ព្រះមហាក្សត្រព្រះបាទ នរោត្តមសីហមុនីសព្វព្រះរាជហឫទ័យ យាងទៅប្រទេសបារាំងដើម្បីចូលរួមក្នុងពិធីអបអរសាទរខួប២៥ឆ្នាំនៃគណៈកម្មាធិការអន្តរជាតិសម្របសម្រួលកិច្ចគាំពារនិងអភិរក្សតំបន់អង្គរ ដែលហៅកាត់ថា អាយ ស៊ី ស៊ី អង្គរ(ICC-Angkor)។
ដូចសព្វដង ថ្នាក់ដឹកនាំកំពូលៗរួមមាន៖ ប្រធានព្រឹទ្ធសភា លោកសាយ ឈុំ ប្រធានរដ្ឋសភាលោកហេង សំរិន លោកនាយករដ្ឋមន្ត្រីហ៊ុន សែននិងមន្ត្រីជាន់ខ្ពស់ដទៃទៀត ព្រមទាំង ព្រះញាតិវង្សផងបានចូលរួមថ្វាយដំណើរព្រះមហាក្សត្រនៅអាកាសយានដ្ឋានអន្តរជាតិភ្នំពេញថ្ងៃទី២៣ខែឧសភានេះ។
គណៈកម្មាធិការសម្របសម្រួលអន្តរជាតិមួយនេះបានបង្កើតឡើងនៅថ្ងៃទី២១-២២ខែធ្នូឆ្នាំ១៩៩៣ក្នុងគោលដៅអភិរក្ស និងអភិវឌ្ឍអង្គរបន្ទាប់ពីប្រាសាទនៅតំបន់អង្គររបស់កម្ពុជាត្រូវបានដាក់បញ្ចូលជាសម្បត្តិបេតិកភណ្ឌមនុស្សជាតិរបស់អង្គការយូណេស្កូ កាលថ្ងៃទី១៤ខែធ្នូឆ្នាំ១៩៩២។
ICC-Angkorមានបារាំង និងជប៉ុនជាសហប្រធានលេខាធិការដ្ឋានវិទ្យាសាស្រ្តអចិន្ត្រៃយ៍ទទួលបន្ទុកដោយការិយាល័យតំណាងអង្គការយូណេស្កូប្រចាំព្រះរាជាណាចក្រកម្ពុជា និងអាជ្ញាធរជាតិអប្សរាតំណាងរាជរដ្ឋាភិបាលកម្ពុជា និងមានប្រទេសជាសមាជិកចំនួន៣៧ប្រទេស មកពី៥ទ្វីប និងមានអង្គការអន្តរជាតិចំនួន១៣ទៀត៕