អង្គការសង្គមស៊ីវិលនិងសហគមន៍ចំនួន៨៥បានចេញសេចក្តីថ្លែងការណ៍រួមគ្នាមួយស្នើឲ្យរដ្ឋាភិបាលស្តារសិទ្ធិមនុស្ស និងប្រជាធិបតេយ្យឡើងវិញដើម្បីបញ្ចៀសទណ្ឌកម្មសេដ្ឋកិច្ច។
សំណើនិងកង្វល់របស់ក្រុមអង្គការសង្គមស៊ីវិលបែបនេះ ធ្វើឡើងចំពេលដែល គណៈប្រតិភូពិសេសរបស់សហភាពអឺរ៉ុបមកបំពេញទស្សនកិច្ចជាថ្មីនៅកម្ពុជាចាប់ពីថ្ងៃច័ន្ទទី៣ មិថុនារហូតដល់ថ្ងៃទី៧ ខែមិថុនានេះដើម្បីស្វែងរកការណ៍ពិតពាក់ព័ន្ធបញ្ហាសិទ្ធិមនុស្ស និងលទ្ធិប្រជាធិបតេយ្យ ជាពិសេសសិទ្ធិការងារ និងសិទ្ធិនយោបាយមុននឹងឈានទៅសម្រេចចុងក្រោយថា តើត្រូវដក ឬមិនដកប្រព័ន្ធអនុគ្រោះពន្ធ EBAពីកម្ពុជា។
ក្នុងសេចក្ដីថ្លែងការណ៍រួមនេះ ក្រុមអ្នកតាមដានបញ្ហាសង្គមកម្ពុជា បង្ហាញក្តីកង្វល់ថា រដ្ឋាភិបាលលោកហ៊ុន សែនបានធ្វើឲ្យការគោរពសិទ្ធិមនុស្ស និងប្រជាធិបតេយ្យបានធ្លាក់ចុះជាបន្តបន្ទាប់ចាប់តាំងពីការបោះឆ្នោតជ្រើសតាំងតំណាងរាស្ត្រឆ្នាំ២០១៨និងក្រោយការផាត់គណបក្សប្រឆាំងដែលមានអ្នកគាំទ្រជិតពាក់កណ្ដាលប្រទេសចេញ ពីបញ្ជីនយោបាយ ការធ្វើទុក្ខបុកម្នេញលើសង្គមស៊ីវិលនិងប្រព័ន្ធផ្សព្វផ្សាយឯករាជ្យជាដើម។
ក្រុមសង្គមស៊ីវិលលើកឡើងក្នុងសេចក្ដីថ្លែងការណ៍នោះដោយរំឭកទៅរដ្ឋាភិបាលលោកហ៊ុន សែនថា ស្មារតីនៃកិច្ចព្រមព្រៀងទីក្រុងប៉ារីសគឺតម្រូវឲ្យការកសាងនិងការអភិវឌ្ឍប្រទេសត្រូវតែភ្ជាប់ទៅនឹងការគោរពសិទ្ធិមនុស្ស និងលទ្ធិប្រជាធិបតេយ្យដើម្បីបង្ការកុំឲ្យ ប្រវត្តិសាស្រ្តអតីតកាលដ៏ជូរចត់វិលត្រឡប់មកកម្ពុជាវិញ។
ទោះជាយ៉ាងណាក៏ដោយ អ្នកនាំពាក្យគណបក្សប្រជាជនកម្ពុជា លោកសុខ ឥសានបានព្រមានថា សេចក្តីថ្លែងការណ៍នេះគ្រាន់តែមតិភាគតិចប៉ុណ្ណោះ បើធៀបទៅនឹងចំនួនអង្គការសង្គមស៊ីវិលនៅកម្ពុជាដែលមានជាង៥០០០ស្ថាប័ន។ អ្នកនាំពាក្យរូបនេះចោទថា សេចក្តីថ្លែងការណ៍របស់ក្រុមសង្គមស៊ីវិលទាំងនេះ ជាសកម្មភាពញុះញុង និងជាការជ្រៀតជ្រែកផ្នែកនយោបាយដែលផ្ទុយពីគោលការណ៍របស់ខ្លួនដែលបានតម្កល់ទុកនៅក្រសួងមហាផ្ទៃ៕