អតីតតំណាងរាស្ត្រគណបក្សសង្គ្រោះជាតិបីរូបចុះហត្ថលេខាលើសេចក្តីថ្លែងការណ៍មួយ អំពាវឲ្យគណៈកម្មាធិការពាណិជ្ជកម្មអឺរ៉ុបដែលកំពុងមានវត្តមាននៅប្រទេសកម្ពុជាជួយសម្របសម្រួលស្តារលទ្ធិប្រជាធិបតេយ្យការគោរពសិទ្ធិនិងរក្សាEBAដល់កម្ពុជាឲ្យនៅដដែល។
អតីតតំណាងរាស្ត្រគណបក្សសង្គ្រោះជាតិទាំងបីរូបគឺលោកអ៊ូច័ន្ទរ័ត្ន លោក ជីវ កក្តា លោកកង គឹមហាក់បានលើកឡើងក្នុងសេចក្តីថ្លែងការណ៍ចុះនៅថ្ងៃទី៥ ខែមិថុនានេះប្រាប់ទៅ អ្នកដឹកនាំនយោបាយគ្រប់និន្នាការគួរតែងាកមកស្វែងរកដំណោះស្រាយនយោបាយ បញ្ហាចំពោះមុខរវាងខ្មែរនិងខ្មែរ ក្រោមម្លប់នៃអង្គព្រះមហាក្សត្រ ស្របតាមរដ្ឋធម្មនុញ្ញ ដើម្បីបញ្ចប់វិបត្តិនយោបាយ រក្សាប្រព័ន្ធអនុគ្រោះ EBA របស់អ៊ឺរ៉ុបនិង GSP របស់អាមេរិក ហើយស្តារលទ្ធិប្រជាធិបតេយ្យនិងការគោរពសិទ្ធិមនុស្សឲ្យបានពេញលេញឡើងវិញ។
អតីតតំណាងរាស្រ្តគណបក្សប្រឆាំងដដែលបន្តទៀតថា ប្រសិនកម្ពុជាបាត់បង់ប្រព័ន្ធអនុគ្រោះពន្ធនេះ នឹងធ្វើឲ្យប៉ះពាល់ដល់ជីវភាពប្រជាពលរដ្ឋខ្មែររាប់លាននាក់ការលូតលាស់របស់កម្ពុជា ហើយអាចនាំឲ្យប្រទេសស្ថិតក្នុងភាពប្រថុយប្រថានទាំងសេដ្ឋកិច្ច និងនយោបាយ។
អតីតតំណាងរាស្ត្រគណបក្សសង្គ្រោះជាតិទាំងបីរូបនេះអះអាងថា ការបន្ទន់ឥរិយាបថរកគ្នារវាងថ្នាក់ដឹកនាំនយោបាយខ្មែរ គឺជាគន្លឹះដែលឈានទៅរកដំណោះស្រាយរវាងខ្មែរនិងខ្មែរបាន ដើម្បីអាចការពារសមិទ្ធផលទាំងផ្នែកប្រជាធិបតេយ្យ និងសេដ្ឋកិច្ចដែលកម្ពុជាបានប្រឹងប្រែងកសាងកន្លងមក និងទៅអនាគត។សំណើនិងកង្វល់របស់អតីតមន្ត្រីជាន់ខ្ពស់គណបក្សសង្រ្គោះជាតិបែបនេះធ្វើឡើង ខណៈ គណៈកម្មាធិការពាណិជ្ជកម្មអឺរ៉ុបកំពុងបំពេញបេសកកម្មស្វែងរកការណ៍ពិតនៅកម្ពុជាមុននឹងសម្រេចថា ត្រូវព្យួរឬបន្ត ផ្តល់ប្រព័ន្ធអនុគ្រោះពន្ធដល់កម្ពុជា និងស្របពេលដែលគណៈប្រតិភូមួយក្រុមនៃតំណាងពាណិជ្ជកម្មសហរដ្ឋអាមេរិក និងមន្រ្តីជាន់ខ្ពស់នៃក្រសួងការបរទេសសហរដ្ឋអាមេរិកកំពុងធ្វើទស្សនកិច្ចនៅកម្ពុជាពីថ្ងៃទី៣ដល់ថ្ងៃទី៧ខែមិថុនានេះ ដើម្បីពិភាក្សាពីបញ្ហាពាណិជ្ជកម្មទ្វេភាគី ដោយរាប់ទាំងបទដ្ឋានបច្ចេកទេសយានយន្ត ក៏ដូចជាស្ថានភាពវិស័យការងារនៅប្រទេសកម្ពុជាផងដែរ។ គណៈប្រតិភូទាំងនោះដឹកនាំដោយKarl Ehlers ឧបការីរដ្ឋមន្រ្តីក្រសួងពាណិជ្ជកម្មសហរដ្ឋអាមេរិក ទទួលបន្ទុកការិយាល័យប្រចាំតំបន់អាស៊ីអាគ្នេយ៍ និងប៉ាស៊ីហ្វិក និងលោកLewis Karesh ឧបការីរដ្ឋមន្រ្តីក្រសួងពាណិជ្ជកម្មសហរដ្ឋអាមេរិក៕