ប្រមុខដឹកនាំរដ្ឋាភិបាលលោកហ៊ុន សែនបានលើកឡើងថា កុំមានការយល់ច្រឡំ ឬបកស្រាយខុស ដោយលោកពន្យល់ថា កម្មវិធីហូបនំបញ្ចុកសាមគ្គីជាតិជាទ្រង់ទ្រាយធំនេះគឺដើម្បីបង្ហាញសាមគ្គីជាតិ និងឯកភាពជាតិប៉ុណ្ណោះ ប៉ុន្តែគ្មានការចរចានយោបាយណាមួយនៅពីក្រោយពិធីហូបនំបញ្ចុកនេះឡើយ។
ថ្លែងក្នុងពិធីចែកសញ្ញាបត្រជូននិស្សិតនៅរាជធានីភ្នំពេញនាព្រឹកនេះ លោកហ៊ុន សែនបញ្ជាក់ថា ការហូបនំបញ្ចុកសាមគ្គីជាតិដ៏ធំដែលនឹងធ្វើនៅថ្ងៃទី៩ មិថុនានេះគឺត្រូវធ្វើឡើងដោយគ្មានការប្រកាន់បក្សនយោបាយឡើយ ប៉ុន្តែលោកបដិសេធថា គ្មានការចរចានយោបាយណាមួយឡើយ។
ទោះជាយ៉ាងណាលោកណែនាំឲ្យសមាជិកគណបក្សរបស់លោកនិងពលរដ្ឋទូទៅចូលរួមពិធីហូបនំបញ្ចុក ដែលលោកនិយាយថា ជាការហូបនំបញ្ចុកសាមគ្គីជាតិ និងឯកភាពជាតិនេះត្រូវធ្វើឡើងជាទ្រង់ទ្រាយធំនៅចុងសប្តាហ៍នេះ ដោយគ្មានការប្រកាន់គណបក្សនយោបាយ។
លោកហ៊ុន សែនប្រកាសដូច្នេះក្រោយពេលអតីតប្រធានគណបក្សសង្រ្គោះជាតិលោកសម រង្ស៊ីបានណែនាំឲ្យអ្នកគាំទ្រលោកចូលរួមពិធីហូបនំបញ្ចុកជាទ្រង់ទ្រាយធំ នៅថ្ងៃទី៩មិថុនាដើម្បីបង្ហាញភាតរភាពក្នុងនាមមហាគ្រួសារខ្មែរ។
សកម្មភាពហូបនំបញ្ចុករបស់អតីតសកម្មជនបក្សប្រឆាំងកន្លងមក តែងទទួលរងការរារាំង និងសួរនាំពីសំណាក់អាជ្ញាធរលោកហ៊ុន សែន។
ជាក់ស្តែងសកម្មភាពហូបនំបញ្ចុករបស់អតីតសកម្មជនបក្សសង្រ្គោះជាតិនៅឃុំពាមប្រធ្នោះ ស្រុកកោះសូទិន ខេត្តកំពង់ចាម នៅថ្ងៃនេះក៏រងការរំខាន និងបញ្ជាឱ្យផ្អាកសកម្មភាពហូបចុកនោះដែរ។
វីដេអូមួយដែលបង្ហោះលើបណ្តាញសង្គមហ្វេសប៊ុកនៅថ្ងៃនេះ បង្ហាញសកម្មភាពនាយប៉ុស្តិ៍រដ្ឋបាលឃុំពាមប្រធ្នោះ លោកហេង ប៊ុនថនបានដឹកនាំកម្លាំងចុះទៅផ្ទះអតីតមេឃុំពាមប្រធ្នោះមកពីគណបក្សសង្រ្គោះជាតិលោកសេក សណ្តាប់ ដោយប្រាប់ឱ្យម្ចាស់ផ្ទះរំសាយការជួបជុំនេះ ក្រោមហេតុផលថា អតីតសកម្មជនបក្សប្រឆាំងមិនបានសុំច្បាប់ហូបនំបញ្ចុកពីអាជ្ញាធរជាមុន។
យ៉ាងនេះក្តី សកម្មជនបក្សប្រឆាំងនៅតែបន្តហូបនំបញ្ចុក រហូតដល់ចប់ ទោះបីជាមានការសួរនាំនិងប្រាប់ឱ្យបញ្ឈប់សកម្មភាពនៅព្រឹកនេះក្តី ដោយពួកគេអះអាងថា ពួកគេមិនបានធ្វើខុសច្បាប់ ហើយប្រមុខដឹកនាំលោកហ៊ុន សែនក៏បានប្រកាសឱ្យពលរដ្ឋទូទាំងប្រទេសនាំគ្នាហូបនំបញ្ចុកសាមគ្គីទៀតផង។
ប្រធានក្រុមអ្នកវិភាគវ័យក្មេងកញ្ញាលី ស្រីស្រស់អះអាងកាលពីពេលថ្មីៗនេះថា ការហូបនំបញ្ចុកផ្សះផ្សាជាតិនឹងមិនអាចកើតឡើងបានឡើយ ប្រសិនបើក្រុមមួយហូបដោយសប្បាយចិត្តគ្មានការសួរនាំ ខណៈក្រុមម្ខាងទៀតត្រូវបានអាជ្ញាធរសួរនាំគ្រប់ពេលទទួលទាននោះ។
កញ្ញាបន្តថា ការផ្សះផ្សាជាតិវាមិនមែនអាស្រ័យលើការហូបនំបញ្ចុកនោះទេ តែការសាមគ្គីជាតិឬការផ្សះផ្សាជាតិត្រូវការឆន្ទៈ និងកាយវិការអាធ្យាស្រ័យគ្នាពិតប្រាកដរវាងអ្នកនយោបាយនឹងអ្នកនយោបាយ៕