សមត្ថកិច្ចខេត្តស្វាយរៀងចាប់ខ្លួនអ្នកលេងហ្វេសប៊ុកម្នាក់ដែលបង្ហោះការប្រមាថអង្គព្រះមហាក្សត្រ។ ម្ចាស់គណនីfacebookដែលត្រូវចាប់ខ្លួនកាលពីថ្ងៃទី២៣ឧសភានេះ ឈ្មោះគឹម បញ្ញា(Kim Panha)ដោយត្រូវចោទថា បានបង្ហោះសារ ជេរប្រមាថអង្គព្រះមហាក្សត្រ និងថ្នាក់ដឹកនាំរបបក្រុងភ្នំពេញ។
សមត្ថកិច្ចឲ្យដឹងថា ជនសង្ស័យបានឆ្លើយសារភាពថា កាលពីអំឡុងឆ្នាំ២០១៨ខ្លួនបានចូលធ្វើការនៅក្រុមហ៊ុនកាស៊ីណូមួយនៅខេត្តស្វាយរៀងពេលនោះខ្លួនបានទិញទូរសព្ទSmart Phoneមួយគ្រឿង រួចក៏បង្កើតហ្វេសប៊ុក និងបានបង្ហោះ ជេរព្រះមហាក្សត្រ និងលោកហ៊ុន សែនតាមហ្វេសប៊ុករបស់ខ្លួន។
ក្រោយទទួលចម្លើយសារភាពរួច សមត្ថកិច្ចនគរបាលខេត្តស្វាយរៀងបានបញ្ជូនជនសង្ស័យរូបនេះទៅឃុំខ្លួនបណ្ដោះអាសន្ននៅពន្ធនាគារខេត្ត។ នេះមិនមែនជាលើកទី១ទេដែលសមត្ថកិច្ចចាប់ខ្លួនពលរដ្ឋករណីប្រមាថព្រះមហាក្សត្រតាមបណ្តាញសង្គមហ្វេសប៊ុក។ ក្រមព្រហ្មទណ្ឌមាត្រា៤៣៧ស្ទួនដែលទើបបានធ្វើវិសោធនកម្មរួចចែងថា អ្នកប្រមាថព្រះមហាក្សត្រអាចប្រឈមនឹងទោសជាប់ពន្ធនាគារពី១ឆ្នាំទៅ៥ឆ្នាំ និងពិន័យជាទឹកប្រាក់ពី២លានរៀល ទៅ១០លានរៀល។
កាលពីថ្ងៃទី២ខែឧសភាកន្លងទៅ ចៅក្រមជំនុំជម្រះសាលាដំបូងរាជធានីភ្នំពេញ លោករស់ ពិសិដ្ឋក៏បានប្រកាសសាលក្រមផ្តន្ទាទោសលោកសម រង្ស៊ីដាក់ពន្ធនាគារ៨ឆ្នាំ និងពិន័យជាប្រាក់២០លានរៀលចូលជាថវិកាជាតិ ក្នុងសំណុំរឿងញុះញង់ឲ្យកងទ័ពកុំស្តាប់បទបញ្ជា និងប្រមាថព្រះមហាក្សត្រផងដែរ។
មួយថ្ងៃក្រោយមក អតីតប្រធានគណបក្សសង្គ្រោះជាតិលោកសមរង្ស៊ីបានរិះគន់ធ្ងន់ៗថា ព្រះមហាក្សត្រទន់ជ្រាយគ្មានប្រយោជន៍ដល់ជាតិទេ។ជាងនេះទៅទៀត លោកបានបន្ទោសព្រះមហាក្សត្រថា ជាអ្នកបណ្តែតបណ្តោយឲ្យលោកហ៊ុន សែនយកព្រះអង្គធ្វើជាចំណាប់ខ្មាំង ហើយថា ព្រះមហាក្សត្រទន់ជ្រាយបែបនេះគឺគ្មានប្រយោជន៍ទាល់តែសោះសម្រាប់ប្រទេសជាតិគឺមានតែធ្វើឲ្យខូចខាតផលប្រយោជន៍ជាតិទៅវិញ៕