ប៉ូលិសអន្តោប្រវេសន៍រកឃើញថា ជនអន្តោប្រវេសន៍ជិត២ម៉ឺនគ្រួសារកាន់កាប់ឯកសារមិនត្រឹមត្រូវជិត៤ម៉ឺនច្បាប់ ហើយសម្រេច ដកហូតឯកសារទាំងនោះតែម្តង។
ជនអន្តោប្រវេសន៍ទាំងនោះរួមមាន៖ ជនជាតិចិន ថៃ ឡាវ និងវៀតណាមជាដើម ដែលអ្នកខ្លះមករកស៊ីនិងមករស់នៅលើទឹកដីកម្ពុជា។
ឯកសារជិត៤ម៉ឺនច្បាប់ដែលអគ្គនាយកដ្ឋានអន្ដោប្រវេសន៍ដកហូតពីជនបរទេសរស់នៅកម្ពុជាក្នុងរយៈពេល៥ខែនេះរួមមាន៖ សៀវភៅស្នាក់នៅ សៀវភៅគ្រួសារ សំបុត្រកំណើត សំបុត្រអាពាហ៍ពិពាហ៍ អត្តសញ្ញាណប័ណ្ណសញ្ជាតិខ្មែរ និងលិខិតឆ្លងដែន។
មន្រ្តីសង្គមស៊ីវិលរិះគន់ថា ការដែលជនបរទេសអាចប្រើប្រាស់និងកាន់កាប់ឯកសារមិនប្រក្រតីទាំងនោះបាន ដោយសារតែអំពើពុករលួយដែលបង្កឡើងដោយសមត្ថកិច្ចជំនាញ និងភាពធូររលុងរបស់អាជ្ញាធរ មូលដ្ឋាន៕