អតីតមន្ត្រីជាប់ឆ្នោតគណបក្សសង្គ្រោះនៅខេត្តបាត់ដំបងចំនួន៤រូបទៀតបានចូលបំភ្លឺតាមដីកាកោះរបស់តំណាងអយ្យការអមសាលាដំបូងខេត្តបាត់ដំបងនាព្រឹកនេះពាក់ព័ន្ធនឹងសំណុំរឿងប្រឆាំង និងបំពានសាលដីកាតុលាការកំពូលកាលពីខែវិច្ឆិកាឆ្នាំ២០១៧ ដោយមិនមានការឃាត់ខ្លួននោះឡើយ។
អ្នកទាំង៤រូបនោះរួមមានអតីតមេឃុំពាមឯក លោកស៊ុន ចំរើន អតីតមេឃុំសម្រោងក្នុង លោកភឿក ឡំ អតីតមេឃុំព្រែងហ្លួង អ្នកស្រីនី រំដួល និងទី៤ អតីតជំទប់ទី១ ឃុំព្រែកនរិន្ទលោកសុខ សុភ័ក្រ្ត។
ចំណែកអតីតចៅសង្កាត់អូរចារមកពីគណបក្សសង្រ្គោះជាតិកញ្ញាស៊ិន ចាន់ពៅរ៉ូហ្ស៊េតដែលបានតាមឃ្លាំមើលការចូលឆ្លើយបំភ្លឺនេះបានសរសេរនៅលើទំព័រហ្វេសប៊ុករបស់កញ្ញាថា អ្នកដែលត្រូវបានតុលាការកោះហៅសាកសួរក្នុងសំណុំរឿង៣៣៨កាលពីព្រឹកមិញនេះគឺខុសពីកញ្ញាដែលត្រូវបានតុលាការកោះហៅបំភ្លឺនៅក្នុងសំណុំរឿង៣៣៩ប៉ុន្តែកញ្ញាថា តំណាងអយ្យការបានសួរសំណួរអតីតមន្ត្រីបក្សប្រឆាំងទាំង៤រូបនោះស្រដៀងៗគ្នា។ កញ្ញារ៉ូហ្ស៊េតបញ្ជាក់ថា សំណួរទាំងនោះដូចជាតើអ្នកស្គាល់រ៉ូហ្ស៊េតឬទេ? តើអ្នកឧស្សាហ៍មកញ៉ាំនៅហាងនំបញ្ចុករបស់នាងទេ?ហើយហេតុអ្វីបានជាឧស្សាហ៍មកញ៉ាំនំបញ្ចុកនៅហាងរបស់នាង?
កាលពីចុងខែមេសានិងនៅដើមខែឧសភាតំណាងអយ្យការអមសាលាដំបូងខេត្តបាត់ដំបងលោកគឺ ប៊ុណ្ណារ៉ាបានចេញដីកាជាបន្តបន្ទាប់កោះហៅអតីតមន្ត្រីនិងសកម្មជនគណបក្សសង្រ្គោះជាតិខេត្តនេះចំនួន២៦រូបឱ្យចូលបំភ្លឺជាបន្តបន្ទាប់ក្នុងខែឧសភានេះ ពាក់ព័ន្ធនឹងសំណុំរឿងប្រឆាំងសាលក្រមរបស់តុលាការកំពូលកាលពីថ្ងៃទី១៦ខែវិច្ឆិកាឆ្នាំ២០១៧ ដែលសម្រេចរំលាយគណបក្សសង្រ្គោះជាតិចោលនិងដកហូតតំណែងអតីតមន្ត្រីគណបក្សសង្គ្រោះជាតិទាំងអស់តាំងពីថ្នាក់ឃុំសង្កាត់រហូតដល់រដ្ឋសភា ហើយយកតំណែងទាំងនោះទៅចែកមន្ត្រីរបស់ខ្លួននិងគណបក្សរណបរបស់បក្សកាន់អំណាចមួយចំនួន។ សាលាក្រមនោះក៏បានហាមឃាត់មន្ត្រីជាន់ខ្ពស់គណបក្សប្រឆាំង១១៨រូបមិនឱ្យធ្វើនយោបាយរយៈពេល៥ឆ្នាំផងដែរ។
រហូតមកទល់ពេលនេះ តុលាការខេត្តបាត់ដំបងបន្តកោះហៅអ្នកគាំទ្រសកម្មជនបក្សប្រឆាំងចូលបំភ្លឺដែលកើនដល់ចំនួន៣៥នាក់ ហើយគិតមកដល់ថ្ងៃទី២១ខែឧសភានេះ។ តុលាការចោទប្រកាន់ថា អ្នកទាំងនោះ កំពុងប្រឆាំងសាលដីកាតុលាការកំពូលករណីរំលាយគណបក្សសង្គ្រោះជាតិកាលពីខែវិច្ឆិកាឆ្នាំ២០១៧។
ចំណែកមេធាវីការពារក្តីឲ្យសកម្មជនទាំងនេះគឺលោកសំ សុគង់រិះគន់ថា ការកោះហៅនេះជាការរំលោភសិទ្ធិនិងជាការគំរាមកំហែងដល់សិទ្ធិកូនក្តីរបស់លោកព្រោះពួកគេ មិនបានជាប់បម្រាមនយោបាយឡើយ ដូច្នេះពួកគេមានសិទ្ធិពេញលេញក្នុងការជួបជុំគ្នា និងបញ្ចេញមតិ។ អ្នកឃ្លាំមើលសង្គមរិះគន់ថា រដ្ឋាភិបាលលោកហ៊ុន សែនយកប្រព័ន្ធតុលាការមកគាបសង្កត់ពលរដ្ឋដែលមាននិន្នាការគាំទ្រគណបក្សសង្គ្រោះជាតិនិងជាការធ្វើទុក្ខបុកម្នេញលើអតីតមន្រ្តីបក្សប្រឆាំងដែលមិនព្រមចុះចូលជាមួយខ្លួន។
កាលពីដើមឆ្នាំ២០១៩នេះ លោកនាយករដ្ឋមន្ត្រីហ៊ុន សែនបានប្រកាសរួចហើយថា ក្រុមលោកនឹងតាមកម្ចេចក្រុមបក្សប្រឆាំងនៅក្នុងស្រុកទាំងអស់មិនឱ្យរស់រានមានជីវិតឡើយក្រោមហេតុផលអនុវត្តច្បាប់។ ក្រោយការប្រកាសនេះមិនបានប៉ុន្មានថ្ងៃផង សកម្មភាពចាប់ចង និងចេញដីកាកោះហៅអតីតមន្ត្រីនិងសកម្មជនគណបក្សសង្រ្គោះជាតិក៏កើតមានឥតឈប់ឈរ។
កាលពីថ្ងៃទី១៨ខែឧសភាស្ថានទូតសហរដ្ឋអាមេរិកប្រចាំកម្ពុជាបានលើកឡើងនៅលើទំព័រហ្វេសប៊ុករបស់ខ្លួនថា សហរដ្ឋអាមេរិកសម្តែងនូវកង្វល់យ៉ាងខ្លាំង ចំពោះនីតិវិធីរបស់តុលាការ នាពេលថ្មីៗនេះ ដែលបង្កើតឡើងប្រឆាំងនឹងសមាជិករបស់គណបក្សសង្គ្រោះជាតិប្រមាណ៦៥នាក់ទាំងនៅខេត្តបាត់ដំបងខេត្តកំពង់ធំនិងខេត្តដទៃទៀត។
ប្រទេសមហាអំណាចមួយនេះបានស្នើដល់រដ្ឋាភិបាលកម្ពុជាឲ្យលុបបំបាត់នូវការរឹតត្បិតលើមនុស្សទាំងអស់ក្នុងប្រទេសកម្ពុជានិងស្នើឲ្យដោះលែងអ្នកទោសទាំងឡាយណា ដែលត្រូវបានឃុំខ្លួនតាមអំពើចិត្ត និងខុសច្បាប់ រួមទាំងប្រធានគណបក្សសង្រ្គោះជាតិលោកកឹម សុខាផងដែរ។ សហរដ្ឋអាមេរិកបានអំពាវនាវជាថ្មីទៀតឲ្យរដ្ឋាភិបាលកម្ពុជាមានការគោរពនូវលទ្ធិប្រជាធិបតេយ្យសេរីពហុបក្សពិតប្រាកដ ដោយធ្វើយ៉ាងណាឲ្យសកម្មភាពនិងច្បាប់របស់ខ្លួនគោរពទៅតាមកាតព្វកិច្ចសិទ្ធិមនុស្សរបស់កម្ពុជាស្ថិតក្រោមច្បាប់អន្តរជាតិ៕