27 C
Phnom Penh

ស្នងការ​ខេត្ត​ព្រះ​សីហនុ​កំពុង​កសាង​សំណុំ​រឿង​ករណី​រំលោភ​និង​សម្លាប់​ក្មេង​ពីរ​នាក់​ទៅ​តុលាការ​

ដោយ ឌឹ ខេមបូឌា ដេលី

បទវិភាគ

ស្នងការ​ខេត្ត​ព្រះ​សីហនុ​កំពុង​កសាង​សំណុំ​រឿង​ករណី​រំលោភ​និង​សម្លាប់​ក្មេង​ពីរ​នាក់​ទៅ​តុលាការ។​ ចំណាត់​ការ​បែប​នេះ​ ធ្វើ​ឡើង​ក្រោយ​ពេល​សមត្ថ​កិច្ច​ជំនាញ​ចាប់​ខ្លួន​ជន​សង្ស័យ​ពី​ខេត្ត​ព្រៃវែង​កាលពី​ថ្ងៃ​អាទិត្យ​ម្សិលមិញ​និង​ត្រូវ​បញ្ជូន​ទៅ​សួរ​ចម្លើយ​នៅ​ខេត្ត​ព្រះ​សីហនុ។​

លោក​ជួន ណារិន​ស្នងការ​នគរបាល​ខេត្ត​ព្រះ​សីហនុ​បាន​ប្រាប់​ក្រុម​អ្នក​សារ​ព័ត៌មាន​ថា ​ជន​សង្ស័យ​ឈ្មោះ​ម៉ៅ វិចិត្រ ​អាយុ​៣០​ឆ្នាំ ​បាន​សារភាព​ថា​ ខ្លួន​ពិត​ជា​បាន​ធ្វើ​សកម្ម​ភាព​រំលោភ ​និង​សម្លាប់​ កុមារ​ពីរ​នាក់​នៅ​ឃុំ​បិតត្រាំង ​ស្រុក​ព្រៃ​នប់​កាលពី​សប្តាហ៍​មុន​មែន។​

លោក​ឲ្យ​ដឹងថា ​សមត្ថ​កិច្ច​អាច​នឹង​ចោទ​ប្រកាន់​ជន​សង្ស័យ​ចំនួន​ពីរ​បទ​ល្មើស​គឺ​រំលោភ​និង​សម្លាប់។​ លោក​បន្ត​ថា​ ជន​សង្ស័យ​សារភាព​ថា​ មុន​ធ្វើ​សកម្ម​ភាព​ជន​សង្ស័យ​បាន​ប្រើ​ប្រាស់​គ្រឿង​ញៀន​ និង​ផឹក​ស្រា។​

អំពើ​រំលោភ​សម្លាប់​កុមារ​ទាំង​ពីរ​នាក់​បង​ប្អូន​នេះ​ កើត​ឡើង​លើ​ដី​ឡូតិ៍​មួយ​កន្លែង​នៅ​ស្រុក​ព្រៃនប់​ខេត្ត​ព្រះ​សីហនុ​ កាល​ពី​ថ្ងៃ​ទី​២៩​ខែ​ឧសភា។ ​ក្មេង​រង​គ្រោះ​ពីរ​នាក់​បង​ប្អូន​មាន​ឈ្មោះ​ ផា ស្រី​ល័ក្ខ ​អាយុ​ ១០​ឆ្នាំ​ភេទ​ស្រី ​និង​ប្អូន​ប្រុស​ផាសុខលី​អាយុ​២​ឆ្នាំ។​

រហូត​មក​ទល់​ពេល​នេះ ​សមត្ថ​កិច្ច​ខេត្ត​ព្រះ​សីហនុ​បាន​សម្រេច​មិន​បញ្ជូន​ជន​សង្ស័យ​ទៅ​ធ្វើ​​ត្រាប់​នៅ​កន្លែង​កើត​ហេតុ​ទេ​ ព្រោះ​ពេល​នេះ​មាន​ពលរដ្ឋ​ប្រមាណ​២​ពាន់​នាក់​មាន​ខ្លះ​កាន់​ដំបង​ និង​ដុំ​ថ្ម​ថែម​ទៀត​ដូច្នេះ​សមត្ថ​កិច្ច​ខ្លាច​ពល​រដ្ឋ​ទប់​កំហឹង​មិន​បាន​ អាច​បង្ក​ជា​បញ្ហា។​

សាធារណ​ជន​មួយ​ចំនួន​ជាពិសេស​អ្នក​ប្រើ​ប្រាស់​បណ្តាញ​សង្គម​ហ្វេសហ៊ុក​បង្ហាញ​ការ​ខឹង​សម្បារ​ជាខ្លាំង​ទៅ​លើ​ជន​សង្ស័យ​រូប​នេះ​ ហើយ​អ្នក​ខ្លះ​ទាមទារ​ឲ្យ​មាន​កាត់​ទោស​ប្រហារ​ជីវិត​ជន​សង្ស័យ​រូប​នេះ​ទៀត​ផង។​

លោក​ហ៊ុន សែន ​កាល​ពី​ខែ​មីនា​ បាន​ប្រកាស​ជំហរ​ចង់​ឲ្យ​មាន​ការ​កាត់​ទោស​ប្រហារ​ជីវិត​ជនណា​ ដែល​រំលោភ​សម្លាប់​កុមារ​ ប៉ុន្តែ​ក្រោយ​មក​លោក​ក៏​កែ​ប្រែ​គោល​ជំហរ​របស់​លោក​វិញ៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស