ក្រុមអ្នកឃ្លាំមើលជំរុញឲ្យមេដឹកនាំបក្សប្រឆាំង និងមេដឹកនាំបក្សកាន់អំណាច កុំយកទឹកដីកម្ពុជាធ្វើជាទីលានប្រយុទ្ធគ្នាដែលបណ្តាលឲ្យពលរដ្ឋខ្មែររងទុក្ខមិនចេះចប់។
អ្នកវិភាគនយោបាយឯករាជ្យលោកបណ្ឌិតឡៅ ម៉ុងហៃអះអាងថា មេដឹកនាំនយោបាយទាំងពីររូបគឺលោកសម រង្ស៊ីនិងលោកហ៊ុន សែនបានចាត់ទុកគ្នាជាសត្រូវផ្ទាល់ខ្លួន ហើយច្បាំងតតាំងស៊ីសាច់គ្នារហូតដល់ស្លាប់។
លោកបន្តថា ប្រសិនបើពួកគេចាត់ទុកគ្នាជាសត្រូវផ្ទាល់ខ្លួនដូច្នេះមែននោះពួកគេគួរជ្រើសទីលានប្រយុទ្ធទៅកន្លែងផ្សេង ហើយកុំនាំគ្នាច្បាំងស៊ីសាច់ហុតឈាមគ្នារហូតដល់ស្លាប់ក្នុងសង្វៀននយោបាយខ្មែរ ដើម្បីកុំឲ្យពលរដ្ឋរងទុក្ខលំបាកដោយជម្លោះទាំងនេះ។
ការអះអាងរបស់លោកបណ្ឌិតឡៅម៉ុងហៃធ្វើឡើងក្រោយពីលោកហ៊ុន សែននិយាយនៅក្នុងពិធីចែកសញ្ញាប័ត្រដល់និស្សិតសាកលវិទ្យាល័យភូមិន្ទភ្នំពេញកាលពីព្រឹកមិញក្នុងការប្រកាសបបួលអតីតមេដឹកនាំបក្សសង្គ្រោះជាតិលោកសម រង្ស៊ី ចេញមកស្បថដាក់ជីវិតខ្លួនឯងក្រុមគ្រួសារនិងសាច់ញាតិព្រមទាំងមនុស្សជំនិត១០០នាក់ផង ដើម្បីឱ្យច្បាស់ថា តើអ្វីដែលលោកសម រង្ស៊ីចោទលោកហ៊ុន សែនថា ជាអ្នករៀបចំល្បិចសម្លាប់លោកហុក ឡងឌី អតីតអគ្គស្នងការនគរបាលជាតិជាការណ៍ពិតឬយ៉ាងណា?
កាលពីថ្ងៃទី២ខែមិថុនា លោកសមរង្ស៊ីបានសរសេរនៅលើទំព័រហ្វេសប៊ុករបស់លោកថា លោកហ៊ុន សែនជាអ្នកដាក់បង្កៃគ្រាប់បែកលើយន្តហោះធ្វើឃាតលោកហុក ឡង់ឌីកាលពីឆ្នាំ២០០៨ ហើយថា សព្វថ្ងៃនេះលោកឌី វិជ្ជាកូនប្រុសបង្កើតរបស់លោកហុក ឡង់ឌីនិងជាកូនប្រសាររបស់លោកហ៊ុន សែនដែរនោះកំពុងរៀបចំផែនការសងសឹកដោយសហការជាមួយលោកសខេងរដ្ឋមន្ត្រីក្រសួងមហាផ្ទៃ។
ទោះជាយ៉ាងណាក៏ដោយក្រុមសង្គមស៊ីវិលក្នុងស្រុកបានជំរុញឲ្យក្រុមមេដឹកនាំទាំងពីរនាំគ្នាគិតគូអំពីផលប្រយោជន៍ជាតិជាធំខណៈកម្ពុជាកំពុងប្រឈមទៅនឹងវិបត្តិសេដ្ឋកិច្ចធ្ងន់ធ្ងរប្រសិនបើសហគមន៍អឺរ៉ុបសម្រេចផ្អាកប្រព័ន្ធអនុគ្រោះពន្ធEBAពីកម្ពុជានោះ៕