នគរបាលជាតិត្រៀមកម្លាំងសមត្ថកិច្ចដើម្បីការពារសន្តិសុខ សណ្ដាប់ធ្នាប់ក្នុង ព្រះរាជពិធីច្រត់ព្រះនង្គ័លដែលគ្រោងធ្វើនៅខេត្តតាកែវនៅថ្ងៃទី២២ ខែឧសភា ក្រោមព្រះរាជាធិបតីភាព ព្រះករុណាព្រះបាទសម្តេចព្រះបរមនាថនរោត្តមសីហមុនី។
ផែនការការពារសុវត្ថិភាពនេះដឹកនាំដោយអគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស លោកទូច ណារ៉ុថ។ ប៉ុន្តែសមត្ថកិច្ចនៅមិនទាន់បង្ហាញពីចំនួនកងកម្លាំងដែលត្រូវពង្រាយនៅឡើយទេ។សេចក្តីជូនដំណឹងរបស់ក្រសួងទេសចរណ៍ឲ្យដឹងថា ព្រះរាជពិធីនេះនឹងមានរៀបចំតាំងពិព័រណ៍ផលិតផលកសិកម្មសិប្បកម្មក្នុងស្រុក។ ព្រឹត្តិការណ៍បុណ្យប្រពៃណីនេះនឹងការបង្ហាញដល់ទេសចរជាតិ និងអន្តរជាតិបានស្វែងយល់កាន់តែច្បាស់អំពីវប្បធម៌ ប្រពៃណី ទំនៀមទម្លាប់របស់ខ្មែរដែលមានតាំងពីបុរាណកាលមក ពិសេស ព្រះរាជពិធីច្រត់ព្រះនង្គ័ល ដែលជាពិធីប្រព្រឹត្តឡើងជាមង្គល
ឧទ្ទិសដល់ការចាប់ផ្តើមរដូវធ្វើស្រែចម្ការរបស់ប្រជាកសិករ និងបួងសួងដល់វត្ថុស័ក្តិសិទ្ធិឲ្យបង្អុរទឹកភ្លៀងបរិបូរណ៌តាមរដូវកាល ដើម្បីឲ្យវិស័យកសិកម្មគ្រប់ប្រភេទទទួលបានភោគផលខ្ពស់៕