សិល្បករជើងចាស់ផ្នែកអាយ៉ៃ លោកព្រហ្ម ម៉ាញ អំពាវនាវលោកហ៊ុន សែនជួយអន្តរាគមន៍ករណីចោរចូលលួចលុយអស់ជាង៥ម៉ឺនដុល្លារ។
លោកព្រហ្មម៉ាញលើកឡើងបែបនេះ ខណៈសមត្ថកិច្ចមូលដ្ឋានមិនទាន់បង្ហាញតម្រុយណាមួយដល់រូបលោកក្នុងការស៊ើបអង្កេតនេះនៅឡើយ។ ក្នុងវីដេអូដែលត្រូវបង្ហោះចែកចាយតាមបណ្តាញសង្គមហ្វេសប៊ុកប៉ុន្មានថ្ងៃមកនេះ លោកព្រហ្ម ម៉ាញរំពឹងថា រឿងរ៉ាវរបស់លោកពេលដឹងដល់លោកហ៊ុន សែនហើយអាចនឹងមានសង្ឃឹមថា សមត្ថកិច្ចនឹងនាំយកជនដៃដល់មកផ្តន្ទាទោសតាមច្បាប់។
កាលពីយប់ថ្ងៃទី១៧ខែឧសភាឆ្នាំ២០១៩ កន្លងទៅសមត្ថកិច្ចអះអាងថា ចោរបានចូលគាស់ផ្ទះលោកព្រហ្ម ម៉ាញ ក្នុងខណ្ឌទួលគោក ក្រុងភ្នំពេញ ដោយបានរុករើ ក្នុងបន្ទប់ យកលុយអស់ប្រមាណ៥ម៉ឺនដុល្លារ ខណៈដែលលោកមិននៅក្នុងផ្ទះ។ លោកព្រហ្ម ម៉ាញឲ្យដឹងថា លុយទាំងនេះជាកម្លាំងញើសឈាមដែលលោកខំសន្សំទុករាប់ឆ្នាំមកហើយ។
យ៉ាងណាក្តី រហូតមកទល់ថ្ងៃទី២១ ខែឧសភា គេមិនទាន់ឃើញលោកហ៊ុន សែនឆ្លើយតបនឹងសំណើរបស់លោកព្រហ្ម ម៉ាញនៅឡើយទេ។ លោកព្រហ្ម ម៉ាញដែលពូកែសំនួនវោហាសព្ទចម្រៀងអាយ៉ៃឆ្លើយឆ្លងនិងជំនាញសិល្បៈបូរាណមួយចំនួនទៀត ធ្លាប់សម្តែងការរិះគន់ថា ផែនការក៥បានធ្វើពលរដ្ឋខ្មែររាប់ម៉ឺនស្លាប់ដោយសារការជាន់មីន ដែលវៀតណាមជាអ្នករៀបចំ។
លោកធ្លាប់សុំសិទ្ធិរស់នៅសហរដ្ឋអាមេរិកមួយរយៈ ប៉ុន្តែក្រោយមកលោកសម្រេចចិត្តមករស់នៅប្រទេសកម្ពុជាវិញ ហើយមានទំនាក់ទំនងល្អជាមួយលោកហ៊ុន សែននិងមន្រ្តីជាន់ខ្ពស់មួយចំនួននៃរដ្ឋាភិបាលលោកហ៊ុន សែនថែមទៀត។
នៅរយៈពេលចុងក្រោយនេះ ខណៈពលរដ្ឋខ្មែរនៅសហរដ្ឋអាមេរិកធ្វើបាតុកម្មប្រឆាំងវត្តមានលោកហ៊ុន សែន នៅលើទឹកដីសហរដ្ឋអាមេរិក ពេលនោះ លោកព្រហ្ម ម៉ាញក៏បានបង្ហាញវត្តមានគាំទ្រលោកហ៊ុន សែននៅលើទឹកដីសហរដ្ឋអាមេរិកដែរ៕