្ឋអាមេរិកក៏បានបង្ហាញក្តីកង្វល់ផងដែរ ចំពោះនីតិវិធីរបស់តុលាការ នាពេលថ្មីៗនេះ ដែលបង្កើតឡើងប្រឆាំងនឹងសមាជិករបស់គណបក្សសង្គ្រោះជាតិប្រមាណ៦៥នាក់។
ប្រទេសមហាអំណាចមួយនេះបានស្នើដល់រដ្ឋាភិបាលកម្ពុជាឲ្យលុបបំបាត់នូវការរឹតត្បិតលើមនុស្សទាំងអស់ក្នុងប្រទេសកម្ពុជានិងឲ្យដោះលែងអ្នកទោសទាំងឡាយណា ដែលត្រូវបានឃុំខ្លួនតាមអំពើចិត្ត និងខុសច្បាប់ រួមទាំងប្រធានគណបក្សសង្រ្គោះជាតិលោក កឹម សុខាផងដែរ។ សហរដ្ឋអាមេរិកបានអំពាវនាវជាថ្មីទៀតដល់រដ្ឋាភិបាលកម្ពុជាឲ្យមានការគាំទ្រនូវលទ្ធិប្រជាធិបតេយ្យសេរីពហុបក្សពិតប្រាកដ ដោយធ្វើយ៉ាងណា ឲ្យសកម្មភាពនិងច្បាប់របស់ខ្លួន គោរពទៅតាមកាតព្វកិច្ចសិទ្ធិមនុស្សរបស់កម្ពុជា ស្ថិតក្រោមច្បាប់អន្តរជាតិ។
ទាំងសហរដ្ឋអាមេរិក និងសហភាពអឺរ៉ុបបានព្រមានចំៗម្តងហើយម្តងទៀត ចំពោះរដ្ឋាភិបាលលោកហ៊ុន សែនដែលដើរប្រាសចាកពីគន្លងប្រជាធិបតេយ្យ។
សហរដ្ឋអាមេរិកនិងអឺរ៉ុបបានព្រមានរួចហើយថា ប្រសិនបើរដ្ឋាភិបាលឯកបក្សមួយនេះមិនព្រមវិលទៅរកគន្លងប្រជាធិបតេយ្យនិងការគោរពសិទ្ធិមនុស្សពិតប្រាកដទេ នោះកម្ពុជានឹងទទួលរងទណ្ឌកម្មសេដ្ឋកិច្ចពីពួកគេក្នុងពេលឆាប់ៗមិនខាន ប៉ុន្តែការគំរាមទាំងនេះរដ្ឋាភិបាលលោកហ៊ុន សែនបានបង្ហាញជំហររួចហើយថា នឹងមិនឱនក្បាលដើម្បីជំនួសឬការរួចផុសពីទណ្ឌកម្មសេដ្ឋកិច្ច ព្រមទាំងមិនញញើតចំពោះការដាក់ទណ្ឌកម្មពីអន្តរជាតិឡើយ៕