ពលរដ្ឋនៅខេត្តព្រះសីហនុមកពីសហគមន៍មានជម្លោះដីធ្លីចំនួន៨បន្តជំរុញឱ្យអាជ្ញាធរខេត្តនេះពន្លឿនការដោះស្រាយវិវាទដីធ្លីរបស់ពួកគាត់ឱ្យបានឆាប់រហ័ស។
តំណាងសហគមន៍អូរដំរីឃុំអូរត្រេះ ស្រុកស្ទឹងហាវខេត្តព្រះសីហនុម្នាក់លោកម៉ន ស៊ីណាបានឱ្យដឹងថា ការស្នើនេះធ្វើឡើងដោយប្រជាសហគមន៍ជាង២រយនាក់មកពីសគមន៍មានជម្លោះដីធ្លីចំនួន៨ ប៉ុន្តែអវត្តមានសហគមន៍ចំនួន២ទៀតមិនបានចូលរួម។ លោកបន្តថា ការលើកគ្នាមកតវ៉ានៅមុខសាលាខេត្តព្រះសីហនុនេះ ដើម្បីស្នើដល់អាជ្ញាធរខេត្តនេះពន្លឿនការដោះស្រាយវិវាទដីធ្លី ជាពិសេសស្នើឲ្យជួយពន្លឿនចេញបណ្ណកម្មសិទ្ធិដីធ្លីជូនពួកគេទាំង១០សហគមន៍ លើទំហំដីជាង២៦៨ហិកតាឲ្យបានឆាប់រហ័ស។
តំណាងសហគមន៍រូបនេះអះអាងថា យ៉ាងហោចណាស់មានតំណាងសហគមន៍ចំនួន១២នាក់ត្រូវបានអាជ្ញាធរខេត្តនេះអនុញ្ញាតឱ្យចូលជួបពិភាក្សាគ្នា ហើយអាជ្ញាធរសន្យាថា នឹងពន្លឿនការងារនេះ។ លោកបន្តថា អាជ្ញាធរបានប្រាប់ឱ្យពលរដ្ឋប្រមូលភស្តុតាងបន្ថែមដើម្បីដាក់ទៅតុលាការចំពោះសំណុំរឿងដីធ្លីណាដែលឈានដល់ដៃតុលាការ ព្រោះផុតដៃរបស់អាជ្ញាធរខេត្តហើយ។
លោកថា ពួកគាត់នឹងរងចាំមើលលទ្ធផលនៃការចុះធ្វើការងាររបស់អាជ្ញាធរបន្តទៀត។
កន្លងមក តំណាងប្រជាពលរដ្ឋមានទំនាស់ដីធ្លីទាំង១០សហគមន៍ធ្លាប់បានលើកឡើងថា សកម្មភាពចុះអនុវត្តការងាររបស់មន្ត្រីជំនាញនិងអាជ្ញាធរខេត្តព្រះសីហនុគឺមានការយឺតយ៉ាវដែលធ្វើឱ្យពួកគេនៅតែជួបបញ្ហាប្រឈមក្នុងការរស់នៅ ដោយមិនទាន់មានប័ណ្ណកាន់កាប់ដីធ្លីស្របច្បាប់នៅឡើយ៕