លោកគឹម សុខ អ្នកវិភាគនយោបាយដែលកំពុងរស់នៅក្រៅប្រទេសបានឡើងថា គម្រោងចូលស្រុករបស់ប្រធានស្តីទីគណបក្សសង្រ្គោះជាតិគឺលោកសម រង្ស៊ីពិតជាធ្វើឲ្យបក្ខពួករបស់លោកហ៊ុន សែនកំពុងភ័យលោះព្រលឹង។
នៅលើគណនីហ្វេសប៊ុករបស់លោកនៅថ្ងៃនេះ លោកគឹម សុខបានលើកឡើងថា ប្រសិនបើវត្តមានលោកសម រង្ស៊ីដែលធ្វើឡើងតាមផែនការសម្រេចដោយគំនិតយុទ្ធសាស្ត្រដែលពុំមានការសម្របសម្រួលណាមួយជាមួយលោកហ៊ុន សែនជាមុនទេនោះ នោះលទ្ធភាពនៃការផ្លាស់ប្ដូរនឹងមានកម្រិតខ្ពស់។
លោកបន្តទៀតថា ប៉ុន្តែបើគោលដៅនៃការចូលស្រុករបស់ក្រុមលោកសម រង្ស៊ីកំណត់យកឆ្នាំ២០១៩នេះ មិនចេញជាលទ្ធផលជាក់ស្ដែងវិញ គណបក្សប្រឆាំងទៅវិញទេ ដែលត្រូវលោះព្រលឹងវិញ ព្រោះនៅក្នុងដៃរបស់លោកហ៊ុន សែនមានគន្លឹះស្រោចស្រង់ស្ថានការណ៍អាសន្ននយោបាយរបស់គាត់មួយទៀត ក្រោយអស់ប្រព័ន្ធអនុគ្រោះ ពន្ធEBAរបស់សហភាពអឺរ៉ុប។ ប៉ុន្តែលោកគឹម សុខមិនបានបង្ហើបពីគន្លឹះនៃការស្រោចស្រង់ស្ថានការណ៍អាសន្នពីក្រុមលោកហ៊ុន សែននោះឡើយ។
អតីតប្រធានគណបក្សប្រឆាំងលោកសម រង្ស៊ីបានប្រកាសពីគម្រោងវិលចូលស្រុកខ្មែរវិញជាច្រើនលើកណាស់មកហើយ។ រហូតដល់ថ្ងៃទី ៩វិច្ឆិកាឆ្នាំ២០១៨លោកបានចេញមុខបបួលលោកហ៊ុន សែន ភ្នាល់គ្នា ទៀតផង ដោយពេលនោះ លោកសម រង្ស៊ីថា នឹងចូលស្រុកឱ្យលោកហ៊ុន សែនចាប់ខ្លួន ប្រសិនបើករណីលោកកឹម សុខាមិនត្រូវបានដោះលែងយ៉ាងយូរត្រឹមខែមីនាទេនោះ។
ករណីភ្នាល់នេះទាំងលោកសម រង្ស៊ីនិងលោកហ៊ុន សែនបានប្រកាសពីលទ្ធផលឈ្នះរៀងៗខ្លួន ប៉ុន្តែលោកកឹម សុខាវិញនៅតែបន្តជាប់ឃុំក្នុងផ្ទះរបស់ខ្លួនដដែល។ ថ្មីៗនេះទៀត លោកសម រង្ស៊ីបានបញ្ជាក់ជំហរជាថ្មីថា នឹងវិលចូលស្រុក នៅក្រោយពេលសហភាពអឺរ៉ុបសម្រេចព្យួរឬដកហូតប្រព័ន្ធអនុគ្រោះពន្ធEBAដោយថា ជាឱកាសមួយដែលរដ្ឋាភិបាលលោកហ៊ុន សែនកាន់តែទាល់ច្រក និងដើម្បីផ្តួលលោកហ៊ុន សែនយកប្រទេសជូនពលរដ្ឋខ្មែរវិញ។
យ៉ាងណាក្តីលោកគឹម សុខថា ចំពោះករណីរដ្ឋាភិបាលលោកហ៊ុន សែននៅតែអាចរក្សាបានEBAសម្រាប់កម្ពុជាបាននោះគឺគ្មានអ្វីដែលពិបាកយល់ទេ ដោយលោកថា ជាការប្រែប្រួលមួយដែលបក្ខពួកលោកហ៊ុន សែនក៏នឹងគេចផុតមួយជំហានធំពីគ្រោះមហន្តរាយនយោបាយ។
អ្នកវិភាគរូបនេះអះអាងថា រីឯក្រុមលោកសម រង្ស៊ីនិងភាគីលោក កឹម សុខាក៏បាននាំផលលាភធំជូនប្រទេសជាតិក្នុងការតស៊ូនយោបាយរបស់ពួកគាត់ ទាំងមានឱកាសកសាងកម្លាំងប្រជាធិបតេយ្យរឹងមាំព្រោះកម្ពុជានឹងវិវឌ្ឍក្នុងដំណើរប្រជាធិបតេយ្យតាមដំណាក់កាលឡើងវិញ តាមអនុសាសន៍របស់សហគមន៍អន្តរជាតិ។ លោកបន្តថា ប្រជារាស្ត្រខ្មែរអាចទទួលផលប្រជាធិបតេយ្យពិតប្រាកដ អំឡុង ពេល១៥ឆ្នាំខាងមុខ បើពួកគាត់នៅតែរួមគ្នាតស៊ូដោយមិនបោះបង់បំណងប្រាថ្នានោះ៕