វៀតណាមបានសម្តែងការខកចិត្តចំពោះថ្នាក់ដឹកនាំប្រទេសសិង្ហបុរី លោក លី សៀនឡុងដែលបានលើកឡើងថា ខ្លួនបានឈ្លានពានកម្ពុជានៅក្នុងអំឡុងឆ្នាំl១៩៧៩។
អ្នកនាំពាក្យក្រសួងការបរទេសវៀតណាម កាលពីម្សិលមិញបានបង្ហាញការសោកស្ដាយចំពោះការលើកឡើងរបស់មេដឹកនាំសិង្ហបុរីដែលធ្វើឡើងអំឡុងពេលកិច្ចសន្ទនាសន្តិសុខ Shangri-La និងនៅលើបណ្ដាញសង្គមហ្វេសប៊ុករបស់លោក ដោយចាត់ទុកការលើកឡើងរបស់មេដឹកនាំសិង្ហបុរីថា មិនបានឆ្លុះបញ្ចាំងការណ៍ពិតនៃប្រវត្តិសាស្ត្រ និងបង្កឲ្យមានផលប៉ះពាល់អវិជ្ជមានក្នុងចំណោមសាធារណមតិផងដែរ។
ទំព័រហ្វេសប៊ុករបស់នាយករដ្ឋមន្ត្រីសិង្ហបុរីលោក លី សៀនឡុង កាលពីថ្ងៃទី៣១ខែឧសភាបានសរសេររំលែកមរណទុក្ខ និងបង្ហាញការស្ងើចសរសើរភាពជាអ្នកដឹកនាំរបស់លោក ព្រេម ទីនស៊ូឡានុន អតីតនាយករដ្ឋមន្ត្រីថៃក្នុងទសវត្សរ៍១៩៨០និងជាអតីតទីប្រឹក្សាផ្ទាល់របស់ព្រះមហាក្សត្រថៃ ដែលទើបបានទទួលមរណភាពកាលពីថ្ងៃទី២៦ខែឧសភា។
លោកលី សៀនឡុងបាននិយាយថាព្រឹត្តិការណ៍ប្រវត្តិសាស្ត្រដែលកើតឡើងនៅកម្ពុជាតែពាក់ព័ន្ធវៀតណាមផងដែរ។
លោកបានបញ្ជាក់ថា អំឡុងពេលដែលលោកព្រេម ទីនស៊ូឡានុនធ្វើជានាយករដ្ឋមន្ត្រីថៃនោះ វាក៏ជាពេលដែលសមាជិកអាស៊ានទាំង៥នៅពេលនោះ បានប្រឆាំងនឹងការឈ្លានពានរបស់វៀតណាមមកលើកម្ពុជា និងរដ្ឋាភិបាលក្រុងភ្នំពេញដែលមកជំនួសរបបខ្មែរក្រហមពេលនោះផងដែរ។
លោកថា ប្រទេសថៃបានប្រឈមនឹងកងទ័ពវៀតណាមនៅតាមបណ្តោយព្រំដែនរបស់ខ្លួនជាមួយកម្ពុជា ហើយលោកព្រេមបានសម្រេចចិត្តយ៉ាងមុតមាំដោយមិនទទួលយកអ្វីដែលកំពុងកើតឡើងនោះ និងថែមទាំងបានធ្វើការជាមួយដៃគូក្នុងតំបន់អាស៊ានដើម្បីប្រឆាំងវៀតណាមនៅតាមវេទិកាអន្តរជាតិនានាទៀតផង។
នៅថ្ងៃទី៧ខែមករា១៩៧៩ រដ្ឋាភិបាលវៀតណាម ដោយមានការសហការជាមួយអតីតមន្ត្រីខ្មែរក្រហមមួយចំនួនបានលើកទ័ពវាយរំដោះយកបានទីក្រុងភ្នំពេញពីរបបខ្មែរក្រហមដឹកនាំដោយប៉ុល ពតហើយក៏លើកបន្តុបក្រុមខ្មែរវៀតមិញ និងអតីតមន្ត្រីជាន់ខ្ពស់សម័យខ្មែរក្រហមដឹកនាំ ដែលមានលោកប៉ែន សុវណ្ណជានាយករដ្ឋមន្ត្រី។
ការលើកទ័ពរំដោះនោះ ត្រូវបានអន្តរជាតិចាត់ទុកថា ជាការឈ្លានពានទាំងស្រុងពីសំណាក់ភាគីវៀតណាម ហើយផ្ទុយពីច្បាប់អន្តរជាតិទៀតផង៕