គ្រូប៉ូលិសជំនាញផ្នែកក្បាច់គុនយុទ្ធក្រមខម ដែលបាន ទាត់ធាក់សិក្ខាកាមតាមចិត្តក្នុងការហ្វឹកហាត់បានចេញមុខបកស្រាយក្រោយរងការរិះគន់ថា នេះមិនមែនជាការធ្វើទារុណកម្មទេ។
ប្រតិកម្មបែបនេះធ្វើឡើងបន្ទាប់ពីអ្នកប្រើប្រាស់បណ្តាញសង្គមហ្វេសប៊ុក(Facebook)បានចែករំលែកយ៉ាងព្រោងព្រាតនូវវីដេអូខ្លីពីការហ្វឹកហាត់សិក្ខាកាមនៃកងកម្លាំងនគរបាលជាតិដែលបានឈរតម្រៀបគ្នាឲ្យគ្រូម្នាក់ដើរទាត់ធាត់ដាល់ បោកឲ្យដួល។
អ្នកប្រើប្រាស់បណ្តាញសង្គមហ្វេសប៊ុកបានរិះគន់ថា ទង្វើនេះមិនស័ក្តិសមជាការហ្វឹកហាត់ទេគឺជាការធ្វើទារុណកម្ម។ ក្នុងចំណោមអ្នករិះគន់ទាំងនោះក៏មានប្អូនស្រីលោកហ៊ុន សែនគឺអ្នកស្រីហ៊ុន ស៊ីណាតដែរបានសរសេរនៅលើហ្វេសប៊ុករបស់ខ្លួនថា នេះជាលើកទីមួយដែលអ្នកស្រីឃើញការបង្រៀនសិស្សបែបនេះ។
អ្នកស្រីចោទសួរថា ការហ្វឹកហាត់បែបនេះចេះក្បួនពីប្រទេសណា? លោកស្រីថែមទាំងនិយាយឌឺដងថា«យកល្អកុំធាក់នឹងជើងអី ទិញដែកបំពង់ទីបយកមកវ៉ៃទើបបានដឹងថា ធនឬរឹងមាំ»។
ក្រោយមានប្រតិកម្មបែបនេះ គ្រូបង្ហាត់ឈ្មោះទួន សុភក្ត្រាដែលធាត់ធាក់សិក្ខាកាមបានចេញវីដេអូបកស្រាយថា លោកជាគ្រូបង្ហាត់ក្បាច់គុនយុទ្ធក្រមខម។ លោកអះអាងថា នេះមិនមែនជាការធ្វើទារុណកម្មទេ ឬគំនុំគំកួនអ្វីទេ ប៉ុន្តែគឺការហ្វឹកហាត់ដើម្បីពង្រឹងកាយសម្បទារបស់សិក្ខាកាម។
ទោះយ៉ាងណាក្តីគេមិនទាន់ឃើញស្ថាប័ននគរបាលជាតិឬក្រសួងមហាផ្ទៃឬក៏ក្រសួងការពារជាតិចេញសេចក្តីថ្លែងការណ៍ឬប្រកាសព័ត៌មានជាផ្លូវការដើម្បីបំភ្លឺលើរឿងនេះនៅឡើយទេមកដល់ថ្ងៃទី៣០ខែឧសភានេះ៕