កម្លាំងនគរបាលខេត្តបន្ទាយមានជ័យចាប់ខ្លួនជនសង្ស័យ១៥៥នាក់ ពាក់ព័ន្ធករណីគ្រឿងញៀនក្នុងកាស៊ីណូឡាក់គី នៅក្រុងប៉ោយប៉ែត។
ការបង្ក្រាបកាលពីថ្ងៃម្សិលមិញនេះសមត្ថកិច្ចបានឃាត់ខ្លួនអ្នកចែកចាយគ្រឿងញៀនចំនួន៥នាក់មេការ២នាក់ បុគ្គលិក៤នាក់និងអ្នកប្រើប្រាស់គ្រឿងញៀនចំនួន១៤៤នាក់ និងរឹបអូបានវត្ថុតាងមួយចំនួនធំ។ ប៉ុន្តែសមត្ថកិច្ចមិនទាន់បង្ហាញពីម្ចាស់មេខ្លោងឬថៅកែកាស៊ីណូនេះនៅឡើយទេ។
ស្នងការនគរបាលខេត្តបន្ទាយមានជ័យលោកអាត់ ខែមបានប្រាប់សារព័ត៌មានក្នុងស្រុកនៅថ្ងៃទី១៩ខែមិថុនានេះថា ប្រតិបត្តិការបង្ក្រាបរបស់កម្លាំងនគរបាល បានធ្វើការស្រាវជ្រាវជាច្រើនថ្ងៃ និងធ្វើការសម្របសម្រួលយ៉ាងម៉ត់ចត់ពីព្រះរាជអាជ្ញា។
លោកបន្តថា ពេលនេះសមត្ថកិច្ចបានបញ្ជូនជនសង្ស័យ និងវត្ថុតាងទៅសាលាដំបូងខេត្តដើម្បីចាត់ការតាមនិតិវិធី។ នេះជាការ បង្ក្រាបកន្លែងចែកចាយគ្រឿងញៀនធំទី៣ហើយ ក្រោយពីមានការបង្រ្កាបបនល្បែងស៊ីសងពីរកន្លែងក្នុងទីក្រុងភ្នំពេញ។
លោកស ខេងក៏បានព្រមានថាមន្ត្រីប៉ូលិសត្រូវចៀសឱ្យឆ្ងាយហើយមិនត្រូវពាក់ព័ន្ធនឹងករណីណាមួយ ដែលទាក់ទងនឹងគ្រឿងញៀននោះទេ។
លោកបន្តថា បើមានមន្ត្រីប៉ូលិសណាមួយជាប់ពាក់ព័ន្ធនឹងករណីគ្រឿងញៀនមន្ត្រីប៉ូលិសនោះនឹងមិនអាចរួចខ្លួនពីទោសទណ្ឌនោះឡើយ៕