រដ្ឋាភិបាលលោកហ៊ុន សែនតាមរយៈមន្ត្រីតំណាងបេសសកម្មអចិន្ត្រៃយ៍របស់ខ្លួនប្រចាំអង្គការសហប្រជាជាតិក្នុងទីក្រុងហ្សឺណែវ ប្រទេសស្វីស បានច្រានចោលនូវសេចក្តីថ្លែងការណ៍របស់អ្នកជំនាញសិទ្ធិមនុស្សរបស់អង្គការសហប្រជាជាតិអ្នកស្រី រ៉ូណា ស្មីត និងលោកDavid Kayeដោយនិយាយថា វាមិនបានឆ្លុះបញ្ចាំងពីការណ៍ពិត និងមិនបានមើលឃើញពីកិច្ចខិតខំប្រឹងប្រែងរបស់រដ្ឋាភិបាលកម្ពុជាឡើយ។
សេចក្តីប្រកាសព័ត៌មានរបស់ស្ថានបេសកកម្មអចិន្ត្រៃយ៍កម្ពុជាប្រចាំនៅអង្គការអន្តរជាតិកំពូលមួយនេះ កាលពីថ្ងៃម្សិលមិញបានលើកឡើងថា កម្ពុជាមិនភ្ញាក់ផ្អើលនឹងការលើកឡើងរបស់អ្នករាយការណ៍ពិសេសសិទ្ធិមនុស្សរបស់អង្គការសហប្រជាជាតិទាំងពីររូបនោះទេ ដោយថា ពួកគេតែងតែមើលមិនឃើញពីការខំប្រឹងប្រែងរបស់រដ្ឋាភិបាលក្នុងការលើកកម្ពស់សិទ្ធិមនុស្ស ប្រជាធិបតេយ្យនិងនីតិរដ្ឋពិតប្រាកដនៅកម្ពុជា។
សេចក្តីប្រកាសព័ត៌មានដដែលបានលើកឡើងថា អាណត្តិរបស់អ្នករាយការណ៍ពិសេសរបស់UNគឺដើម្បីជួយដល់រដ្ឋាភិបាលកម្ពុជាក្នុងការលើកកម្ពស់ និងការពារសិទ្ធិមនុស្ស មិនមែនធ្វើសេចក្តីថ្លែងការណ៍ឱ្យគេមើលឃើញពីទង្វើជ្រៀតជ្រែកផ្ទះក្នុង របស់រដ្ឋអធិបតេយ្យឡើយ។
ការច្រានចោលរបស់រដ្ឋាភិបាលកម្ពុជានៅពេលនេះ ធ្វើឡើងក្រោយពេលអ្នកជំនាញសិទ្ធិមនុស្សអង្គការសហប្រជាជាតិពីររូបគឺអ្នកស្រី រ៉ូណា ស្មីត និងលោកDavid Kayeបានចេញសេចក្តីថ្លែងការណ៍រួមមួយកាលពីថ្ងៃពុធ ដោយលើកឡើងថា ពួកគេមានកង្វល់ជាខ្លាំង ចំពោះសកម្មភាពរដ្ឋាភិបាលលោកហ៊ុន សែនក្នុងការបំបិទសំឡេងមតិផ្ទុយពីខ្លួន។
អ្នកជំនាញរបស់អង្គការសហប្រជាជាតិបានអំពាវនាវឲ្យរដ្ឋាភិបាលស្តារនិន្នាការធ្លាក់ចុះបច្ចុប្បន្នក្នុងការទទួលបានសិទ្ធិនយោបាយ និងសេរីភាពជាមូលដ្ឋានរបស់ពលរដ្ឋឡើងវិញ។
ពួកគេក៏បានបញ្ជាក់ថា ដល់ពេលហើយដែលរដ្ឋាភិបាលលោកហ៊ុន សែនត្រូវដឹកនាំឲ្យមានការផ្លាស់ប្តូរវប្បធម៌នយោបាយទៅជាកិច្ចសន្ទនាមួយ ដែលផ្តោតទៅលើបញ្ហាជាជាងផ្តោតលើបុគ្គលដែលវាជាវិធីមួយឈានទៅមុខ និងបង្កើតមូលដ្ឋានរឹងមាំសម្រាប់សន្តិភាពយូរអង្វែង ការអភិវឌ្ឍប្រកបដោយចីរភាពនិងការទទួលបានសិទ្ធិមនុស្សទាំងអស់។
សមាជិកអតីតគណបក្សសង្រ្គោះជាតិជាង១៤០រូបហើយ ដែលត្រូវបានតុលាការ និងអាជ្ញាធរចោទសួរកោះហៅ ឬ ឃុំខ្លួន ពាក់ព័ន្ធការចូលរួមប្រមូលផ្តុំ និងការអត្ថាធិប្បាយជុំវិញការគាំទ្រអតីតថ្នាក់ដឹកនាំគណបក្សសង្រ្គោះជាតិគឺលោកកឹម សុខានិងលោកសម រង្ស៊ីកាលពីពេលកន្លងមក។
កាលពីខែកុម្ភៈ សហរដ្ឋអាមេរិក ធ្លាប់បានណែនាំរដ្ឋាភិបាលឱ្យដោះលែងប្រធានគណបក្សសង្រ្គោះជាតិលោកកឹម សុខា ដែលកំពុងជាប់ឃុំក្នុងផ្ទះ ព្រោះជាការឃុំខ្លួនដោយគ្មានភ័ស្តុតាង និងអយុត្តិធម៌ព្រមទាំងត្រូវស្តារលទ្ធិប្រជាធិបតេយ្យ និងគោរពសិទ្ធិមនុស្សឡើងវិញពិតប្រាកដ ដោយថា ជាវិធីដ៏ល្អសម្រាប់កម្ពុជា ដើម្បីរក្សាប្រព័ន្ធអនុគ្រោះពន្ធEBAរបស់អឺរ៉ុប មិនឱ្យបាត់បង់។ អាមេរិកក៏បាន បង្ហាញផ្លូវដល់អ្នកនយោបាយខ្មែរឱ្យតម្កល់ផលប្រយោជន៍ជាតិជាធំ ពោលគឺធំជាងផលប្រយោជន៍បុគ្គល ឬបក្សនយោបាយរបស់ខ្លួន៕