សាច់ញាតិអ្នកជាប់ឃុំ និងអ្នកវិភាគ ទាមទារឱ្យរដ្ឋាភិបាលកម្ពុជាបង្ហាញព័ត៌មានដល់ក្រុមគ្រួសារ ក្រោយពីបានទទួលព័ត៌មានថា គ្រួសាររបស់ពួកគាត់បានឆ្លងជំងឺ Covid-19 នៅក្នុងពន្ធនាគារ។
ការទាមទារនេះ ធ្វើឡើងក្រោយពីមន្ត្រីពន្ធនាគារលើកឡើងថា មានអ្នកជាប់ឃុំក្នុងពន្ធនាគារចំនួន ៣៥០នាក់ រកឃើញឆ្លងជំងឺ Covid-19 ខណៈនៅក្នុងពន្ធនាគារព្រៃស ពន្ធនាគារខេត្តកណ្ដាល និងពន្ធនាគារខេត្តព្រះសីហនុ កំពុងមានភាពចង្អៀតណែនដោយសារដាក់អ្នកជាប់ឃុំលើសចំណុះ។
ក្មួយប្រុសរបស់លោក រ៉ុង ឈុន គឺលោក រ៉ុង វិជ្ជា ប្រាប់សាព័ត៌មាន The Cambodia Daily ថា គ្រួសាររបស់ពួកគាត់មានក្ដីព្រួយបារម្ភក្រោយទទួលព័ត៌មានលោក រ៉ុង ឈុន និងអ្នកទោសនយោបាយ ព្រមទាំងអ្នកទោសមនសិការផ្សេងៗទៀតឆ្លងជំងឺ Covid-19។
លោកបន្តថា ទោះបីជាមានព័ត៌មានអ្នកទោសនយោបាយ និងអ្នកទោសមនសិការឆ្លងជំងឺ Covid-19 ក្ដី ប៉ុន្តែអាជ្ញាធរនៅតែមិនបានបង្ហាញព័ត៌មានដល់គ្រួសារពួកគាត់ឱ្យបានដឹងនៅឡើយទេ។ លោកចាត់ទុកការមិនផ្ដល់ព័ត៌មាន និងមិនឱ្យក្រុមគ្រួសារបានជួបសួរសុខទុក្ខសាច់ញាតិនៅក្នុងពន្ធនាគារនោះថា រដ្ឋាភិបាល និងមន្ត្រីពន្ធនាគារកំពុងព្យាយាមលាក់បាំងព័ត៌មានទាំងអស់នេះ ខណៈដែលពួកគាត់ទទួលព័ត៌មានថា គ្រួសាររបស់ពួកគាត់បានឆ្លងCovid-19។
អ្នកស្រី ប៉ាត់ រស្មី ដែលត្រូវជាភរិយាសកម្មជនបរិស្ថាន ថុន រដ្ឋា បារម្ភថា អ្នកស្រីបានទទួលព័ត៌មានតាមទូរស័ព្ទពីអ្នកលាក់អត្តសញ្ញាណម្នាក់ថា លោក ថុន រដ្ឋា បានឆ្លងជំងឺ Covid-19 ក្នុងពន្ធនាគារ។ អ្នកស្រីបន្តថា ការមិនទទួលបានព័ត៌មានពីស្វាមីនេះ ធ្វើឱ្យអ្នកស្រីមានសម្ពាធផ្លូវចិត្ត ខណៈមន្ត្រីពន្ធនាគារមិនឱ្យពួកគាត់ប្រើទូរស័ព្ទដើម្បីទំនាក់ទំនងជាមួយគ្រួសារ។
អង្គការសហប្រជាជាតិ បានចេញសេចក្ដីថ្លែងការណ៍របស់ខ្លួននៅថ្ងៃទី២៨ ខែឧសភា ឆ្នាំ២០២១ ថា ខ្លួនបានផ្ដល់ជំនួយមនុស្សធម៌គាំទ្រដល់ពន្ធនាគារកម្ពុជា តាមការស្នើសុំរបស់នាយកដ្ឋានពន្ធនាគារ ក្នុងនោះអង្គការសហប្រជាជាតិបានផ្ដល់សម្ភារៈការពារខ្លួនពី Covid-19 ដូចជាឧបករណ៍តេស្ដរហ័ស និងវីតាមីនដល់អ្នកជាប់ឃុំ ១ម៉ឺននាក់នៅពន្ធនាគារ ហើយអង្គការសហប្រជាជាតិនឹងបន្តផ្ដល់ជំនួយជាបរិក្ខារផ្សេងៗបន្ថែមទៀតនៅថ្ងៃទី១ ខែមិថុនា។
ក្រៅពីផ្ដល់ជំនួយ អង្គការសហប្រជាជាតិក៏បានជំរុញឱ្យដោះលែងអ្នកជាប់ឃុំដែលស្ថិតក្នុងក្រុមអ្នកត្រូវឃុំខ្លួនបណ្ដោះអាសន្ន ស្ត្រីជាប់ឃុំមានកូនតូចនៅជាមួយ អ្នកមានបញ្ហាសុខភាពប្រចាំកាយ និងអ្នកជាប់ឃុំដែលមិនមែនជាទោសហិង្សា។
ពាក់ព័ន្ធរឿងនេះ អ្នកនាំពាក្យក្រសួងយុត្តិធម៌ លោក ជិន ម៉ាលីន សរសេរលើគណនី Facebook របស់លោកថា៖«អត់យល់ មិនដឹងថា UN សង្គមស៊ីវិល និងក្រុមប្រឆាំងមួយចំនួនចង់បានអីឱ្យពិតប្រាកដ!»។ អ្នកនាំពាក្យដដែលលើកឡើងទៀតថា នៅពេលមានការបង្ហាញអត្តសញ្ញាណអ្នកវិជ្ជមាន Covid-19 ពួកគេរិះគន់ថារំលោភសិទ្ធិមនុស្ស តែពេលនេះបែរជាមកសុំបង្ហាញអត្តសញ្ញាណអ្នកជាប់ឃុំដែលឆ្លងជំងឺ Covid ទៅវិញ។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា លើកឡើងថា រដ្ឋាភិបាល និងអាជ្ញាធរគួរបង្ហាញព័ត៌មានពីសុខភាព និងសុវត្ថិភាពដល់ក្រុមគ្រួសារអ្នកទោសនយោបាយ និងអ្នកទោសមនសិការ ដើម្បីឱ្យពួកគាត់បានដឹងថាគ្រួសារពួកគាត់ឆ្លង ឬមិនឆ្លងជាដើម។
លោកបន្តថា រដ្ឋាភិបាល និងអាជ្ញាធរនឹងរងការរិះគន់ពីសាធារណជនជាតិ និងអន្តរជាតិ ចំពោះការមិនយកចិត្តទុកដាក់អ្នកជាប់ឃុំ និងការមិនផ្ដល់ព័ត៌មានដល់គ្រួសាររបស់ពួកគាត់។
ជាងនេះទៅទៀត អ្នកវិភាគនយោបាយ លោក គឹម សុខ និយាយថា រដ្ឋាភិបាលខ្វះតម្លាភាពក្នុងការបង្ហាញព័ត៌មានពិតអ្នកជាប់ឃុំឆ្លងជំងឺ Covid-19។ លោកថា ចំនួនអ្នកឆ្លងCovid-19 ដែលរដ្ឋាភិបាលបង្ហាញនោះមិនទាន់អាចជឿជាក់បានទេ បើជំងឺ Covid-19 ឆ្លងចូលពន្ធនាគារហើយ វាពិតជាពិបាកទប់ស្កាត់ណាស់ ដោយសារក្នុងពន្ធនាគារគ្មានលំហកន្លែងរក្សាគម្លាតសុវត្ថិភាព និងសម្រាប់ធ្វើចត្តាឡីស័ក ខណៈអ្នកជាប់ឃុំដេកប្រជ្រៀតគ្នា ដេកគរលើគ្នា ហូបចុកជុំគ្នា និងចេញហាត់ប្រាណ ១ថ្ងៃ ១ម៉ោងក៏ក្នុងទីធ្លាចង្អៀតទៀតផង។
លោកបន្តថា ការដេកប្រជ្រៀតគ្នានេះ ដោយសារតែបន្ទប់ឃុំតូច ហើយដាក់ឃុំមនុស្សចន្លោះពី ២០ ទៅ ៣០នាក់ ខណៈបន្ទប់ឃុំឃាំងធំអាចមានមនុស្សដល់ទៅរាប់រយនាក់។ ករណីនេះ លោកថាបើក្នុងបន្ទប់មួយមានអ្នកឆ្លងតែម្នាក់ ដូច្នេះវាពិតជាពិបាកជឿណាស់ថា អ្នកផ្សេងទៀតមិនឆ្លង ព្រោះដេកតម្រៀបគ្នាដូច្នេះ។
អ្នកវិភាគនយោបាយរូបនេះថា បើរដ្ឋាភិបាលមិនចាត់វិធានការដោយតម្លាភាព ហើយនៅព្យាយាមលាក់បាំងព័ត៌មានទៀត នោះអ្នកជាប់ឃុំនឹងប្រឈមគ្រោះថ្នាក់ធ្ងន់ធ្ងរណាស់ ដោយសារក្នុងបន្ទប់ឃុំឃាំងគ្មានខ្យល់អាកាសគ្រប់គ្រាន់ បង្អួចតូចមួយ ហើយស្របពេលនេះជារដូវវស្សាមានភ្លៀងធ្លាក់ទៀតនោះ។
តាមរបាយការណ៍របស់អង្គការលីកាដូ (Licadho) ឱ្យដឹងថា ពន្ធនាគារចំនួន២៨ នៅទូទាំងប្រទេសមានអ្នកជាប់ឃុំសរុបប្រមាណ ៤ម៉ឺននាក់ដែលធ្វើឱ្យពន្ធនាគារមានអ្នកទោសចង្អៀតណែន ដោយសារតែការដាក់អ្នកជាប់លើសចំណុះ។ ក្នុងនោះ ពន្ធនាគារចំនួន១៨ មានអ្នកទោសច្រើនខ្លាំងលើសពីសមត្ថភាពផ្ទុកដល់ ៣០០%។ ចំណែកពន្ធនាគារព្រៃស ឬហៅថា ម១ មានអ្នកជាប់ឃុំរហូតដល់ជាង ៧ពាន់ ៧០០នាក់ ឬស្មើនឹង ៣៧៦% នៃសមត្ថភាពផ្ទុករបស់ខ្លួន៕