អ្នកប្រើប្រាស់បណ្តាញសង្គមហ្វេសប៊ុកនាំគ្នារិះគន់មេប៉ូលិសដែលមិនចាត់វិធានការលើមន្រ្តីប៉ូលិសម្នាក់ដែលបន្លំលួចiPadរបស់ពលរដ្ឋ។
ប្រតិកម្មរបស់អ្នកប្រើប្រាស់បណ្តាញសង្គមហ្វេសប៊ុកបែបនេះធ្វើឡើងក្រោយពេលមន្ត្រីនៅនាយកដ្ឋានការពារព្រំដែនទឹកនៃក្រសួងមហាផ្ទៃឈ្មោះលោកហេង ហាប់ ឋាន្តរសក្តិអនុសេនីយ៍ឯកបានលួចiPadពីផ្ទះកន្លែងផ្ញើលុយមួយកន្លែងក្នុងខណ្ឌទួលគោក ក្រុងភ្នំពេញកាលពីថ្ងៃទី៣០ឧសភាម្សិលមិញប៉ុន្តែក្រោយពេលម្ចាស់ហាងបានបង្ហោះវីដេអូនៃសកម្មភាពរបស់មន្រ្តីប៉ូលិសដែលយកiPadនោះរួច ម្តាយរបស់មន្រ្តីរូបនេះបានយក iPadទៅប្រគល់ជូនម្ចាស់ដើមវិញ ដោយប្រាប់ទៅម្ចាស់ iPadនោះថា ខ្លួនច្រឡំដៃយកiPadនោះប៉ុណ្ណោះ។
ប៉ុន្តែមតិមហាជនទូទៅលើកឡើងថា ទង្វើរបស់មន្រ្តីនគរបាលរូបនេះមានចេតនាលួចរបស់គេ មិនមែនច្រឡំដៃនោះទេ។ក្នុងចំណោមអ្នករិះគន់ទាំងនោះ អ្នកប្រើហ្វេសប៊ុកម្នាក់ឈ្មោះលី បេឡាបានសរសេរលើហ្វេសប៊ុករបស់លោកថា «ឫសគល់នៃបញ្ហាសម្រាប់កម្ពុជាគឺមន្រ្តីរបស់រដ្ឋមិនព្រមចោលវប្បធម៌ការពារមន្រ្តីអាក្រក់។ គេមានទាំងវីដេអូ ហើយថា ច្រលំយកទៀត។ នេះគេហៅថា បន្លំមិនមែនច្រឡំទេ»។ លោកបន្តថា«ករណីខ្លះព្យាយាមលាក់បិទព័ត៌មាន មិនព្រមស្វែងរកការណ៍ពិតឲ្យពលរដ្ឋ ចាំទាល់តែមានកិច្ចអន្តរាគមន៍ពីនាយករដ្ឋមន្ត្រីបានធ្វើ»។
ការបង្ហាញការមិនពេញរបស់អ្នកប្រើប្រាស់បណ្តាញសង្គមបែបនេះកើតមានឡើងក្រោយពេលសមត្ថកិច្ចបានបង្ហាញលទ្ធផលនៃការស្រាវជ្រាវនេះថា មិនមែនលួចទេគឺជាករណីច្រឡំ។
អគ្គស្នងការនគរបាលជាតិលោកនេត សាវឿនបានប្រាប់សារព័ត៌មានក្នុងស្រុកដែលស្និទ្ធិនឹងរដ្ឋាភិបាលនៅថ្ងៃនេះថា«បន្ទាប់ពីបញ្ចប់ការសួរនាំនៅនាយកដ្ឋាននគរបាលព្រហ្មទណ្ឌរួច សមត្ថកិច្ចបានអនុញ្ញាតឲ្យមន្ដ្រីនគរបាលរូបនេះត្រឡប់ទៅផ្ទះវិញហើយដោយសារមន្រ្តីរូបនេះបានធ្វើកិច្ចសន្យាអប់រំ និងមានអ្នកធានាត្រឹមត្រូវ»។
លោកនេត សាវឿនបន្តថា ករណីនេះមិនមែនជាករណីលួចទេ គឺជាករណីច្រឡំហើយភាគីទាំងពីរទាំងខាងម្ចាស់ហាង និងមន្រ្តីនគរបាលក៏បានសម្របសម្រួលបញ្ចប់រឿងហើយដែរ ម្យ៉ាងទៀតម្ចាស់ហាងក៏មិនបានដាក់ពាក្យបណ្តឹងអ្វីដែរ។
ចំណែកអ្នកនាំពាក្យអគ្គស្នងការនគរបាលជាតិលោកឆាយ គឹមខឿនប្រាប់សារព័ត៌មានក្នុងស្រុកថា ឪពុកម្តាយមន្រ្តីប៉ូលិសដែលជាប់ការសង្ស័យរូបនេះ បានអះអាងប្រាប់សមត្ថកិច្ចថា មួយរយៈចុងក្រោយនេះកូនរបស់ខ្លួនមានសតិមិនល្អនោះទេ។
ទោះជាយ៉ាងណាក៏ដោយហ្វេសប៊ុកឈ្មោះVichet Chan បានសរសេរថា «ឲ្យ តែបែបនេះចុះ នោះស្រុកយើងច្បាស់ជាមានអាត្រាចោរលួចកើនឡើងហើយ នៅ ពេលលួចគេទាន់ឆ្លើយថា ច្រឡំទៅគឺរួចខ្លួនហើយ!»
ចំណែកគណនីហ្វេសប៊ុកឈ្មោះSotheara Yoeurngបានសរសេរថាបើអនុវត្តអភិក្រមទាំងប្រាំឆ្លុះកញ្ចក់ ងូតទឹក ដុះក្អែល ព្យាបាល និងវះកាត់ មិនបាន នោះ រដ្ឋាភិបាលនឹងបរាជ័យចំពោះកំណែទម្រង់របស់ខ្លួនក្នុងអាណត្តិទី៦នេះហើយ៕