សាកលវិទ្យាល័យSouth-East Asiaបានចេញមុខច្រានចោលរាល់អត្ថន័យរបស់បទចម្រៀងមានចំណងជើងថា«សង្គមនេះ»ដែលច្រៀងដោយនិស្សិតរបស់ខ្លួនម្នាក់ឈ្មោះឈុន ឌីម៉ីដោយអះអាងថាមិនមែនជាគោលជំហររបស់សាកលវិទ្យាល័យខ្លួនឡើយ។
សេចក្តីថ្លែងការណ៍របស់សាកលវិទ្យាល័យនេះកាលពីថ្ងៃទី២១ឧសភាដែលThe Cambodia Dailyទើបទទួលបាននៅថ្ងៃនេះបានឱ្យដឹងថា គណៈគ្រប់គ្រងនិងអ្នកបម្រើការងារនៅសាកលវិទ្យាល័យនេះមានការសោកស្តាយចំពោះទង្វើរបស់និស្សិតឈ្មោះឈុន ឌីម៉ីដែលបានច្រៀងចម្រៀងមានចំណងជើងថា«សង្គមនេះ»ដែលប៉ះពាល់ដល់កិត្តិយសរបស់រដ្ឋាភិបាល។ លើសពីនេះ ខ្លឹមសារនៃបទចម្រៀងនោះគឺផ្ទុយពីគោលនយោបាយ យុទ្ធសាស្ត្រចតុកោណ និងផែនការអភិវឌ្ឍន៍ជាតិ ក្រោមការដឹកនាំដ៏ត្រឹមត្រូវរបស់លោកហ៊ុន សែន។
សេចក្តីថ្លែងការណ៍ដដែលអះអាងថា ជាជំហររបស់សាកលវិទ្យាមួយនេះ គ្រប់មុខវិជ្ជា គ្រប់កម្រិតសិក្សា គឺមិនបានបញ្ចូលខ្លឹមសារសម្រាប់រិះគន់រដ្ឋាភិបាលលោកហ៊ុន សែននិងថ្នាក់ដឹកនាំប្រទេសណាមួយនៅលើពិភពលោកនោះឡើយ ដោយថា ទង្វើរបស់និស្សិតឈុន ឌីម៉ីគឺជាទង្វើដែលកើតចេញពីគំនិតខ្លួនតែប៉ុណ្ណោះ។
តារាចម្រៀងរ៉េបឈ្មោះឈុន ឌីម៉ី ឬហៅថាឌីម៉ី ខេមបូ(Dymey-Cambo)ដែលជានិស្សិតឆ្នាំទី១ នៃសាកលវិទ្យាល័យSouth-East Asiaបានតែងនិពន្ធបទចម្រៀងមួយបទកាលខែមេសាដែលមានចំណងជើងថា«សង្គមនេះ»ដោយចម្រៀងនោះចែកចេញជាពីរវគ្គ។
អត្ថន័យបទចម្រៀងនេះបានរៀបរាប់អំពីរឿងរ៉ាវអាក្រក់ជាច្រើននៅក្នុងសង្គមដែលដឹកនាំដោយលោកហ៊ុន សែនកន្លងមក ដូចជា ការប្រព្រឹត្តអំពើពុករលួយ ការធ្វើបាបពលរដ្ឋក្រីក្រ តាមរយៈអ្នកមានលុយមានអំណាចជិះជាន់ការរំលោភយកដីធ្លី។ ការគាបសង្កត់លើអ្នកចេះដឹង រួមទាំងការបាញ់កាប់សម្លាប់អ្នកចេះដឹង និងអ្នកស្នេហាជាតិជាហូរហែនិងរៀបរាប់អំពីបញ្ហាជនអន្តោប្រវេសន៍រស់នៅយ៉ាងអនាធិបតេយ្យនៅលើទឹកដីកម្ពុជា។
លើសពីនេះបទចម្រៀងនោះក៏បានចោទជាសំណួរថាតើពេលណាទើបពលរដ្ឋខ្មែរបានសេចក្តីសុខ សេរីភាព និងសន្តិភាពពិតប្រាកដ? បទចម្រៀងដដែលនេះក៏បួងសួងសុំឱ្យពលរដ្ឋខ្មែរទទួលបានសេចក្តីសុខសន្តិភាព សេរីភាពពេញលេញផងដែរ។
កាលពីថ្ងៃម្សិលមិញ តាមបណ្តាញទំនាក់ទំនងតេឡេក្រាមអ្នកនាំពាក្យគណបក្សប្រជាជនកម្ពុជា លោកសុខ ឥសានបានអះអាងថា «ការតែងនិពន្ធ ការសរសេរ ការច្រៀងប្រមាថជាតិសាសន៍ឯងគឺមិនមែនជាសិទ្ធិទេ»។
យ៉ាងនេះក្តីនាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោកសន ជ័យយល់ថា សេចក្តីថ្លែងការណ៍របស់សាកលវិទ្យាល័យSouth-East Asiaគឺជាការលាងសម្អាតខ្លួនដោយមិនចង់ពាក់ព័ន្ធនឹងបញ្ហានេះ។
លោកថា ការសម្តែងមតិណាមួយគឺជាសិទ្ធិបុគ្គលហើយក៏ជាការទទួលខុសត្រូវរបស់បុគ្គលដែរ ដោយថា សាលានេះមិនគួរបង្ហាញជំហររបស់ខ្លួនដូចនេះឡើយ ដែលនឹងអាចធ្វើឱ្យប៉ះពាល់ដល់ការសម្រេចចិត្តរបស់សិស្សឬនិស្សិតក្នុងការចូលរៀននៅសាលារបស់ខ្លួនផងដែរ៕