សមត្ថកិច្ចកម្ពុជាបានសម្រេចបញ្ជូនជនជាតិចិនម្នាក់ ទៅកាន់តុលាការក្រោយកសាងសំណុំរឿងរួចរាល់ ក្នុងករណីនាំប្រាក់ជិត១លានដុល្លារសហរដ្ឋអាមេរិកចូលមកកម្ពុជាដោយខុសច្បាប់។
ក្រុមសមត្ថកិច្ចឲ្យដឹងថា រហូតមកទល់ពេលនេះពួកគេបានបញ្ជូនខ្លួនជនជាតិចិនម្នាក់ឈ្មោះLIAO JINGQINGទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីករណីនាំលុយដែលគេសង្ស័យថា ជាលុយខុសច្បាប់ជិត១លានដុល្លារចូលមកកម្ពុជា។
បុរសជនជាតិចិនរូបនេះត្រូវបានសមត្ថកិច្ចប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញផ្អាកដំណើរ និងឃាត់ខ្លួនកាលពីថ្ងៃម្សិលមិញពាក់ព័ន្ធករណីនាំប្រាក់ចំនួនជិត១លានដុល្លារអាមេរិក(៨៥៥០០០)ពីទីក្រុងហុងកុងចូលមកប្រទេសកម្ពុជាដោយសមត្ថកិច្ចជំនាញសង្ស័យថា ជាលុយដែលមានប្រភពមិនច្បាស់លាស់ឬជាលុយខុសច្បាប់។
ប្រភពដដែលបញ្ជាក់ថា ជនសង្ស័យរូបនេះបានសារភាពថា ខ្លួនបានចូលមកកម្ពុជាចំនួន២លើកក្នុងនោះលើកទី១ កាលពីថ្ងៃទី២៦ខែឧសភា ប៉ុន្តែមិនបានបញ្ជាក់ថា បាននាំលុយសុទ្ធច្រើនចូលមកកម្ពុជាឬអត់នោះទេ។ ចំណែកលើកចុងក្រោយថ្ងៃទី២៩ខែឧសភា ក៏ត្រូវសមត្ថកិច្ចឃាត់ខ្លួនតែម្តង។
កាលពីថ្ងៃទី២៣ខែមេសា កន្លងទៅនេះ កម្លាំងជំនាញប្រចាំនៅអាកាសយានដ្ឋានអន្ដរជាតិភ្នំពេញក៏បានចាប់ខ្លួនជនសង្ស័យជាជនជាតិចិនចំនួន៣នាក់ ដែលបាននាំលុយសុទ្ធចំនួនជាង៣លានដុល្លារសហរដ្ឋអាមេរិក(៣៥២០០០០)ពីទីក្រុងហុងកុង ដោយពុំមានការបញ្ជាក់ពីប្រភពប្រាក់នោះច្បាស់លាស់ចូលមកកម្ពុជាដែរ។
ករណីនាំលុយសុទ្ធចូលមកកម្ពុជានេះ ត្រូវបានគេសង្ស័យថា មិនមែនមានតែពីរកណីនេះឡើយដោយថា ការចាប់ខ្លួនជនជាតិចិននាំប្រាក់ចូលមកក្នុងរយៈពេលចុងក្រោយនេះ អាចជាទំនាស់ផលប្រយោជន៍ សម្រាប់អ្នកដែលរួមគំនិតឃុបឃិតគ្នា ដើម្បីឱ្យជនបរទេសទាំងនេះអាចមានលទ្ធភាពនាំប្រាក់ច្រើនសន្ធឹកសន្ធាប់ចូលមកស្រុកខ្មែរបាន៕