មន្ត្រីជាន់ខ្ពស់គណបក្សសង្គ្រោះជាតិ អះអាងថា អំណោយដែលប្រធានអតីតបក្សប្រឆាំងលោក កឹម សុខា បានចែកជូនពលរដ្ឋដែលកំពុងតែខ្វះខាតស្បៀងនៅពេលនេះ គឺជាថវិកាផ្ទាល់របស់លោក និងមានការចូលរួមពីសប្បុរសជនមួយចំនួន។
មន្ត្រីជាន់ខ្ពស់បក្សប្រឆាំង លោក សួន សុរីដា បានប្រាប់សារព័ត៌មាន The Cambodia Daily នៅថ្ងៃទី៣១ ខែឧសភា នេះថា បើទោះបីជាប្រធានបក្សសង្គ្រោះជាតិ លោក កឹម សុខា ដែលកំពុងរងការរឹតត្បិតសេរីភាព មិនមានព្រៃឈើ ឬបឹងបួលក់បែបណាក៏ដោយ ប៉ុន្តែលោកនៅតែអាចរំលែកថវិកាផ្ទាល់ខ្លួន និងការកៀរគរពីសប្បុរសជននានា ដើម្បីទិញសម្ភារៈចែកជូនពលរដ្ឋដែលកំពុងដាច់ស្បៀងតាមលទ្ធភាពរបស់ខ្លួនដែលអាចធ្វើទៅបានចាប់តាំងពីវិបត្តិសេដ្ឋកិច្ចរបស់ពលរដ្ឋបានធ្លាក់ចុះដោយសារជំងឺ Covid-19 មក។
លោកអះអាងថា ក្នុងនាមជាមេដឹកនាំដែលតស៊ូដើម្បីជាតិ និងប្រជាជន ពិតជាមិនអាចនៅស្ងៀមឈរឱបដៃមើលពលរដ្ឋរបស់ខ្លួនកំពុងតែអត់ឃ្លានបានទេ ទោះបីខ្លួនឯងមិនមានលទ្ធភាពដើម្បីជួយពលរដ្ឋកំពុងខ្វះខាតទាំងនោះឲ្យបានទូលំទូលាយក៏ដោយ ប៉ុន្តែក៏អាចជួយសង្គ្រោះពលរដ្ឋតាមលទ្ធភាពជាក់ស្តែងដែលអាចធ្វើទៅបានដោយមិនរួញរាដែរ។
ការអះអាងនេះ ធ្វើបន្ទាប់ពីប្រធានគណបក្សសង្គ្រោះជាតិ លោក កឹម សុខា បានលើកឡើងពីកិច្ចការជំនួយសង្គមក្នុងការចែកអំណោយមួយចំនួនដល់ពលរដ្ឋដែលកំពុងដាច់ស្បៀងដោយសារជំងឺ Covid-19 ក្នុងពេលបច្ចុប្បន្ននេះ។
នៅថ្ងៃទី៣១ ខែឧសភា ឆ្នាំ២០២១ នេះ ប្រធានគណបក្សសង្គ្រោះជាតិ លោក កឹម សុខា បានសរសេរនៅលើទំព័រហ្វេសប៊ុក (Facebook) របស់លោកថា ក្នុងគ្រាលំបាកនេះ លោកបានចូលរួមសកម្មភាព និងទឹកចិត្តសប្បុរសធម៌ក្នុងការចូលរួមចំណែកជួយដល់ពលរដ្ឋខ្មែរដែលខ្វះខាតដោយរងផលប៉ះពាល់នូវជំងឺឆ្លងCovid-19 នៅតាមបណ្តាខេត្តនានាជាប្រចាំ។
លោកអះអាងថា ក្នុងរយៈពេលកន្លងមក លោកបានដឹកនាំធ្វើសកម្មភាពមនុស្សធម៌ក្នុងការចែកអំណោយជូនពលរដ្ឋដែលមានភាពទីទ័លខ្លាំងដោយសារការរងផលប៉ះពាល់ដែលបណ្តាលមកពីជំងឺ Covid-19 តាមបណ្តារាជធានី និងខេត្តនានា រួមមានរាជធានីភ្នំពេញ ខេត្តតាកែវ ព្រះសីហនុ ព្រៃវែង ស្វាយរៀង និងខេត្តត្បូងឃ្មុំ ជាដើម។
ជុំវិញបញ្ហានេះ កាលពីថ្ងៃទី១២ ខែឧសភា ឆ្នាំ២០២១ លោក កឹម សុខា ធ្លាប់បានអះអាងថា ជំនួយនេះពិតជាតិចតួចណាស់ ក៏ប៉ុន្តែនេះជាសទ្ធាដែលលោកជឿថា ប្រសិនបើខ្មែរមានទុក្ខ ត្រូវតែខ្មែរជួយខ្មែរ បើខ្មែរមានបញ្ហា ក៏ត្រូវតែមានដំណោះស្រាយរវាងខ្មែរ និងខ្មែរដែរ។ ជាងនេះទៀត លោកថាទោះបីនៅពេលនេះលោកមិនមានសិទ្ធិធ្វើនយោបាយ ប៉ុន្តែលោកមិនបិទភ្នែកសម្ងំយកសុខតែម្នាក់ឯងនោះទេ។
យ៉ាងណាក៏ដោយ កាលពីថ្ងៃទី៦ ខែឧសភា ឆ្នាំ២០២១ អភិបាលរងក្រុងភ្នំពេញ លោក កើត ឆែ បានលើកឡើងក្នុងសន្និសីទសារព័ត៌មានរបស់រដ្ឋបាលរាជធានីភ្នំពេញថា ក្រុមអ្នកប្រឆាំងរដ្ឋាភិបាលមិនបានជួយលុយសូម្បីតែមួយរៀល រួមទាំងកម្លាំងក្នុងអំឡុងពេលរដ្ឋាភិបាលខំប្រឹងប្រែងទប់ស្កាត់រលកចម្លងជំងឺ Covid-19 ឆ្លងចូលសហគមន៍នៅពេលនេះ។ ប៉ុន្តែក្រុមប្រឆាំងទាំងនោះបានត្រឹមតែនិយាយរិះគន់ចំណាត់ការរបស់រដ្ឋាភិបាលតែប៉ុណ្ណោះ។
បញ្ហានេះ ត្រូវអ្នកវិភាគនយោបាយ សង្គម បណ្ឌិត ឡៅ ម៉ុងហៃ រិះគន់ថា ការលើកឡើងរបស់អភិបាលរងក្រុងភ្នំពេញ លោក កើត ឆែ គ្រាន់តែបង្ហាញពីមន្ត្រីដែលមិនយល់ដឹងពីកាតព្វកិច្ច និងតួនាទីរបស់ខ្លួនក្នុងនាមជាមន្ត្រីបក្សកាន់អំណាចដែលកំពុងដឹកនាំរដ្ឋាភិបាលតែប៉ុណ្ណោះ៕