លោកហ៊ុន សែននិងលោកស ខេងរួមគ្នារៀបចំប្ដឹងលោកសម រង្ស៊ីទៅតុលាការប្រទេសបារាំងរឿងលោកសម រង្ស៊ីចោទលោកហ៊ុន សែនថា ជាអ្នកសម្លាប់លោកហុក ឡងឌី។
វិធានការផ្លូវច្បាប់នេះត្រូវបានលោកហ៊ុន សែនប្រកាសជាផ្លូវការក្នុងកិច្ចប្រជុំគណៈរដ្ឋមន្រ្តីនៅថ្ងៃទី៧ខែមិថុនា។ នេះបើតាមការអះអាង របស់អ្នកនាំពាក្យរដ្ឋាភិបាលលោកផៃ ស៊ីផាន។
អ្នកនាំពាក្យរូបនេះឲ្យដឹងទៀតថា គម្រោងប្តឹងលោកសម រង្ស៊ីទៅតុលាការប្រទេសបារាំងបែបនេះគឺដើម្បីស្វែងរកយុត្តិធម៌ជាសកល ជូន លោកហ៊ុន សែនដែលត្រូវលោកសម រង្ស៊ីចោទប្រកាន់ថា លោកជាអ្នកសម្លាប់លោកហុក ឡងឌីអតីតអគ្គស្នងការនគរបាលជាតិ។
មុនពេលលោកហ៊ុន សែនសម្រេចប្តឹងលោកសម រង្ស៊ីបែបនេះ មេដឹកនាំដែលមានជំនឿលើការស្បថស្បែរូបនេះបានបបួលលោកសម រង្ស៊ីស្បថដាក់ជីវិតខ្លួនឯង ក្រុមគ្រួសារ និងសាច់ញាតិ ព្រមទាំងមនុស្សជំនិត១០០នាក់ បើថា លោកពិតជាបានរៀបចំគម្រោងសម្លាប់លោកហ៊ុក ឡង់ឌីពិតមែននោះ។ ប៉ុន្តែលោកសម រង្ស៊ីមិនបានឆ្លើបតបនិងសំណើនេះទេ។
មេដឹកនាំគណបក្សប្រឆាំងរូបនេះចាត់ទុកថា ការស្បថគ្រាន់តែវិធីបែបកូនក្មេងតែប៉ុណ្ណោះ។លោកសម រង្ស៊ីបានបង្ហោះសារតាមទំព័រហ្វេសប៊ុកកាលពីថ្ងៃទី២ខែមិថុនា ដោយចោទប្រកាន់ថា លោកហ៊ុន សែនជាអ្នកបញ្ជាឱ្យសម្លាប់លោកហុក ឡងឌីហើយពេលនេះថា កូនប្រុសរបស់លោកហុក ឡងឌីគឺលោកឌី វិជ្ជាដែលជាកូនប្រសាររបស់លោកហ៊ុន សែនដែរនោះកំពុងរៀបចំផែនការជាមួយលោកស ខេងដើម្បីរកវិធីសងសឹកលោកហ៊ុន សែនវិញ។
លោកសម រង្ស៊ីអះអាងថា ឃាតកម្មទៅលើលោកហុក ឡង់ឌីដែលរៀបចំឡើងដោយលោកហ៊ុន សែននេះដោយសារតែលោកហុក ឡងឌីដឹងរឿងអាក្រក់របស់លោកហ៊ុន សែនច្រើនពេក។
លោកហុក ឡងឌីដែលជាអគ្គស្នងការនគបាលជាតិបានស្លាប់ក្នុងករណីធ្លាក់ឧទ្ធម្ភាគចក្រមួយកាលពីថ្ងៃទី៩ខែវិច្ឆិកាឆ្នាំ២០០៨នៅខេត្តស្វាយរៀង។ របាយការណ៍របស់សមត្ថកិច្ចបញ្ជាក់ថា ករណីស្លាប់នេះដោយសារបណ្តាលមកពីអាកាសធាតុអាក្រក់ដែលមានភ្លៀងធ្លាក់ខ្លាំង និងរន្ទៈ៕